މަޖީދީމަގު ރަނގަޅު ފެންވަރަކަށް މަރާމާތުކުރަން ފަށާފައިވާ މަސައްކަތުގެ ފުރަތަމަ ބައި ނިންމާލައި ދެވަނަ ފިޔަވަހީގެ މަސައްކަތް ހައުސިން މިނިސްޓްރީން ފަށައިފި އެވެ. ބާރަ ބަޔަކަށް ބަހާލައިގެން ކުރާ މި މަސައްކަތް ހައުސިން އިން ފެށީ މިދިޔަ މަހުގެ 18 ވަނަ ދުވަހު އެވެ.
މަޖީދީ މަގުގެ ދެވަނަ ބައިގެ މަސައްކަތް މިއަދު ފަށާފައިވާއިރު، މަސައްކަތަށް ބަންދު ކޮށްފައިވަނީ، އިއްޒުއްދީން މަގުން ފެށިގެން އަޅިވިލާ މަގާ ހަމަޔަށެވެ. މިނިސްޓްރީން ބުނީ، އެ ބައިގެ މަސައްކަތަށް ހޭދަވާނެ ކަމަށް ލަފާކޮށްފައިވަނީ 21 ދުވަސް ކަމަށެވެ. އެހެންކަމުން މިމަހުގެ 22 ގެ ނިޔަލަށް އެ ބައިގެ މަރާމާތު މަސައްކަތް މުޅިން ނިމޭނެ އެވެ.
މަރާމާތަށް އިއްޒުއްދީން މަގުން ފެށިގެން އަޅިވިލާމަގާ ހަމައަށް ބަންދު ކުރުމާއެކު އެސަރަހައްދުގެ ޓްރެފިކް ފްލޯއަށް ވެސް ވަނީ ބަދަލުތަކެއް ގެނެސްފަ އެވެ.
މަސައްކަތް ކުރިއަށްދާ މުއްދަތުގެ ތެރޭގައި، މަޖީދީމަގު އިއްޒުއްދީން މަގާއި ގުޅުނު ހިސާބާއި، އިއްޒުއްދީންމަގު މުނިޔާ މަގާއި ގުޅުނު ހިސާބާއި، އިއްޒުއްދީން މަގު އިރަމާ ގޯޅިއާ ގުޅުނު ހިސާބާއި، ހަނދުވަރީ ހިނގުން މުނިޔާ މަގާ ގުޅުނު ހިސާބާއި، ހަނދުވަރީ ހިނގުން އިރަމާ ގޯޅި ގުޅުނު ހިސާބުގެ އިތުރަށް ނެދުން ގޯޅިއާއި، ނޫރީ ގޯޅި ވަނީ ބަންދުކޮށްފަ އެވެ.
ހައުސިން މިނިސްޓްރީން ވަނީ މަގު ހަދާ މުއްދަތުގެ ތެރޭގައި ބަންދުކުރާ މަގުތަކުގެ ސަބަބުން އާންމުންނަށް ލިބޭ ދަތިތަކަށް މައާފަށް އެދި އެކަމަށް އާންމުންދޭ އެއްބާރުލުމަށް ޝުކުރު އަދާކޮށްފަ އެވެ. މަޖީދީމަގު ޒަމާނީ ފެންވަރަކަށް ހެދުމަށް ހައުސިންއިން މަސައްކަތް ފަށާފައިވާ އިރު، އެމްއެންޑީއެފާއި އެމްޑަބްލިޔުއެސްސީން އަދި އެމްއާރްޑީސީން ދަނީ މަގުގައި ފަޔާ ހައިޑްރަންޓް ސިސްޓަމްވެސް ހަރުކުރަމުންނެވެ.