އެމެރިކާގެ އިދިކޮޅު ރިޕަބްލިކަން ޕާޓީގެ ފަރާތުން މި އަހަރުގެ ރިއާސީ ރޭހުގައި ވާދަކުރައްވާ ޑޮނަލްޑް ޓްރަމްޕަށް ވޯޓް ދޭން އެ ބޭފުޅާގެ އަމިއްލަ ޕާޓީގެ ގިނަ އިސް މެމްބަރުންތަކެއް ވެސް ދަނީ ދެކޮޅުހަދަމުންނެވެ. ވަކިން ހާއްސަކޮށް އަންހެނުންނަށް އިހްތިރާމްކުޑަކޮށް ޓްރަމްޕް ދައްކަވާފައިވާ ވާހަކަތަކެއް މި ހަފުތާގައި ލީކުވި ހިސާބުން ފެށިގެން ރިޕަބްލިކަން ޕާޓީގެ މަޝްހޫރު ބައެއް ފަރާތްތަކުން ވަނީ ޑިމޮކްރެޓިކް ޕާޓީގެ ކެންޑިޑޭޓް ހިލަރީ އަށް ވޯޓް ދޭން ނިންމަވައި އެކަން އިއުލާނުކުރައްވައިފަ އެވެ.
އެގޮތުން ޓްރަމްޕާ ދެކޮޅަށް ނުކުމެވަޑައިގެންފައިވާ ރިޕަބްލިކަން ޕާޓީގެ މެމްބަރުންގެ ތެރެއިން އެންމެ މަޝްހޫރީ އަދި އެންމެ ގިނައީ ސެނެޓާއި ކޮންގްރެސްގައި ޕާޓީ ތަމްސީލުކުރައްވާ ބޭފުޅުންނެވެ. ސެނެޓުގައި ރިޕަބްލިކަން ޕާޓީ ތަމްސީލުކުރައްވާ 16 މެމްބަރަކު، ޓްރަމްޕަށް ވޯޓް ނުދެއްވާނެކަން އިއުލާނުކުރައްވާފައިވާއިރު އޭގެ ތެރޭގައި ރިޕަބްލިކަން ޕާޓީގެ ކުރީގެ ރިއާސީ ކެންޑިޑޭޓް ޖޯން މެކްކެއިން ވެސް ހިމެނި ވަޑައިގަންނަވަ އެވެ.
ކޮންގްރެސްގައި ރިޕަބްލިކަން ޕާޓީ ތަމްސީލުކުރައްވާ 17 މެމްބަރަކު ވަނީ ޓްރަމްޕަށް ވޯޓް ނުދެއްވާނެކަން އިއުލާނުކުރައްވައިފަ އެވެ.
ރިޕަބްލިކަން ޕާޓީ އަށް ނިސްބަތްވެ ވަޑައިގަންނަވާ އެހެން މަޝްހޫރު މޫނުތަކުގެ ތެރެއިން އެމެރިކާގެ ކުރީގެ ޚާރިޖީ ވަޒީރު ކޮންޑަލީޒާ ރައިސް އާއި ކެލިފޯނިއާގެ ކުރީގެ ގަވަރުނަރު އާނޯލްޑް ޝްވޭޒްނޭގާ އަދި ކުރީގެ ރިއާސީ ކެންޑިޑޭޓް މިޓް ރޮމްނީ އާއި ރިޕަބްލިކަން ޕާޓީގެ ފަރާތުން ރައީސްކަން ކުރެއްވި ބޭފުޅުން ވެސް ހިމެނެ އެވެ.
މީގެ ތެރެއިން ބައެއް ބޭފުޅުން ވަނީ ހިލަރީ އަށް ވޯޓް ދެއްވަން ނިންމަވާފައިވާކަން ވެސް އިއުލާނުކުރައްވައިފަ އެވެ.
ރިޕަބްލިކަން ޕާޓީ އަށް ނިސްބަތްވިޔަސް ޑޮނަލްޑް ޓްރަމްޕަށް ވޯޓް ނުދެއްވާނެކަން އިއުލާނުކުރައްވާފައިވާ އެ ޕާޓީގެ އިސް ބޭފުޅުންތަކެއް.