އިއްޔެ ސީރިއާގައި ދިން ވައިގެ ދެ ހަމަލާއެެއްގައި 100 އަށްވުރެ ގިނަ މީހުން މަރުވެއްޖެ އެވެ. އޭގެ ތެރޭގައި 28 ކުޑަކުދިން ވެސް ހިމެނެ އެވެ. ބޮމުގެ މި ހަމަލާތައް ދީފައިވަނީ އިދިކޮޅު ފަރާތްތަކުގެ ބާރުގައިވާ ސަރަހައްދަކަށެވެ.
ފުރަތަމަ ހަމަލާދީފައިވަނީ އިދިލީބުގެ މާރުކޭޓަކަށެވެ. އެ ހަމަލާގައި 60 މީހުން ވަނީ މަރުވެފަ އެވެ. އަދި 100 އަށްވުރެ ގިނަ މީހުން ޒަހަމްވެފައިވެ އެވެ. ދެވަނަ ހަމަލާ ދިނީ ހަލަބަށެވެ. އެ ހަމަލާގައި 45 މީހުން މަރުވެފައިވާ ކަމަށް ރިޕޯޓްތައް ބުނެ އެވެ.
އިދިލީބުގެ މާާރުކޭޓަށް ހަމަލާދީފައިވަނީ އެ މާރުކޭޓަށް އެތައް ބަޔަކު އީދު ހެދުމާއި އީދަށް ބޭނުންވާ އެހެން ވެސް ސާމާނު ގަތުމަށް ޖަމާވެފައިވަނިކޮށެވެ.
ވައިގެ ވަރުގެ ހަމަލާތަކެއްދީ، 100 އަށްވުރެ ސީރިއާގެ ރައްޔިތުން މަރާލާފައިމިވަނީ ދުނިޔޭގެ ބޮޑު ދެ ބާރު ކަމަށްވާ ރަޝިއާ އަދި އެމެރިކާ، ސީރިއާއަށް ސުލްހަ ގެނައުމަށް ޕްލޭނެއް އެކުލަވާލައި އެކަމަށް އެއްބަސްވިތާ 24 ގަޑިއިރު ވެސް ނުވަނީހެވެ.
ސުލްހައިގެ ޕްލޭން
އެމެރިކާ އަދި ރަޝިއާއިން ގައުމުން އެކުލަވާލި މި ޕްލޭންގެ ދެށުން އެންމެ ފުރަތަމަ ކަމަކަށް ސީރިއާގެ ސަރުކާރާ އިދިކޮޅު ފަރާތްތަކުގެ ބާރުގެ ދަށުގައިވާ ތަންތަނަށް ސީރިއާގެ ސިފައިން ދޭ ހަމަލާތައް ހުއްޓާލަން ޖެހެ އެވެ. އަދި، އެއަށްފަހު ރަޝިއާ އަދި އެމެރިކާގެ ސިފައިން ގުޅިގެން ހާއްސަ އޮޕަރޭޝަނެއް ފަށަން ޖެހެ އެވެ. މި އޮޕަރޭޝަނާކީ ސިރިއާގައި ތިބި ޓެރަރިސްޓުން ނެތިކޮށްލާ ފަށާ އޮޕަރޭޝަނެކެވެ. އޮޕަރޭޝަނުގެ އަމާޒަކީ އިސްލާމިކް ސްޓޭޓް (އައިއެސް) އާއި ނުސްރާ ފްރަންޓް ބަލިކޮށްލުމެވެ.
މި ޕްލޭންގެ ދަށުން ދެ ގައުމު ވެސް ބޮޑު މަސްއޫލިއްޔަތާ ހަވާލުވެފަ އެވެ. އެގޮތުން ރަޝީއާއިން ވަނީ ހަމަލާތައް ހުއްޓާލުމަށް ސީރިއާގެ ރައީސް ބައްޝާރުލް އަސަދަށް ބާރުއެޅުމަށް ނިންމާފަ އެވެ. އަދި އެމެރިކާގެ މަސްއޫލިއްޔަތަކީ ސީރިއާގެ ސަރުކާރާއި އިދިކޮޅު ފަރާތްތައް އެއް ގަލަކަށް އެރުވުމެވެ.
ސީރިއާ މައްސަލާގައި ހިޔާލު ތަފާތުވެފައިވާ އެމެރިކާ އަދި ރަޝިއާ ގުޅިގެން ޕްލޭނެއް އެކުލަވާލިއިރު މި ޕްލޭނަށް އަމަލުކުރަން ފަށާނީ މިއަދުން ފެށިގެންނެވެ.
ރަޝިއާ އަދި އެމެރިކާ އެއްގަލަކަށް އަރާފައިމިވަނީ އެމެރިކާގެ ހާރިޖީ ވަޒީރު ޖޯން ކެރީ އާއި ރަޝިޔާގެ ހާރިޖީ ވަޒީރު ސާގީ ލަވްރޯފް ބޭއްވި ދިގު މަޝްވަރާ ބައްދަލުވުމަކަށްފަހު އެވެ.
ރަޝިއާއިން ސީރިއާގެ ރައީސް ބައްޝާރު މަގާމުގައި ބަހައްޓަން ބޭނުންވާއިރު، އެމެރިކާއިން ބޭނުންވަނީ ވެރިކަން ބަދަލުކުރާށެވެ. މަޝްވަރާތަކަށްފަހު ދެ ހާރިޖީ ވަޒީރުން ވެސް ވަނީ މިއީ ސީރިއާގައި ސުލްހަ ގާއިމުކުރުމަށް ލިބޭނެ އެންމެ ރަނގަޅު ފުރުސަތުކަން ފާހަގަކުރައްވާފަ އެވެ.
ފަސް އަހަރުވެފައިވާ ސީރިއާގެ ދާހިލީ ހަނގުރާމާގައި މިހާތަނަށް އެ ގައުމުގެ 290،000 މީހުން މަރުވެފައިވާއިރު އެތައް ބަޔަކު ވަނީ ގައުމު ދޫކޮށް ގޮސްފަ އެވެ. ސަރުކާރާއި އިދިކޮޅު ފަރާތްތަކުގެ މެދު ފެށި ހަމަނުޖެހުމުގެ ތެރެއަށް ޓެރަރިސްޓް ޖަމާއަތްތައް ވަދެ، ސީރިއާގެ ހާލަތު މިހާރު ވަނީ ވަރަށް ބޮޑަށް ގޯސްވެފަ އެވެ.