ގދ. ތިނަދޫގެ ބިން ހިއްކުމުގެ މަސައްކަތް ފެށުމުގެ ތައްޔާރީތައް ހައުސިން މިނިސްޓްރީން ފަށައިފިއެވެ.
ތިނަދޫގެ 55 ހެކްޓަރުގެ ބިން ހިއްކަން ސަރުކާރުން ނިންމާފައިވާތީ އެމަސައްކަތް ފެށުމަށް ސ. ފޭދޫގެ ބިން ހިއްކާ ނިންމުމަށްފަހު ވެން އޫޑް ޑްރެޖިން އެންޑް މެރިންކޮންޓްރެކްޓާ ތިނަދުއަށް މިއަދު ގޮސްފައިވާކަމަށް ހައުސިން މިނިސްޓަރު ވަނީ ބުނެފަ އެވެ.
އަވަސް އަށް މައުލޫމާތުދެއްވަމުން ތިނަދޫ ކައުންސިލް މެންބަރު ސައުދު އަލީ ވިދާޅުވީ، ފޭދޫގެ ބިން ހިއްކުމަށްފަހު ބިންހިއްކަން ބޭނުންވާ ސާމާނާއެކު ބާޖެއް އެރަށަށް އަންނަން ފުރާފައިވާ ކަމަށާއި މިއަދުގެ މެދުރު ފަހުގެ ވަގުތެއްގައި ބާޖު ރަށަށް ލަފާނެ ކަމަށެވެ. ނަމަވެސް ބިން ހިއްކުމުގެ މަސައްކަތް ފެށޭނީ ކުރިއަށް އޮތް ހަފުތާއެއްހައި ދުވަހުގެ ތެރޭގައި ކަމަށެވެ.
ތިނަދޫގައި 55 ހެކްޓަރުގެ ބިން ހިއްކައި 1852 މީޓަރުގެ ރިވެޓްމެންޓެއް ޖަހަން ހަވާލުކޮށްފައިވަނީ ނެދަލެންޑްސްގެ ވެން އޫޑް ޑްރެޖިން އެންޑް މެރިންކޮންޓްރެކްޓާ އެވެ.
ތިނަދޫއަކީ މީގެ ކުރިންވެސް ވަރަށް ބޮޑަށް ހިއްކައިގެން ބޮޑުކޮށްފައިވާ ރަށެކެވެ. މިފަހަރު ކުރިއަށްގެންދާ ހިއްކުމުގެ މަޝްރޫއުގެ ދަށުން އެރަށުގެ ދެކުނު ފަރާތުން 4 ހެކްޓަރު އަދި އުތުރު ފަރާތުން 51 ހެކްޓަރުގެ ބިން ހިއްކަން ވަނީ ނިންމާފަ އެވެ.
ސައުދު ވިދާޅުވީ، 55 ހެކްޓަރުގެ ބިން ކުރިއަށް އޮތް 25 ވަރަކަށް ދުވަހުގެ ތެރޭގައި ހިއްކައި ނިންމާލެވޭނެ ކަމަށް އުންމީދުކުރާ ކަމަށެވެ.
ގދ. ތިނަދޫ --