މިދޔަ އަހަރު އެކަނިވެސް މާލޭ ލޯކަލް މާރުކޭޓުގައި 70 މިލިއަން ރުފިޔާގެ ދަނޑުވެރިކަމުގެ ވިޔަފާރިކޮށްފައިވާ ކަމަށް ފިޝަރީޒް މިނިސްޓްރީން ބުނެފި އެވެ.
ދަނޑުވެރިންގެ ދުވަހުގެ މުނާސަބަތުގައި އެ މިނިސްޓްރީން މިއަދު ނެރުނު ބަޔާނެއްގައި ބުނީ އަހަރުން އަހަރަށް ދަނޑުވެރިކަމުން ލިބޭ އާމްދަނީ އިތުރުވަމުން އަންނަ ކަމަށެވެ.
ދަނޑުވެރިންގެ ދުވަހުގެ މިއަހަރުގެ ޝިއާރެއްގެ ގޮތުގައި އދ. އިން ކަނޑައަޅާފައިވަނީ "މޫސުމަށް އަންނަ ބަދަލުތަކާއެކު ދަނޑުވެރިކަމަށާއި ކެއުމުގެ ވައްޓަފާޅިއަށްވެސް ބަދަލު ގެންނަންޖެހޭ" މި ޝިއާރެވެ.
ދަނޑުވެރިންގެ ގޮތުގައި ރާއްޖޭގެ އެކިކަންކޮޅުތަކުން 7،000 އަށްވުރެ ގިނަ މީހުން އެ މިނިސްޓްރީގައި ރަޖިސްޓްރީވެފައިވާ ކަމަށާއި މި ދަނޑުވެރިކަމުގެ ދާއިރާ ހަލުވ ކަމާއެކު ކުރިއަރައިގެން އައިސް އާ މިސްރާބަކަށް ދަނޑުވެރިން އަމާޒު ހިފާފައިވާ ކަމަށް އެބަޔާނުގައި ބުނެފައިވެ އެވެ.
މި އަމާޒަށް ވާސިލް ވުމަށް ސަރުކާރުން ވަނީ ދަނޑުވެރިކަމުން ރާއްޖޭގެ ކާނާގެ ރައްކާތެރިކަން އިތުރުކުރުމަށާއި، ދަނޑުވެރިކަމުގެ އުފެއްދުންތެރިކަން އިތުރުކޮށް ރާއްޖޭގެ އިގްތިސާދުގައި ދަނޑުވެރިކަމުން ހިއްސާކުރާ މިންވަރު އިތުރުކުރުމަށް ސިޔާސަތުތަކެއް ކަނޑައަޅާފައި ކަމަށެވެ.
މޫސުމަށް އަންނަ ބަދަލުތަކުގެ ސަބަބުން ދަނޑުވެރިންނަށް ލިބޭ ގެއްލުންތައް ދެމެހެއްޓެނިވި ގޮތެއްގައި ގޮތެއްގައި މާލީ އެހީތެރިކަން ފޯރުކޮށްދިނުމަށް އެލައިޑް އިންޝުއަރެންސް އާ ގުޅިގެން ހާއްސަ އިންޝުއަރެންސް ސްކީމެެއް ތައާރަފްކޮށްފައިވާނެ ކަމަށް މި ބަޔާނުގައި ބުނެފައިވެ އެވެ. މި ސްކީމް ރާވާލާފައިވަނީ ޕްރީމިއަމްގެ ގޮތުގައި ނަގާ ހަ ޕަސަންޓުގެ ތެރެއިން 85 ޕަސަންޓާ ހަމައަށް ސަރުކާރުން ދަނޑުވެރިން އެކި ގިންތިތަކަކަށް ބަހާލައިގެން އެހީތެރިވެދޭ ގޮތަށެވެ.
މި ބަޔާނުގައި އިތުރަށް ބުނެފައިވަނީ ރާއްޖެގައި ދަނޑުވެރިކަމުގެ ސިނާއަތަށްހުރި ގޮންޖެހުންތައް ހައްލުކުރުމަށާއި ދަނޑުވެރިކަން ކުރިއަރުވާ ދަނޑުވެރިންނަށް ދިމާވާ މައްސަލަތައް ހައްލުކޮށް ދިނުމަށް މަަސައްކަތް ކުރަމުން އަންނަ ކަމަށެވެ.