ރޭގެ ވަގުތެެއްގައި "ހަވީރު"ގެ އިދާރާގެ ރިސެޕްޝަނުގައި ރޯކޮށްލާފައިވަނީ އޮޑިޓަށް ހުރަސް އެޅުމުގެ ގޮތުން ކަމަށް ހަވީރު ނިއުސް އެޖެންސީގެ ތިން ހިއްސާދާރުން ކަމަށްވާ އަބްދުﷲ ފާރޫގު ހަސަނާއި މުހައްމަދު ނައީމް އަދި އިބްރާހިމް ރަޝީދު މޫސާ ވިދާޅުވެއްޖެ އެވެ.
ހަވީރުގެ މިލްކިއްޔާތާ ގުޅޭ ގޮތުން ހައިކޯޓުން ކޮށްފައިވާ ހުކުމް ތަންފީޒުކޮށް، އެ ތިން ބޭފުޅުންނަށް ހަވީރު ލިބުނު ފައިދާއިން މިލްކުވާ ހިއްސާ ކަނޑައެޅުމަށް އޮޑިޓެއް ކުރުމަށް ސިވިލް ކޯޓުން ވަނީ އަންގާފަ އެވެ. ތިން ހިއްސާދާރުންނާއި ހަވީރުގެ މަސްއޫލުވެރިޔާ މުހައްމަދު ޒާހިރު ހުސެއިން އެއްބަސްވާ އޮޑިޓް ފާމަކުން އޮޑިޓްކުރުމަށް ވެސް ކޯޓުން އެންގި އެވެ. އެ ހަތަރު ބޭފުޅުންގެ އެއްބަސްވުމާއެކު އޮޑިޓްކުރަން ހަވާލުކޮށްފައިވަނީ އާންސްޓް އެންޑް ޔަންގް ކުންފުންޏާ އެވެ.
އިއްޔެ އެ ކުންފުންޏާ އޮޑިޓްކުރަން ހަވާލުކޮށްފައިވަނިކޮށް، ހަވީރުގެ ގިނަ ލިޔެކިޔުންތަކެއް ހުރި އެ އިދާރާގެ ރިސެޕްޝަންގައި ރޭ ވަނީ ރޯކޮށްލާފަ އެވެ. ރިސެޕްޝަން ވަނީ އެއްކޮށްހެން އަނދާފަ އެވެ.
ފާރޫގާއި ނައީމް އަދި ރަޝީދު މޫސާ މިއަދު ނެރުނު ނޫސްބަޔާނެއްގައި ބުނެފައިވަނީ، ރޭގެ ހާދިސާއަކީ އޮޅުމެއް ނެތް ގޮތުގައި އެ ބޭފުޅުންނާމެދު ބަޔަކު ގެންގުޅޭ ރުޅިވެރިކަމުގެ ނަތީޖާ ކަމަށެވެ. އަދި އެފަދަ އަމަލުތަކުން ދޭހަވަނީ، ހަވީރުގެ ވިޔަފާރީތަކުން އެ ބޭފުޅުންނަށް އޮތް ހައްގު ދީގެން ކުރިއަށް ދާން ބައެއްގެ ހިތްތައް ނުރުހުމުގެ ނަތީޖާ ކަމަށެވެ.
"އަޅުގަނޑުމެން ތިން މީހުންނަށް ލިބެންވާ ހައްގުތައް ކަށަވަރުކޮށް ހަވީރު އަށް ވޭތުވެ ދިޔަ ތިރީހަކަށް އަހަރުގެ ތެރޭގައި ލިބުނު ފައިދާގެ ތެރެއިން އަޅުގަނޑުމެންނަށް ހައްގުވާ މިންވަރު ކަނޑައެޅުމަށްޓަކައި އޮޑިޓެއް ހިންގުމަށް ކޯޓުން ވަނީ އަމުރުކޮށްފަ، މި ހާލަތުގައި ހަވީރުގެ އެތައް މިލިއަން ރުފިޔާގެ އަގުހުރި މުދަލާއި ތަކެތި ހުރި އިމާރާތުގައި ރޯ ކޮށްލުމުން ގެއްލުން ވަނީ އަޅުގަނޑުމެން ތިން މީހުންނަށް ކަން ސަލާމަތް ބުއްދި ހުރި ކޮންމެ އިންސާނަކަށް ވެސް އޮޅުމެއް ނެތި އެނގޭނެ،" ބަޔާނުގައިވެ އެވެ.
ބަޔާނުގައި ބުނެފައިވަނީ، ރިސެޕްޝަނުގައި ރޯކޮށްލާ ރޭ ނައްތާލި ލިޔުންތަކަކީ އޮޑިޓެއް ހިންގުމަށް ކޮންމެހެން ބޭނުންވާނެ ލިޔެކިޔުންތަކެެއް ކަމަށާއި ރޭގެ ޖަރީމާއަކީ ހަވީރު އޮޑިޓްކުރުމަށް ހުރަސް އެޅުމުގެ ގޮތުން ހިންގި އަމަލެއްކަން ކަށަވަރުވާ ކަމަށެވެ.
"ހަވީރުއާ ދެކޮޅަށް ރޭ ހިނގި ޖަރީމާއަކީ ނުހަނު ފިނޑި އަމަލެކެވެ. މި ބޮޑު ޖަރީމާގެ ޒިންމާ ހަވީރުގެ ތާރީހު އޮޅުވާލައި ހަވީރުގެ މިލްކުވެރިންގެ ތެރެއިން ތިން މީހެއްގެ ހައްގުތަކަކީ ނެތް އެއްޗެއްކަށް ހަދައި، ބޮޑެތި ދޮގުތައް ހަދައި ފަތުރައި، ނަފުރަތާއި ރުޅީގެ އޮށްތައް އިންދަމުން ގެންދާ ފަރާތްތައް އުފުލަން ޖެހޭނެ ކަމާ މެދު އޮޅުމެއް ނެތް، ހަވީރުގެ މިލްކުވެރިންގެ މެދުގައި އުފެދިފައި އޮތް މައްސަލަ ސުލްހަވެރި ގޮތުގައި ހައްލު ކުރުމަށް އެންމެ ބޮޑަށް ހުރަސް އަޅަނީ މި ދެންނެވި ފަރާތްތަކުން،" ބަޔާނުގައި ބުނެފައިވެ އެވެ.
