ރަޝިޔާއިން ތުރުކީއަށް ކަނޑައަޅާފައި ހުންނަ އެމްބެސެޑަރު އެންޑްރިއާ ކަރުލޯވް ހަފްލާއެއްގައި ތަގުރީރު ކުރައްވަމުން ގެންދަވަނިކޮށް އޭނާގެ ގަޔަށް ބަޑިޖަހައި މިރޭ އަވަހާރަކޮށްލައިފި އެވެ.
ވެރިރަށް އަންކާރާގައި މިރޭ ބޭއްވި ފޮޓޯ އެކްޒިބިޝަނެއް ޝަރަފުވެރިކޮށްދެއްވައި ތަގުރީރު ކުރައްވަމުން ގެންދަވަނިކޮށް ރަޝިޔާގެ އެމްބެސެޑަރުގެ ހަށިކޮޅަޘސް ބަޑިޖަހާފައި ވަނީ، ތުރުކީގެ ފުލުހުންގެ މީހެއް ކަމަށް ބީބީސީ އިން ބުންޏެވެ. އޭނާ އެވަގުތު ހުރީ ޑިއުޓީގައި ނޫން ކަމަށްވެ އެވެ. އެ ފުލުސް މީހާ ވަނީ އެމްބެސެޑަރުގެ ފުރަގަހުން އޭނާގެ ހަށިކޮޅަށް އަށް ފަހަރު ހަމަލާދިފައި ކަމަށް ރިޕޯޓްތައް ބުނެ އެވެ.
އެ އިވެންޓް ކަވަރު ކުރަމުން ދިޔަ ޓީވީ ސްޓޭޝަންތަކުން ނަގާފައި ހުރި ވީޑިއޯތަކުން ފެންނަ ގޮތުގައި އެމްބެސެޑަރުގެ ހަށިކޮޅަށް ބަޑިޖެހުމަށް ފަހު އޭނާ ވަނީ ސީރިއާގެ ހަލަބަށް ރަޝިޔާގެ ސިފައިން ދިން ހަމަލާތަކާ ދެކޮޅަށް އެތަނުގައި އަޑުއުފުލައިފަ އެވެ. އަދި ބަޑި ޖެހި ވަގުތު އޭނާ ހަރުއަޑުން ބުނީ، "ހަލަބުގެ މަތިން ހަދާން ނުނެތޭނެ! ސީރިއާގެ މަތިން ހަދާން ނުނެތޭނެ! ﷲ އަކުބަރު" މިހެންނެވެ.
ތުރުކީގެ ސިފައިންނާއި އެމްބެސެޑަރަށް ހަމަލާދިން މީހުންނާ ދެމެދު ބަދަލުކުރި ހަމަލާތަކުގައި އެ މީހާ ވަނީ މިހާރު މަރާލައިފަ އެވެ. އެ ހަމަލާގައި އެ އެގްޒިބިޝަންގައި ތިބި ތިން މީހަކު ވަނީ ޒަހަމްވެފަ އެވެ. ހަމަލާދިން މީހާ ވަނީ އެމްބެސެޑަރުގެ ގަޔަށް ބަޑި ޖެހުމަށް ފަހު އެހެން އެންމެން އެތަނުން ނެރެފަ އެވެ. އެ ސަރަހައްދު ތުރުކީ ސިފައިން މިހާރު ވަނީ ބަންދުކޮށްފަ އެވެ.
އެ ހާދިސާޔާ ގުޅިގެން ރަޝިޔާގެ ފޮރިން މިނިސްޓްރީ އިން ބުނީ، ޓެރަރިޒަމަށް ކާމިޔާބެއް ނެތް ކަމަށާއި ޓެރަރިޒަމާ ދެކޮޅަށް ހަނގުރާމަ ކުރުމުގައި އެ ގައުމު ދެމި އޮންނާނެ ކަމަށެވެ. އަދި ބުނީ، މިއަދުގެ ހަމަލާގައި އަވަހާރަވީ ޓެރަރިޒަމާ ދެކޮޅަށް ހިތްވަރު ގަދަ މަސައްކަތްތަކެއް ކޮށްދެއްވި ބޭފުޅެއް ކަމަށެވެ.
"މި ހިތްވަރު ގަދަ ޑިޕްލޮމެޓްގެ ހަދާންތައް މި ގައުމުގައި އަބަދުމެ ދެމި ހުންނާނެ،" ރަޝިޔާގެ ފޮރިން މިނިސްޓްރީ އިން ބުންޏެވެ.
މިއީ ކޮން ބަޔަކު އަޑީގައި ތިބެގެން ދިން ހަމަލާއެއް ކަމެއް އަދި ނޭނގެ އެވެ. އެ ހަމަލާ ދިން އިރު ސީރިއާގެ ރައީސް ބައްސާރުލް އަސަދުގެ ސިފައިން ވަނީ ރަޝިޔާގެ އެހީތެރިކަމާ އެކު ހަލަބު ހިފައިފަ އެވެ.
މި އަމަލު ދުނިޔޭގެ އެކި ގައުމުތަކުން ގެންދަނީ މިހާރު ކުށްވެރި ކުރަމުންނެވެ. އެމްބެސެޑަރު މަރާލި އިރު ރަޝިޔާއިން ހަލަބަށް ދިން ހަމަލާތައް ކުށްވެރިކޮށް ތުރުކީގައި ވަނީ މިފަހުން މުޒާހަރާ ވެސް ކޮށްފަ އެވެ. އަދި ތުރުކީގައި ދޭ މިފަދަ ޓެރަރިސްޓް ހަމަލާތައް މިފަހުން މި ވަނީ ވަރަށް ބޮޑަށް އިތުރުވެފަ އެވެ.