ފޭކް ޓެރަރިސްޓް ވީޑިއޯ އުފެއްދުމަށް އިނގިރޭސި ވިލާތުގެ ޕަބްލިކް ރިލޭޝަން ކުންފުންޏަކަށް އެމެރިކާގެ ދިފާއީ ވުޒާރާ ޕެންޓަގައިން 540 މިލިއަން ޑޮލަރު ހޭދަކޮށްފައިވާ ކަމަށް އިނގިރޭސި ވިލާތުގެ ތަހްގީގީ ނޫސްވެރިކަމުގެ ބިއުރޯއިން ފަޅާއަރުވާލައިފިއެވެ.
އެ ބިއުރޯއިން އާންމު ކުރި ރިޕޯޓްގައި ބުނެފައިވާ ގޮތުން "ބެލް ޕޮޓިންގާ" ކިޔާ ޕީއާރް ފާމަކީ އެމެރިކާގެ އަސްކަރިއްޔާއާ ގުޅިގެން ސިއްރު އޮޕަރޭޝަންތަކުގައި ޕްރޮޕެގެންޑާ ހިންގުމަށް ބައިވެރިވާ ކުންފުންނަކަށް އެހީވެދެދޭ ޕީއާރް ފާމެއް ކަމަށެވެ.
އަދި އެކުންފުނީގެ ކްލައިންޓުންގެ ގޮތުގައި ސައުދީ އަރަބިއްޔާގެ ސަރުކާރުވެސް ހިމެނޭ ކަމަށް ރިޕޯޓްގައި ބުނެފައިވެއެވެ.
ޕޮޓިންގާގެ ހަރަކާތްތައް އިރާގުގައި ފަށާފައިވަނީ އެމެރިކާއިން އިރާގާ ދެކޮޅަށް ކުރި ހަނގުރާމައިގެ ތެރޭގައި އެމެރިކާއިން އިރާގު ހިފުމަށް ފަހުއެވެ.
އެ ރިޕޯޓްގައި ބުނެފައިވާ ގޮތުގެ މަތިން ޕޮޓިންގާގެ ހަރަކާތް އިރާގުގައި ކުރިއަށް ގެންގޮސްފައިވަނީ "ޑިމޮކްރެޓިކް އިންތިހާބު" ޕްރޮމޯޓް ކުރުމުގެ ތެރެއިންނެވެ.
ޕޮޓިންގާގެ ކުރީގެ މުވައްޒިފެއްކަމަށްވާ މާޓިން ވެލްސް އިންވެސްޓިގޭޓިވް ޖާނަލިޒަމް ބިއުރޯއަށް ދީފައިވާ މައުލޫމާތުގައި ޕޮޓިންގާގެ ވިޑިއޯ އެޑިޓަރެއްގެ ގޮތުން އިރާގުގައި އޭނާ މަސައްކަތް ކުރި ގޮތް ވަނީ ކިޔައިދީފައެވެ.
ޕޮޓިންގާއިން އެ މަސައްކަތައް މާޓިން ވެލްސް ހަޔާ ކުރުމަށްފަހު 48 ގަޑިއިރު ތެރޭގައި ބަގުދާދަށް ގޮސް ކޭމްޕް ވިކްޓްރީގައި އޭނާ އެޑިޓް ކުރީ ސިއްރު ސައިކޮލޮޖިކަލް އޮޕަރޭޝަނަކަށް" ބޭނުންވާ ވީޑިއޯއެކެވެ. އެފާމުން އެޑިޓް ކުރި ވީޑިއޯގައި ދައްކަނީ އަލް ގައިދާގެ މަންޒަރުތަކެއް ކަމަށް ދައްކާ ވީޑިއޯއެކެވެ. އަދި އެ ވީޑިއޯ އެޑިޓް ކުރަން ޖެހޭނީވެސް ލޯ ކޮލިޓީ ހާމަކޮށްދޭ ގޮތަށް "އަރަބިކް ޓީވީ" އިން ދައްކާ ނިއުސް ފުޓޭޖެއްގެ ގޮތަގައެވެ.
އަދި އެ ޕީއާރްފާމަށް ހަޔާ ކުރި މުވައްޒަފުން ވަނީ އަލްގައިދާގެ މަންޒަރުތައް ދައްކަން ވީޑިއޯވެސް ކުޅެފައެވެ. އެ ވީޑިއޯތައް ކުޅެފައިވަނީ އެމެރިކާގެ އަސްކަރިއްޔާއިން ހިސޯރު ކުރި ބައެއް ގެތަކުގައެވެ. އަދި ވީޑިއޯ ކުޅޭ މުވައްޒަފުންނަށް ވަނީ އެމީހުންގެ ޓަސްކަތައް ތަފްސީލުކޮށް ކިޔައިދީފައެވެ.
"އަހަރެމެން ޖެހެނީ މިކަހަލަ ވީޑިއޯތަކެއް ހަދަން. އަދި އެފެންނައިރު އެއީ އަލްގައިދާގެ ފްޓޭޖްތަކެއްގެ ގޮތުގައި. އެއީ 10 މިނެޓްގެ ވީޑިއޯއަށް ވާންޖެހޭނެ. އަދި އެ ވީޑިއޯ އެޑިޓް ކުރަން ޖެހޭނީ ވަކި ފައިލް ފޯމެއްޓެގައި އެންކޯޑް ކުރަން ޖެހޭނީ ވަކި ގޮތަކަށް" ބިއުރޯގެ ރިޕޯޓަށް މައުލޫމަތު ދެމުން ވެލްސް ބުނެފައިވެއެވެ.
ވެލްސް ބުނީ އެފަދަ ވީޑިއޯތައް އިރާގްގެ އިތުރުން ސީރިޔާ އަދި އީރާންގެ ސަރަހައްދެއްގައިވެސް ނަގާފައިވާ ކަމަށެވެ.
ޕެންޓަގަންއިންވެސް ވަނީ ބެލް ޕޮޓިންގާއިން، އެ އިދާރާއާއެކު އިންފޮމޭޝަން އޮޕަރޭޝަން ޓާސްކް ފޯސްގެ ދަށުން ކޮންޓެންޓް ތައްޔާރު ކުރުމަށް މަސައްކަތްކޮށްފައިވާ ކަމަށް ބުނެފައެވެ. އަދި އޮޕަރޭޝަން ޓާސްކް ފޯސްގެ ދަށުން ކޮށްފައިވާ މަސައްކަތަކީ "ހަގީގަތެއް" ކަމަށްވެސް ޕެންޓަގަން އިން ބުނެއެވެ. އަދި ކުންފުނިންވަނީ ޖޮއިންޓް ސައިކޮލޮޖިލް އޮޕަރޭޝަންގައިވެސް މަސައްކަތް ކޮށްފައެވެ. ނަމަވެސް ޖޮއިންޓް ފިޒިކަލް އޮޕަރޭޝަނާ ބެހޭގޮތުން ކޮމެންޓެއް ކުރަން ޕެންޓަގަންއިން ވަނީ ދެކޮޅު ހަދާފައެވެ.
އެމެރިކާގެ ގާނުނު ބުނާ ގޮތުން އެމެރިކާގެ ރައްޔިތުންނަށް އަމާޒުކޮށް ސަރުކާރުން ޕްރޮޕެގެންޑާ ހިންގުމަކީ މަނާ ކަމެކެވެ.
އިންވެސްޓިގޭޓިވް ޖާނަލިޒަމް އާންމުކޮށްފައިވާ ޑޮކިޔުމެންޓް ގައިވާ ގޮތުން 2007 ވަނަ އަހަރުން 2011 ވަނަ އަހަރަށް ޕޮޓިންގާއަށް 540 މިލިއަށް ޑޮލަރަު ދީފައެވެ. އަދި 2006 ވަނަ އަހަރު ވަނީ 120 މިލިއަން ޑޮލަރު ދީފައެވެ. އެފާމުން ޕެންޓަގަންއާ އެކު ކުރި މަސައްކަތް ނިންމާލާފައިވަނީ 2011 ވަނަ އަހަރުއެވެ.