މަޝްހޫރު ލަވަ ކިޔުންތެރިޔާ ހައްވާ އަޝްރާގެ މައްޗަށް މަސްތުވާތަކެތި ޓްރެފިކް ކުރި ކަމުގެ ދައުވާ އުފުލައިފި އެވެ. އަޝްރާގެ އިތުރުން އޭނާގެ ލޯބިވެރިޔާ ގ. ޖޫތީގޭ ހަސަން ނަޒީހްގެ މައްޗަށް ވެސް ވަނީ އެ ދައުވާ އުފުލާފަ އެވެ.
އަޝްރާ އަދި އޭނާގެ ލޯބިވެރިޔާގެ މައްޗަށް އުފުލާފައިވާ ދައުވާގައި ބުނެފައިވަނީ، ފުލުހުންނަށް ލިބުނު މައުލޫމާތަކާ ގުޅިގެން މިދިޔަ އޮގަސްޓް މަހުގެ އަށްވަނަ ދުވަހު 3:30 ހާއިރު ގ. ޖޫތީގޭގެ ކޮޓަރިއެއް ކޯޓު އަމުރެއްގެ ދަށުން ބަލައި ފާސްކޮށްފައިވާ ކަމަށެވެ. އެއީ ނަޒީހު ދިރިއުޅޭ ކޮޓަރިއެވެ. އެ ކޮޓަރިއަށް ފުލުހުން ވަތްއިރު އެ ދެ މީހުން ކޮޓަރީގައި ތިބި ކަމަށް ދައުވާގައިވެ އެވެ. އަދި ކޮޓަރި ބަލައިފާސްކުރީ އެ ދެ މީހުން ފުލުހުންގެ ބެލުމުގެ ދަށަށް ގެންދިޔުމަށްފަހު ކަމަށެވެ.
ދައުވާގައިވާ ގޮތުން މަސްތުވާތަކެތީގެ ބާވަތެއް ކަމަށްވާ އެމްޑީއެމްއޭގެ ޖުމްލަ 39.3948 ގްރާމްގެ ތަކެތި އެ ކޮޓަރިން ވަނީ ފެނިފަ އެވެ. އޭގެތެރޭގައި 74 ގުޅަ ހިމެނޭ ކަމަށެވެ. އޭގެއިތުރުން އެ ކޮޓަރި ބަލައިފާސްކުރަމުން ދަނިކޮށް ނަޒީހް އެނދުގެ ބަލީސް ދަށަށް އެއްޗެއް ލާ ތަން ފެނިގެން އެތަން ބެލިއިރު ވެސް މަސްތުވާތަކެތި ފެނިފައިވާ ކަމަށް ދައުވާގައި ބުނެ އެވެ.
އެ ކޮޓަރިން 1256 އެމެރިކާ ޑޮލަރާއި 78،00 ދިވެހި ރުފިޔާ ފެނިފައިވާ ކަމަށް ވެސް ދައުވާގައިވެ އެވެ. އެ ފައިސާއަކީ މަސްތުވާތަކެތި ވިއްކައިގެން ހޯދި ފައިސާ ކަމަށް ބެލެވޭތީ އެ ފައިސާ ދައުލަތަށް ނަގައިދިނުމަށް ވަނީ އެދިފަ އެވެ.
މިއަދު މި މައްސަލާގެ ފުރަތަމަ އަޑުއެހުން ބާއްވާފައިވާއިރު، އަޝްރާ ވަނީ މައްސަލާގައި ކުރިއަށް ދާން ބޭނުންވަނީ ވަކީލަކާއެކު ކަމަށް ބުނެފަ އެވެ. އެހެންކަމުން ވަކީލަކު އައްޔަންކުރަން ހަތް ދުވަސް ވަނީ ދީފަ އެވެ.
އަޝްރާ އާއި އޭނާގެ ލީބިވެރިޔާގެ ޕާސްޕޯޓް ވެސް ވަނީ ހިފަހައްޓާފަ އެވެ. ޕާސްޕޯޓް ހިފަހައްޓާފައިވަނިކޮށް ބޭރަށް ފުރަން އުޅެފައިވާތީ، ޝަރީއަތް ނިމެންދެން އެ ދެ މީހުން ބަންދުގައި ބަހައްޓައިދިނުމަށް ދައުލަތުން މިއަދު އެދުނެވެ. ނަމަވެސް ޝަރީއަތުން ނިންމީ ބަންދުގައި ބަހައްޓަން ނުޖެހޭ ކަމަށެވެ.