މުސްލިމުންނަށް އަންނަ އެންމެ އުފާވެރި އެއް މުނާސަބާ ކަމަށްވާ އަޟްހާ އީދު މުސްލިމުންނާ ބައްދަލުކޮށްފައިވާއިރު ދުނިޔޭގެ އެކި ކަންކޮޅުތަކުގެ މުސްލިމުންނަށް މި އުފާ އެންމެ ފުރިހަމައަށް ފާހަގަކުރެވޭ ގޮތް ވަނީ ނުވެފަ އެވެ. މި އަހަރުގެ ހައްޖު ހުތުބާގައި ވެސް ގައުމުތަކުގައި މުސްލިމުން އުޅެމުންދާ ހާލާއި އެމީހުން އެ ހާލަތުން ނެރުމަށް މުޅި އުއްމަތް އެކަތިގަނޑަކަށްވުމަށް ވަނީ ގޮވާލާފަ އެވެ.
އެންމެ ހިތްދަތި ގޮތްތަކެއް ކުރިމަތިވެފައިވާ އެއް ބަޔަކީ ސީރިއާގެ މުސްލިމް ރައްޔިތުންނެވެ. ސީރިއާގެ ދެ އަވަށަކަށް ހައްޖު ދުވަހު ވެސް ވަރުގަދަ ވައިގެ ހަމަލާތަކެއް ވަނީ ދީފަ އެވެ. އެ ހަމަލާތަކުގައި 100 އެއްހާ މީހުން މަރުވިއިރު 23 ކުޑަކުދިން އޭގެ ތެރޭގައި ހިމެނެ އެވެ. ދެ ހަމަލާ ތެރެއިން އެއް ހަމަލާ އަމާޒުވީ ވިއްސިވިހާލިވެފައިވާ ސީރިއާގެ އަވަށެއް ކަމަށްވާ ހަލަބަށެވެ.
ހަލަބަކީ މިހާރު ސީރިއާގައި އެންމެ ހާލަތު ގޯސްވެފައިވާ އަވަށެވެ. އެ އަވަށުގެ އެތައް ބަޔަކު މަރުވެފައިވާއިރު މުޅި އަވަށް ކަހަލަ ގޮތަކަށް ވަނީ ސުންނާފަތިވެފަ އެވެ. ގިނަ އަދަދެއްގެ ހަމަލާތައް އެ އަވަށަށް އަމާޒުވެފަ އެވެ. ހަމަލާއެއް އަމާޒު ވަނީ ކޮން ވަގުތެއްގައި ކޮން ހާލަތެއްގައި ނޭނގޭއިރު ވެސް މަގުމައްޗަށް ނިކުމެ އެ އަވަށުގެ ކުޑަކުދިން ވަނީ އީދު ފާހަގަކޮށްފަ އެވެ.
ހަލަބުގައި ހަރަކާތްތެރިވާ ޑޮކްޓަރުންގެ ގުރޫޕަކުން އާންމުކޮށްފައިވާ ފޮޓޯތަކެއްގައި ހަލަބުގެ ކުޑަކުދިން އީދުގައި ކުޅެ މަޖާކުރާ މަންޒަރު ފެނެ އެވެ. އެއް ބައި ކުދިން ކުޅެ މަޖާކުރަމުން ދިޔައީ ޒަމާންވެފައި އޮތް ބޮމެއް މަތީގަ އެވެ. މިހާރު އެއީ އެ ކުދިންނަށް ކުޅިވަރު ކުޅޭ އެއްޗަކަށް ވަނީވެފަ އެވެ.
މި ފޮޓޯތައް ނެގުމުގައި އިސްކޮށް އުޅުނު އަންދުލް ކައިފް ބުނެފައިވަނީ އޭނާ އީދު ދުވަހު ހަލަބު ތެރޭގައި ހިނގި ކަމަށާއި އެއީ ކުޑަކުދިން އީދު ފާހަގަކުރާ ގޮތް ބެލުމަށް ކަމަށެވެ.
"އަހަރެންނަށް ފެނުނު އާ ހެދުމުގައި ކުދިންތައް އެކުގައި ކުޅެ މަޖާކުރާތަން، ވަރަށް ވެސް އުފާވެރި މަންޒަރެއް އެއީ،" އޭނާ ބުންޏެވެ.
"އެ ކުދިން ދުވެ، ކުޅެ ހީ ސަކަރާތް ގަތް، އަހަރެން އެ ކުދިން ދެކެ ވަރަށް ފަހުރުވެރިވޭ، އެކުދިންގެ ހިތްވަރާއި ކެރުމަށް ސާބަސް ދެން،"
ކައިފް ބުނި ގޮތުގައި މަތިން ހެލިކަޕްޓަރެއް ދިޔަ ނަމަވެސް އެ ކުދިން ބިރުން ދުވެ ނުފިލާ ކަމަށާއި ނަމަވެސް އެ ހެލިކަޕްޓަރަށް ބަލައި، ކުދިން ކުދިންނަށް މަޖާކޮށް ހަދާ ކަމަށެވެ.
ފަސް އަހަރުވެފައިވާ ސީރިއާގެ ދާހިލީ ހަނގުރާމާގައި މިހާތަނަށް އެ ގައުމުގެ 290،000 މީހުން މަރުވެފައިވާއިރު އެތައް ބަޔަކު ވަނީ ގައުމު ދޫކޮށް ގޮސްފަ އެވެ.