މިދިޔަ ހުކުރު ދުވަހު ކ. ހުރާގައި ހިނގި ތުއްތު ކުއްޖަކަށް އަނިޔާވި އެކްސިޑެންޓާ ގުޅިގެން އެ މައްސަލާގައި ހިމެނޭ ޑްރައިވަރު ފުލުހުން ހައްޔަރުކޮށްފި އެވެ.
އެ އެކްސިޑެންޓްގައި އަނިޔާވެފައިވާ ތިން އަހަރުގެ މުހައްމަދު ނާލް މިވަގުތު ވަނީ ފަރުވާއަށް އިންޑިއާއަށް ގެންގޮސްފަ އެވެ. އެކުއްޖާގެ ހާލު ވަރަށް ސީރިއަސް އެވެ.
ފުލުހުން ބުނީ، ނާލްގެ މައްސަލާގައި ހިމެނޭ ޑްރައިވަރު ހައްޔަރު ކުރީ ތަހުގީގަށް ބޭނުންވާ މައުލޫމާތު ހޯދަން ކަމަށެވެ. އުމުރުން ގާތްގަނޑަކަށް 50 އަހަރުގެ އެ ޑްރައިވަރު ހައްޔަރުކޮށް ގޭ ބަންދުގައި ބަހައްޓައިގެން މައްސަލަ ތަހުގީގުކުރަން 10 ދުވަހުގެ މުއްދަތެއް ހުރާ ކޯޓުން ވަނީ ފުލުހުންނަށް ދީފަ އެވެ.
އެ ހާދިސާއާ ގުޅިގެން އަވަސް އަށް މައުލޫމާތު ދެއްވަމުން ހުރާ ކައުންސިލްގެ ރައީސް އީސާ އަހުމަދު ވިދާޅުވީ، އެ ހާދިސާ ހިނގީ، ތިން ފުރޮޅު ލީ ވެހިކަލެއް ދުއްވާ އެރަށުގެ ޑްރައިވަރަކު ކުޑަ ކުދިންތަކެއް ގޮވައިގެން ތަނަކަށް ބޭލުމަށްފަހު ވެހިކަލް ދުއްވާލި ގަޑީގައި އެވަގުތު އެތާނގައި ހުރި ނާލް ވެހިކަލްގައި ކުއްލިއަކަށް ހިފެހެއްޓުމުން ވެއްޓިގެން ދިޔަ ބޮނޑީގައި ވެހިކަލްގެ ކުރީ ފުރޮޅު ދަށުވެގެން ކަމަށެވެ. އޭރު ޑްރައިވަރަށް ކުއްޖާ ނުފެންނަ ކަމަށް އީސަ ވިދާޅުވި އެވެ.