އަވަށްޓެރި ސްރީލަންކާއަށް އެއްވެސް އިންޒާރެއް ދީފައި ނުވާނެ ކަމަށާއި އޭނާ ފާޅު ކުރެއްވީ ލަންކާ ސަރުކާރުން ރާއްޖޭގެ އިދިކޮޅު ފަރާތްތަކަށް އެއްބާރުލުންދޭތީ އޮތް ކަންބޮޑުވން ކަމަށް ވިލިފުށީ ދާއިރާގެ މެންބަރު ރިޔާޒު ރަޝީދު ވިދާޅުވެއްޖެ އެވެ.
ރިޔާޒު މިހެން ވިދާޅުވިއިރު ލަންކާ ސަރުކާރުން ވަނީ ކުރީގެ ރައީސް މުހައްމަދު ނަޝީދު އެގަމުގައި ހުންނަވައިގެން ކުރައްވާ މަސައްކަތްޕުޅުތަކާ މެދު އެ ގައުމުގެ އެއްވެސް ކަންބޮޑުވުމެއް ނެތް ކަމަށް ބުނެފަ އެވެ.
ރިޔާޒު ވިދާޅުވީ ރޭ ސަންގް ޓީވީގެ "ހަބަރަށްފަހު" ޕްރޮގްރާމްގައި އޭނާ ދެއްކެވި ބައެއް ވާހަކަތައް އޮޅޭ ގޮތަށް މީޑީއާގައި ރިޕޯޓްކޮށްފައިވާ ކަމަށާއި އޭނާ ލަންކާއަށް އިންޒާރުދިން ކަމަަށް ބުނާ ވާހަކައަކީ ދެއްކެވި ވާހަކައިގެ އަސްލު އޮޅޭ ގޮތަށް ބުނާ ބުނުމެއް ކަމަށެވެ. ނަމަވެސް ރާއްޖޭގެ އިދިކޮޅު ފަރާތްތަކުން ލަންކާގައި ތިބެގެން މަސައްކަތް ކުރާއިރު އެ ގައުމުން އެކަންކަމާ މެދު ގެންގުޅޭ ވިސްނުމާމެދު ކަންބޮޑުވާ ކަމަށް ވިދާޅުވެފައިވާނެ ކަމަށެވެ.
އޭނާ ވިދާޅުވީ ރާއްޖެ އާއި ލަންކާއަކީ ޒަމާނުއްސުރެ އެކުވެރި ގާތް ގުޅުމެއް އޮންނަ ދެ ގައުމު ކަމަށާއި އެއް ގައުމަށް ދިމާވާ ދަތި ހާލަތުގައި އަނެއް ގައުމުން އަބަދުވެސް އެހީތެރިކަން ފޯރުކޮށްދޭ ކަމަށެވެ. އެ ހަގީގަތް އެންމެނަށް އެނގޭ ކަމަށާއި ލަންކާގެ ދާހިލީ ހަނގުރާމަ ނިމި، އެކަމުން އަރައިގަތުމަށް ވެސް ރާއްޖެއިން އެއްބާރުލުންދިން ކަމަށެވެ.
ރިޔާޒު އިތުރަށް ވިދާޅުވީ، ރާއްޖޭގެ ޓޫރިޒަމް ހަލާކު ކުރަން މަސައްކަތްކުރާ ބަޔަކަށް އެހީވުމަކީ ލަންކާއަށް ވެސް ބޮޑު ގެއްލުންތަކެއް ކުރިމަތިވާނެ ކަމެއް ކަމަށެވެ. ރާއްޖޭގައި ލަންކާގެ ވިޔަފާރިވެރިންގެ ގިނަ ރިސޯޓުތަކެއް ހުރިއިރު، އޭގެ ސަބަބުން އެ ވިޔަފާރިވެރިންނަށް ވެސް ފޫނުބެދޭވަރުގެ ގެއްލުންތަކެއްވަމުންދާނެ ކަމަށެވެ. މީގެއިތުރުން ލަންކާ އާއި މާލެއާ ދެމެދު އެތައް ފްލައިޓްތަކެއް ދަތުރުކުރަމުންދާއިރު އެފަދަ ކަންކަމުގެ ސަބަބުން އެ ހުރިހާ ކަމަށް ބުރޫއަރާނެ ކަމަށެވެ.
ރިޔާޒު ވިދާޅުވީ، ރާއްޖޭގެ އިގުތިސޯދަށްކުރާ ކޮންމެ އަސަރެއް ލަންކާއަށް ވެސް ކުރާނެ ކަމަށާއި އެހެންކަމުން "ރާއްޖޭގެ އިގްތިސޯދު ފުނޑާލަން މަސައްކަތްކުރާ ބަޔަކަށް" ލަންކާ ސަރުކާރުން އެއްބާރުލުން ނުދޭން އޭނާ އެދި ވަޑައިގަންނަވާ ކަމަށެވެ.
ލަންކާއަކީ 25 އަހަރު ވަންދެން ދާހިލީ ހަނގުރާމައެއްގެ ތެރޭގައި އޮތް ގައުމެކެވެ.
އަޑުތައް ފެތުރިފައިވާ ގޮތުން ރައީސް ނަޝީދު ލަންކާއަށް ވަޑައިގެންފައިވަނީ ރާއްޖޭގެ ސަރުކާރު ބަދަލުކުރުމަށް މަސައްކަތްފުޅު ކުރެއްވުމަށް ޓަކައި ބޭރުގެ އެކި ފަރާތްތަކާ އެކު ބައްދަލުވުންތަކެއް ބޭއްވުމަށެވެ. ރައީސް ނަޝީދު ހައްޔަރު ކުރުމަށް ކްރިމިނަލް ކޯޓުން އިއްޔެ ވަނީ ދިވެހި ފުލުހުންގެ މައްޗަށް އަމުރެއް ވެސް ވަނީ ނެރެފަ އެވެ. ކްރިމިނަލް ކޯޓުން ނަޝީދު ހައްޔަރު ކުރުމަށް އަމުރު ނެރުނީ، އޮޑިޓް ރިޕޯޓެއްގައި ފާހަގަ ކޮށްފައިވާ މައްސަލަތަކަކާ ގުޅުން ހުރި ތަހުގީގަކަށް ބޭނުންވާތީ އާއި، ނަޝީދުގެ 13 އަހަރުގެ ޖަލު ހުކުމް ތަންފީޒު ކުރުމަށެވެ. އެމަނިކުފާނު ރާއްޖެއިން ބޭރަށް ވަޑައިގަތީ މައިބަދައިގެ އޮޕަރޭޝަނެއް ކުރެއްވުމަށެވެ. އެހެން ނަމަވެސް އޮޕަރޭޝަން ވެސް ނުކުރައްވައި ނަޝީދު ވަނީ، އެންމެ ފަހުން އިނގިރޭސިވިލާތުގެ ހިމާޔަތް ހޯއްދަވާފަ އެވެ. ނަޝީދު ލަންކާގައި ހުންނެވި އިރު ބަޣާވާތެއް ރޭވުމުގެ ތުހުމަތުގައި އެ ކަމުގެ ހެކި ހޯދުމަށް ރޭ ފުލުހުން ވަނީ އެ މަނިކުފާނުގެ އާއިލީގެ ގ. ކެނެރީގެ ބަލައި ފާސްކޮށްފަ އެވެ.