ހަލަބް (13 އޮކްޓޯބަރު) - ހަމަލާތައް ހުއްޓުމަކަށް ގެނައުމުގެ މަޝްވަރާތަކަށް އެއްބާރުލުން ދޭން ސީރިއާ އާއި ރަޝިއާ އިން އެއްބަސްވި ނަމަވެސް، ދެ ފަރާތުގެ ވަރުގަދަ ހަމަލާތައް ވަނީ އަލުން ހަލަބު ސިޓީ އަށް އަމާޒުކޮށްފަ އެވެ.
އެގޮތުން، ސީރިއާގެ ދާޚިލީ ހަނގުރާމައިގެ އަސަރު އެންމެ ބޮޑަށް ކޮށްފައިވާ ހަލަބަށް އިއްޔެ އެކަނި ވެސް ރަޝިއާ އާއި ސީރިއާގެ ސިފައިން ވައިގެ މަގުން 50 އަށް ވުރެ ގިނަ ހަމަލާ ދީފައިވެ އެވެ. މި ހަމަލާތަކުގައި އާންމުންގެ 81 މީހަކު މަރުވެފައިވެ އެވެ.
މި ހަމަލާތަކުގައި 87 މީހަކު ޒަހަމްވެ އޭގެ ތެރެއިން ބައެއް މީހުންގެ ހާލު ވަރަށް ސީރިއަސްކަމަށްވެ އެވެ.
ސީރިއާ އާއި ރަޝިއާ ސިފައިން ގުޅިގެން ދޭ ހަމަލާތަކުގައި އާންމުން މަރުވާ މައްސަލަ ހޫނުވެފައިވާއިރު އެމީހުންގެ ގިނަ ހަމަލާތައް އަމާޒުކުރަނީ އާންމުން ގިނައިން ދިރިއުޅޭ ސަރަހައްދުތަކަށް ކަމަށާއި އާންމުންގެ ބާޒާރުތަކާއި ކްލިނިކުތަކަށް ކަމަށް މަންޒަރު ދުށް މީހުންނާ ހަވާލާދީ އަލް ޖަޒީރާ އިން ރިޕޯޓްކޮށްފައިވެ އެވެ.
ހަލަބުގެ ކުރިމަތިލުން ވަރުގަދަވެފައިވާއިރު އެ ސިޓީ މިހާރު އޮތީ ހަނގުރާމަވެރިންނާއި ސީރިއާގެ ސިފައިންގެ މައްޗަށް ދެ ފަޅިވެފަ އެވެ. ހަނގުރާމަވެރިންގެ ބާރުގެ ދަށުގައިވާ ސަރަހައްދުތަކުގައި 275،000 މީހުން ތާށިވެފައި ތިބިއިރު އެމީހުންނަށް އިންސާނީ އެހީ ފޯރުކޮށްދެވޭނެ ގޮތްތަކެއް ނެތެވެ. މި އެންމެނަށް އެހީތެރިކަން ފޯރުކޮށްދިނުމަށް އެ ސަރަހައްދުތަކުގައި ހަރަކާތްތެރިވަމުން ދަނީ 35 ޑޮކްޓަރުންގެ ޓީމަކުންނެވެ.
ސީރިއާގެ ދާޚިލީ ހަނގުރާމައިގެ ތެރޭގައި ތާށިވެފައިވާ އާންމުންގެ މީހަކު މާޔޫސްވެފައި.