ރާއްޖެއިން މިއަހަރަށް ކަނޑައެޅި ފަތުރުވެރިންގެ އަމާޒަށް ވާސިލުވުމަށް ބޭނުންވަނީ 30،000 ފަތުރުވެރިން ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ހާމަވެއްޖެ އެވެ.
ފަތުރުވެރިކަމުގައި ރާއްޖެއިން މި އަހަރަށް ކަނޑައެޅީ ދެ މިލިއަން ފަތުރުވެރިންގެ އަމާޒެކެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މިމަހުގެ 21 ވަނަ ދުވަހުގެ ނިޔަލަށް ރާއްޖެ ޒިޔާރަތްކުރި ފަތުރުވެރިންނާއެކު އަމާޒު ހާސިލުކުރަން ބޭނުންވަނީ 30،000 ފަތުރުވެރިންނެވެ.
ރާއްޖެއަށް އެވަރެޖްކޮށް މިހާރު ދުވާލަކު ޒިޔާރަތްކުރާ ފަތުރުވެރިންގެ އަދަދާއެކު ކުރިއަށް އޮތް ތިން ދުވަސް ތެރޭގައި ދެ މިލިއަން ފަތުރުވެރިންގެ އަމާޒު ހާސިލުވާނެ ކަމަށް ބެލެވެ އެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން ރާއްޖެއަށް މި އަހަރުގެ މިހާތަނަށް ޒިޔާރަތްކުރި ފަތުރުވެރިންގެ އަދަދު ވަނީ މިދިޔަ އަހަރުގެ މި މުއްދަތަށްވުރެ ނުވަ ޕަސެންޓް އިތުރުވެފަ އެވެ.
ފަތުރުވެރިކަމުގެ ގަދަ 10 ގައުމު
- ޗައިނާ – 260،900
- ރަޝިއާ – 216،00
- އިނގިރޭސިވިލާތް – 173،900
- ޖަރުމަނު – 151،200
- އިޓަލީ – 133،700
- އިންޑިއާ – 126،000
- އެމެރިކާ – 66،700
- ފްރާންސް – 51،700
- ސްޕެއިން – 46،100
- ސްވިޓްޒަލޭންޑް – 39،000
ރާއްޖެއަށް މިހާރު 23 ގައުމަކުން 40 އަށްވުރެ ގިނަ އެއާލައިނުން ސީދާ ދަތުރުތައް ކުރެ އެވެ.
ރާއްޖޭގައި މި ވަގުތު ފަތުރުވެރިކަމަށް ޖުމްލަ 1،262 ތަނެއް ދަނީ ހިންގަމުންނެވެ.
މީގެ ތެރޭގައި 172 ރިސޯޓާއި 920 ގެސްޓްހައުސް އާއި 155 ސަފާރީ އަދި 15 ހޮޓާ ހިމެނެ އެވެ. މިތަންތަނުގައި ފަތުރުވެރިންނަށް ހުރި އެނދުގެ އަދަދަކީ 63،118 އެވެ.