ރާއްޖޭގައި ފަގީރު ކަމަށް ކަނޑައަޅަނީ ބޮލަކަށް 45 ރުފިޔާ ނުޖެހޭނަމަ ކަމަށް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ސީއީއޯ މުޖުތަބާ އަލީ ޖަލީލް ވިދާޅުވެއްޖެ އެވެ.
ރައްޔިތުން މަޖިލީހުގެ ސަރުކާރު މައްސޫލިއްޔަތު އަދާކުރާ މިންވަރު ބަލާ ކޮމިޓީގައި މުޖުތަބާ މިއަދު ވިދާޅުވީ ފަގީރެއް ގޮތުގައި އެ އިދާރާއިން ބަލަނީ މީހާގެ މުސާރައާ ދިރިއުޅުމުގެ ހާލަތު ހުންނަ ގޮތް އަދި ގޭބިސީގައި ދިރިއުޅޭ މީހުންގެ އަދަދަށް ބަހާލައިގެން ދެވޭ ޕޮއިންޓުތަކެއްގެ ތެރެއިން ކަމަށާއި އެގޮތުން ބޮލަކަށް 45 ރުފިޔާ ނުޖެހޭ ކޮންމެ މީހަކީ ފަގީރެއް ކަމަށް ކަނޑައަޅާފައިވާ ކަމަށެވެ. ނަމަވެސް ދުނިޔޭގެ ފަގީރުން ކަމަށް ކަނޑައަޅާ މިންގަނޑަކީ 29ރ. ކަމަށާއި ރާއްޖެއިން އެ މިންގަނޑު ބަހައްޓާފައި ހުރީ އޭގެ ދެ ގުނައަށް ބަލާފައި ކަމަށް މުޖުތަބާ ވިދާޅުވި އެވެ.
"ވޯލްޑު ބޭންކުން ހެދި ދިރާސާއެއްގައި ރާއްޖޭގެ ހައުސް ހޮލްޑް އެންޑް އެކްސްޕެންޑިޗާ ޑޭޓާއިން ދައްކާ ގޮތުން އާންމު މީހަކަށް ލިބޭ މުސާރައިގެ 2.4 ޕަސަންޓު ހޭދަ ކުރަނީ ކާޑުގެ ބާވަތައް،" މުޖުތަބާ ވިދާޅުވި އެވެ.
އޭނާ އިތުރަށް ވިދާޅުވީ ރާއްޖެއަކީ ބޮޑެތި ފަގީރުން އުޅޭ ގައުމެއް ގޮތުގައި މިން ނުކުރެވޭނެ ކަމަށާއި އޭގެ ބަދަލަށް އެކަކު އަނެކަކާ އަޅާކިޔާއިރު ފަގީރު މީހުން އުޅޭ ގައުމެއް ގޮތުގައި މިން ކުރެވިފައިވާ ކަމަށް އެ ދިރާސާއިން ބުނާ ކަމަށެވެ.
"އެހެންވެ މިއީ ޓެކްނިކަލީ އަޅުގަނޑުމެންކޮށްފައިވާ މަސައްކަތައް. މިއީ ހަމައެކަނި މީހެއްގެ ސިކުންޑިއަށް އައިސްގެން ކުރެވުނު ކަމެއް ނޫން،" މުޖުތަބާ ވިދާޅުވި އެވެ.
ކާޑުގެ ސަބްސިޑީ ހޯދަން ފޯމު ހުށަހަޅަން ފުރުސަތު ހުޅުވާލުމުން އާންމުންގެ އެއްބާރުލުން ލިބެމުންދާކަަށާއި، ސަބްސިޑީ ހޯދަން ދުވާލަކު ސަތޭކައެއްހާ ފޯމް އެންސްޕާ އަށް ހުށަހެޅެމުންދާ ކަމަށް ވެސް އޭނާ ވިދާޅުވި އެވެ.
މުޖުތަބާ ވިދާޅުވީ ސަބްސިޑީއަށް ގެނައި ބަދަލުތަކަކީ ކުއްލި އަކަށް އައި ބަދަލެއް ނޫން ކަމަށާއި އެގޮތުން ކާޑަށް ދޭ ސަބްސިޑީ އަސްލު ހައްގުވާ ފަރާތްތަކުން މިދިޔަ މާޗު 29 އިން ފޯމުތައް ހުށަހަޅަން ފެށި ކަމަށާއި އޭރު ފޯމުލީ މީހުންގެ އެތެއިން ބެލި އިރު 95 ޕަސަންޓު މީހުންނަކީ ކާޑަށް ހައްގުވާ ފަރާތްތައް ކަމަށެވެ.
"ދުނިޔޭގެ ނިސްބަތުން ބަލާއިރު ސަބްސިޑީ އެންމެ ގިނައިންދޭ ގައުމުތަކުގެ ލިސްޓުގެ އެންމެ މަތީގައި ރާއްޖެ އުޅޭ. އެގޮތުން ރާއްޖޭގެ ޖީޑީޕީގެ 3.6 ޕަސަންޓު ސަބްސިޑީއަށް ދޭ. އެހެންވެ މި ކަން ކޮންޓްރޯލް ކުރެވެން ޖެހެނީ. އެ ކޮންޓްރޯލު ކުރެވޭ ވާހަކައަކީ ކުއްލި އަކަށް ގެނެވުނު ވާހަކައެއް ނޫން. މީގެ ކުރިންވެސް ބައެއް ޓީވީ ޕްރޮގްރާމުތަކުގައާއި އެހިނިހެން ގޮތްގޮތަށް މި މައުލޫމާތު ފޯރުކޮށްދީފައިވާނެ،" މުޖުތަބާ ވިދާޅުވި އެވެ.
ސަބްސިޑީއަށް އެދި ހުށަހަޅާ ފޯމްތައް ބެލުމަށް ފަހު ހައްގުވާ ފަރާތްތަކަށް މިމަހުގެ ފަހުކޮޅު ފައިސާ ދޫކުރަން ފަށާނެ ކަމަށް އެންސްޕާއިން ވަނީ ބުނެފަ އެވެ. އެންސްޕާއިން ނިންމާފައި ވަނީ ނިކަމެތިންނަށް ބޮލަކަށް 40 ރުފިޔާގެ ރޭޓުން ސަބްސިޑީ ދިނުމަށެވެ. އެންސްޕާއިން ބުނަނީ މި ވަގުތު ލިބެން ހުރި މައުލޫމާތުތަކަށް ބަލާއިރު އަންދާޒާ ކުރެވެނީ ގޭބިސީއަކަށް ކާޑު ސަބްސިޑީގެ ގޮތުގައި އެންމެ ގިނަވެގެން ލިބޭނީ، 240 ރުފިޔާ ކަމަށެވެ.