މަނީ ލޯންޑަރިންގެ މައްސަލައެއްގައި ސްރީލަންކާގެ މަޖިލީސް މެމްބަރަކު ހައްޔަރުކޮށްފި އެވެ. މި މައްސަލައިގައި ހައްޔަރުކޮށްފައިވާ މަހިންދަނަންދާ އަލުތްގަމާގޭ އަކީ ލަންކާ ރައީސް މައިތުރިޕާލާ ސިރިސޭނާގެ ސަރުކާރާ އިދިކޮޅު ޕާޓީއަށް ނިސްބަތްވާ މެމްބަރެކެވެ.
ކުރީގެ ރައީސް ރާޖަޕަކަސަގެ ވެރިކަމުގައި ސްޕޯޓްސް މިނިސްޓަރުކަން ކުރެއްވާފައިވާ އަލުތްގަމާގެ ހައްޔަރުކުރީ ކޮލަމްބޯއިން 27 މިލިއަން ރުޕީސްގެ ގެއެއް ގައިން މައްސަލައިގަ އެވެ. އެ މައްސަލައިގައި ގެ ގަތުމަށް ބޭނުންކުރި ފައިސާ ހޯދި ގޮތުގެ ތަފްސީލް ހުށަނޭޅުމުންނެވެ. މިމައްސަލަ މިހާރު ލަންކާގެ މެޖިސްޓްރޭޓް ކޯޓެއްގައި ބަލަމުންދާއިރު ހެކިވެރިންނަށް ނުފޫޒު ފޯރުވަން މަސައްކަތް ކޮށްފާނެތީ މައްސަލައިގެ ދެން އޮންނަ އަޑުއެހުމާ ހަމައަށް އޭނާ ބަންދުގައި ބެހެއްޓުމަށް ކޯޓުން ވަނީ އަމުރުކޮށްފަ އެވެ.
އަލުތްގަމާގޭގެ މައްޗަށް މަނީލޯންޑަރިންގެ ދައުވާ އުފުލާފައިވާއިރު އެ މައްސަލައިގެ އަޑުއެހުމެއް އެންމެ އަވަހަށް އޮންނާނީ މިމަހުގެ 22 ވަނަ ދުވަހު އެވެ.