އިންޑިއާގެ ގޯއާގައި މިއަދު ފެށި އޭއެފްސީ އެކްސްޓްރާ އޯޑިނަރީ ކޮންގްރެސްގެ އެޖެންޑާ ފާސް ނުވުމުން ކޮންގްރެސް ނުބޭއްވި ފަސްކޮށްފިއެވެ.
މިއަދު ބާއްވަން ހަމަޖެހިފައިވާ ކޮންގްރެސްއަކީ ފީފާގެ ކައުންސިލަށް އޭއެފްސީއިން އިންތިހާބު ކުރާ ތިން މެންބަރުން ހޮވުމަށް ހަމަޖެހިފައިވާ ކޮންގްރެސްއެކެވެ.
އޭއެފްސީގެ ރައީސް ޝައިހް ސަލްމާން ބިން އިބްރާހިމް އަލް ހަލަފީ އެޖެންޑާއަށް ވޯޓަށް ދެނެނެވުމުން އޭއެފްސީގެ 47 މެންބަރު ގައުމުގެ ތެރެއިން ވޯޓް ދިނުމުގެ ހައްގު ލިބިފައިވާ 44 މެންބަރުންގެ ތެރެއިން 42 މެންބަރު ގައުމުން ވޯޓް ދެއްވީ އެޖެންޑާ ފާސް ކުރަން ނުފެންނަ ކަމަށެވެ. ފެންނަ ކަމަށް ވޯޓް ދެއްވީ ދެ މެންބަރުންނެވެ.
ކޮންގްރެސް ނުބޭއްވުނުކަން އިއުލާން ކުރި ނަމަވެސް އަލުން ކޮންގްރެސް ބާއްވާނެ ތާރީހެއް އޭއެފްސީއިން އާންމުކޮށްފައެއް ނުވެއެވެ.
ތިރީސް ހަތް މެންބަރުން ހިމެނޭ ފީފާގެ ކައުންސިލްގައި މިހާރުވެސް އޭއެފްސީގެ ހަތަރު މެންބަރުން ތަމްސީލް ކުރައްވައެވެ. އެއީ އޭއެފްސީގެ ރައީސް ޝައިހް ސަލްމާން އާއި ޖަޕާނާއި މެލޭޝިއާ އަދި ކުވައިތުގެ މެންބަރެކެވެ.
މިއަދު ހަމަޖެހިފައި އޮތީ އިތުރު ތިންމެންބަރުން އިންތިހާބު ކުރުމަށެވެ. އެތިން މެންބަރު ކަމުގެ މަގާމަށް ހަތް ކެނޑިޑޭޓުން ކުރިމަތިލާފައި ވީނަމަވެސް ފީފާއިން ވަނީ ގަތަރުން ވާދަ ކުރެއްވި ކެނޑިޑޭޓް ސައުދު އަޒީޒު އަލް މޮހަންނަދީގެ ކެނޑިޑެސީ ފީފާގެ އެތިކްސް ކޮމިޓީން ވަނީ ކެންސަލް ކޮށްފައެވެ. މިހާރު އެ މެގާމަށް ވާދަ ކުރައްވަނީ ހަ މެންބަރުންނެވެ.
މި ކޮންގްރެސްގައި ރާއްޖެ ތަމްސީލުކޮށް ވޯޓް ދޭނީ އެފްއޭއެމް މިވަގުތު ހިންގެވުމާ ހަވާލުވެ ހުންނެވި ހުސައިން ޖަވާޒުއެވެ. ކޮންގްރެސްއަށް އޭއެފްސީގެ ޖެނަރަލް ސެކެޓްރީ ވިންޑްސާ ޕައުލް ޖޯން ވަނީ މަގާމު ވަކިކޮށްފައި ހުރި އެފްއޭއެމްގެ ކުރީގެ ޖެނަރަލް ސެކެޓްރީ ބައްސާމް އަދީލް ޖަލީލަށްވެސް ދައުވަތު އަރުވާފައެވެ. މީގެ އިތުރުން އެފްއޭއެމްގެ ކުރީގެ ރައީސް އަހްމަދު ތޯރިގް ވެސް ވަނީ ކޮންގރެސްއަށް ވަޑައިގެންފައެވެ.