ވިސާއަށް ނަގަމުން އައި ފީގެ އަގު ސައުދި އަރަބިއްޔާއިން މިއަދު ބޮޑުކޮށްފި އެވެ. ވިސާގެ އަގު ބޮޑުކުރަން ސައުދީ އަރަބިއްޔާގެ ކެބިނެޓުން ނިންމާފައިވަނީ މިދިޔަ މަހުގެ ތެރޭގަ އެވެ.
ވިސާގެ އަގުގެ އުސޫލަށް ކެބިނެޓުން ގެންނަން ނިންމި ބަދަލަށް މި އަދަދު އަމަލުކުރަން ފަށާފައިވާއިރު، އާ އުސޫލުގައިވާ ގޮތުން ސައުދީއަށް އެތެރެވުމަށް ވިސާ ޖެހުމަށް ފީއެއްގެ ގޮތުގައި 2000 ރިޔާލް ދައްކަން ޖެހޭނެ އެވެ. އެއީ، ގާތްގަނޑަކަށް 533 ޑޮލަރެވެ.
ހައްޖާއި އުމްރާއަށްދާ ފަރާތްތަކުގެ އަތުން ވެސް ވިސާގެ ފީ ނަގަން ހަމަޖައްސާފައިވަނީ އާ އުސޫލުއާ އެއްގޮތަށެވެ. އެހެންނަމަވެސް ފުރަތަމަ ފަހަރަށް ހައްޖަށް ނުވަތަ އުމްރާއަށް އެ ގައުމަށްދާ ފަރާތްތަކަށް މި ފީ ދައްކާކަށް ނުޖެހެ އެވެ. އެއްފަހަރަށްވުރެ ގިނައިންދާނަމަ ވިސާގެ ފީ ދައްކަން ޖެހޭނެ އެވެ.
އާ އުސޫލުގެ ދަށުން ހަ މަސް ދުވަހުގެ މަލްޓިޕްލް އެންޓްރީ ވިސާއަކަށް 3000 ރިޔާލްގެ ފީއެއް ނަގާނެ އެވެ. އަހަރަކަށްނަމަ 5000 ރިޔާލް ދައްކަން ޖެހޭއިރު ދެ އަހަރަށްނަމަ 8000 ރިޔާލް ދައްކަން ޖެހެ އެވެ.
ސައުދީން މި ބަދަލު ގެނެސްފައިމިވަނީ ތެލުގެ އަގުތައް ދަށްވުމާ ގުޅިގެން އެ ގައުމުގެ އިގްތިސޯދު ދަށްވެފައިވަނިކޮށެވެ. އެ ގައުމުން ދަނީ ހަރަދުތައް ކުޑަކޮށް، ސަރުކާރަށް ލިބޭ އާމްދަނީ އިތުރުކުރުމަށް އެހެން ފިޔަވަޅުތައް ވެސް އަޅަމުންނެވެ.
ސައުދީގެ އެއާޕޯޓެއް: ވިސާގެ އަގުތައް ވަނީ ބޮޑުކޮށްފަ