ކުވައިތުގެ އަމީރު ޝައިހް ސަބާހް އަލް އަހްމަދު އަލް ސަބާހް އެ ގައުމުގެ ރައްޔިތުންގެ މަޖިލިސް އުވާލައްވައިފި އެވެ.
ކުވައިތުގެ ގައުމީ ޓީވީ ކުނާއިން އާންމު ކުރި އިއުލާނުގައިވަނީ އަމީރު، މަޖިލިސް އުވާލާފައިވާކަން އިއުލާން ކުރެއްވީ ސަރުކާރުގެ ކުއްލި ބައްދަލުވުމެއްގައި ކަމަށެވެ.
އިތުރު ތަފްސީލެއް ނުދެއްވައި އަމީރު ނެރުއްވި ބަޔާނުގައި ވިދާޅުވެފައިވަނީ "ސަރަހައްދުގައި މިހާރު އޮތް ހާލަތާއި ސަލާމަތީ ގޮތުން ހުރި ގޮންޖެހުންތަކުގެ ސަބަބުން" 50 މެންބަރުން ހިމެނޭ ކުވައިތުގެ ރައްޔިތުންގެ މަޖިލިސް އުވާލާފައިވާ ކަމަށެވެ.
މަޖިލިސް އުވާލިކަން އަމީރު އިއުލާން ކޮށްފައިވަނީ ސަލާމަތީ ކަންތައްތަކާއި އިގްތިސޯދީ މައްސަލަތައް ހައްލު ކުރުމަށް މަޖިލީހުގެ ރައީސް މަރުޒޫގުލް ގާނިމް ކުއްލި އިންތިހާބެއް ބޭއްވުމަށް އިއުލާން ގޮވާލިތާ 24 ގަޑިއިރުވެސް ނުވަނީހެވެ.
މަޖިލީހުގެ މެންބަރު ވަނީ ތެލުގެ އަގު ބޮޑުވަމުންދާ މައްސަލަ އާއި މަލީ އަދި އިދާރީ މައްސަލަތައް ފުނިޖެހިފައިވުމުން އެމައްސަލަތަކާ ބެހޭގޮތުން ސުވާލު ކުރުމަށް ވަޒީރުންނަށް ތިން ފަަހަރެއްގެ މަތިން ދަންނަވާފައެވެ. ނަމަވެސް ވަޒީރުން މަޖިލީަހށް ހާޒިރު ނުވުމުން މަޖިލީހާއި ސަރުކާރާ ދެމެދު ކޯލުންތަކެއް އުޅޭކަން ވަނި ހާމަވެފައެވެ.
ކުވައިތުގެ ގާނުނުތައް ބުނާ ގޮތުން، މަޖިލިސް އުވާލައިފިނަމަ ދެ މަސްދުވަސްތެރޭ އިންތިހާބު ބާއްވަން ޖެހެއެވެ.