ނުކުޅެދުންތެރިކަން ހުންނަ ކުދިންނަށް ވަޒީފާ ދިނުން ރޯދަމަހަށް ފަހު

ނުކުޅެދުންތެރިކަން ހުންނަ ކުދިންނަށް ހާއްސަކޮށްގެން ފެނަކައިން ހުޅުވާލާ ވަޒީފާގެ ފުރުސަތުތަކަށް ކުދިން ނެގުމުގެ މަސައްކަތް ރޯދަމަސް ނިމުމުން ފަށާނެ ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ނިމާލް ވިދާޅުވެއްޖެ އެވެ.

ނުކުޅެދުންތެރިކަން ހުންނަ ކުދިންނަށް ވަޒީފާ ދިނުމަށް ސަރުކާރުން ފަށާފައިވާ މަސައްކަތްތަކުގެ ތެރެއިން، ރާއްޖޭގެ އެކި ރަށްރަށުގައި ހުރި ފެނަކަ އޮފީސްތަކުން 100 ކުދިންނަށް ވަޒީފާ ހަމަޖައްސަން ނިންމާފައިވާ ކަމަށް ރައީސް އަބްދުﷲ ޔާމީން ވަނީ މީގެ މަހެއްހައި ދުވަސްކުރިން ބޭއްވި ރަސްމިއްޔާތެއްގައި އިއުލާނުކުރައްވާފަ އެވެ. އެއާ ގުޅިގެން ފެނަކަ އޮފީސްތައް ހުރި ރަށްރަށުގައި ތިބި ނުކުޅެދުންތެރިކަން ހުންނަ ކުދިންގެ ދަފްތަރު ބަލައި ޗެކު ކުރަން ފަށާފައިވާ ކަމަށް ފެނަކައިން ވަނީ ބުނެފަ އެވެ.

"އަވަސް" އާ ވާހަކަދައްކަވަމުން ފެނަކަ ކޯޕަރޭޝަންގެ މެނޭޖިން ޑިރެކްޓާ މުހައްމަދު ނިމާލް ވިދާޅުވީ، ނުކުޅެދުންތެރިކަން ހުންނަ ކުދިންނަށް ވަޒީފާ ދިނުމުގެ މަސައްކަތް މިހާރުވެސް ފަށާފައިވާ ކަމަށެވެ. އެގޮތުން ފެނަކަ ކޯޕަރޭޝަންގެ ދަށުން ހިންގާ އޮފީސްތައް ހުރި ހުރިހާ ރަށެއްގައި ތިބި ނުކުޅެދުންތެރިކަން ހުންނަ ކުދިންގެ މައުލޫމާތު އެއްކޮށްފައިވާ ކަމަށާއި، ނަމަވެސް ކުދިންނަށް ވަޒީފާ ދިނުން ލަސްކޮށްފައިވަނީ، އެ އޮފީހަށް ލިބިފައިވާ ފައިލުތަކުގެ ތެރެއިން އެއްގޮތަކަށްވެސް ވަޒީފާއަށް ނުނިކުމެވޭވަރަށް ސިއްހީ ހާލަތު ދަށް ކުދިން ހިމެނޭތީ އިތުރު ސްކްރީނިން އެއް ބޭއްވުމަށް ކަމަށެވެ.

"ރަށްރަށުގައި ތިބި ނުކުޅެދޭ ކުދިންނާ ބެހޭ މައުލޫމާތު ލިބުމުން ކުރިން އަޅުގަނޑުމެން ވިސްނާފައި އޮތީ މިމަހުގެ ތެރޭގައި ބޮޑު ރަސްމިއްޔާތަކާ އެކު ކުދިންނަށް ވަޒީފާ ލިބުނު ކަމުގެ ލިޔުން ހަވާލުކުރުމަށް. އެހެން ނަމަވެސް ބައެއް ރަށްރަށުން އެބަހުރި އޮފީހަށް އައިސް ކާޑު އިންކޮށް ނުލެވޭ ވަރަށް ސިއްހީ ހާލަތު ދަށް ކުދިންގެ ފޯމުވެސް ލިބިފަ. ގާތްގަނޑަކަށް 25 އެއްހައި ކުދިން އެބައުޅޭ އެގޮތަށް. އެހެންވެ އަލުން އިއުލާނު ކުރަން ނިންމީ،" ނިމާލް ވިދާޅުވި އެވެ.

ނިމާލް ވިދާޅުވީ، ރޯދަ މަސް ނިމުމުން އެ މަސައްކަތް އިތުރު ބާރު މިނެއްގައި ފަށާނެ ކަމަށެވެ. ރައީސް ވިދާޅުވެފައިވާ ގޮތަށް 100 ކުދިންނަށް ވަޒީފާ ދޭނެކަމުގެ ޔަގީންކަން ވެސް ދެއްވާ ކަމަށެވެ.

"ވަޒީފާ ދޭން ނިންމާފައި މިވަނީ 100 ކުދިންނަށް. އެހެންވީމާ ފެނަކައިގެ އިންޖީނުގެ ހުރި ހުރިހާ ރަށެއްގެ ކުދިންނަށް ވަޒީފާ ނުލިބިވެސް ހިނގައިދާނެ،" ނިމާލް ވިދާޅުވި އެވެ.

އެކި ރަށްރަށުގައި ހުރި ފެނަކަ އޮފީސްތަކުން 100 ވަޒީފާ ނުކުޅެދުންތެރިކަން ހުންނަ ފަރާތްތަކަށް ހާއްސަކޮސްފައިވާއިރު 150 އަށް ވުރެ ގިނަ ރަށުގައި ފެނަކައިގެ އޮފީސް ހުރެ އެވެ.