އިސްލާމިކް ޔުނިވަސިޓީ، އައިޔޫއެމް އިން ރާއްޖެއަށް ފުރަތަމަ ފަހަރަށް އިސްލާމިކް ފައިނޭސްގެ ދާއިރާއިން ކިޔަވައިދޭ ކޯސްތަކެއް މިއަދު ތައާރަފްކޮށްފި އެވެ. މިއަދު އެ ޔުނިވަސިޓީން ތައާރަފްކޮށްފައިވަނީ އިސްލާމިކް ފައިނޭންސްގެ ޑިޕްލޮމާ އަދި ޑިގްރީ ޕްރޮގްރާމެވެ.
ކޯސްތައް ތައާރަފްކުރުމަށް މިއަދު ޔުނިވަސިޓީގައި ބޭއްވި ރަސްމިއްޔާތު ފައްޓަވައިދެއްވީ އެ ޔުނިވަސިޓީގެ ޑެޕިއުޓީ ވައިސް ޗާންސެލާ އެކަޑެމިކް ހައްވާ ލަތީފް އެވެ.
ފެށޭ 2017 ވަނަ އަހަރަށް ހާއްސަކޮށްގެން މިއަދު އިއުލާންކުރި އެ ކޯސްތަކާ ބެހޭގޮތުން ވާހަކަފުޅު ދައްކަވަމުން ހައްވާ ލަތީފް ވިދާޅުވީ، އިސްލާމިކް ފައިނޭންސް ދަނީ ދުނިޔޭގެ އެކި ކަންކޮޅުތަކެއްގައި ހީވެސް ނުކުރާހާ ހަލުވި މިނެއްގައި ކުރިއަރަމުން ކަމަށެވެ. ރާއްޖެއަށް ބެލި ނަމަވެސް އިސްލާމިކް ފައިނޭންސްގެ ދާއިރާއިން ކިޔަވޭނެ ގޮތްތަކެއް މުހިންމު ވެގެންދަނީ އެހެންވެ ކަމަށާއި މިހާރުވެސް 13 މުއައްސަސާއަކުން އިސްލާމިކް ފައިނޭންސްގެ އުސޫލުތަކަށް އަމަލުކުރަމުންދާއިރު، މި ދާއިރާއިން ކިޔެވުމުގެ ފުރުސަތު ފަހިވެފައި އޮތުން މުހިއްމު ކަމަށެވެ.
ޑިޕްލޮމާ އާއި ޑިގްރީ ކޯސް މިއަދު އިއުލާންކުރި ކަމުގައި ވިޔަސް ވަރަށް އަވަހަށް އިސްލާމިކް ފައިނޭންސްގެ މާސްޓާސް ޕްރޮގްރާމްވެސް ލޯންޗު ކުރާނެ ކަމަށް އެ ޔުނިވަސިޓީން ބުންޏެވެ.
"އިސްލާމިކް ފައިނޭންސް ރާއްޖެއަށް ތައާރަފްކުރުމަކީ ވަރަށް ގިނަ ބަޔަކު އިންތިޒާރުކޮށްގެން ތިބި ކަމެއް. މި ކޯސް ތައާރަފް ކުރުމަށް މެލޭޝިއާގެ ސެންޓްރަލް ބޭންކުގެ ދަށުން ހިންގާ ގްލޯބަލް އިސްލާމިކް ފައިނޭސް އިންސްޓިޓިއުޓް އާއެކު މީގެ ކުރިންވެސް މަޝްވަރާ ކުރެވުނު. އެހެން ނަމަވެސް މިހާޜު މިކަން މިވަނީ ވަރަށް ފުރިހަމަ ކޮށް ފެށެގޮތް ވެފަ. ތިން ލެވެލް ވެސް ދެން ރާއްޖޭގައި ކިޔަވައިދޭނެ،" ހައްވާ ލަތީފް ވިދާޅުވި އެވެ.
އަންނަ އަހަރުގެ ޖެނުއަރީ މަހު އިސްލާމިކް ޔުނިވަސިޓީން އިސްލާމިކް ފައިނޭންސް ކޯސްތައް ފެށުމަށް ނިންމާފައިވާއިރު، އިތުރު 32 ކޯހެއް ވެސް ވަނީ އިއުލާންކޮށްފަ އެވެ. އަދި މުޅިން އަލަށް ނޫސްވެރިކަމުގެ އެޑްވާންސް ސެޓްފިކެޓް ލެވެލްގެ ކޯހަކާއި، ޝަރީއާ އިން ލޯ ގެ އެޑްވާންސް ސެޓްފިކެޓް ލެވެލް ކޯހެއް ވެސް ހިމެނެ އެވެ. އެ ކޯސްތަކަށް ފޯމް ހުށަހެޅުމުގެ ފުރުސަތު ޑިސެމްބަރު މަހުގެ 15 އާ ހަމަޔަށް ހުޅުވައިލާނެ އެވެ.