އެމެރިކާގެ ރައީސް ކަމަށް ވަޑައިގަތުމަށް ބޭނުންވާ، އިލެކްޓޯރަލް ކޮލެޖްގެ ވޯޓު ވެސް ޓްރަމްޕް ކާމިޔާބު ކުރައްވައި އެމެރިކާގެ ރައީސްކަން ކަށަވަރު ކުރައްވައިފި އެވެ.
ވާދަވެރި ކެންޑިޑޭޓް ހިލަރީ ކްލިންޓަނަށް ވުރެ އާންމުންގެ ވޯޓު ތިން މިލިއަން މަދުން ލިބިވަޑައިގެން ނަމަވެސް، އިލެކްޓޯރަލް ކޮލެޖްގެ ވޯޓުން މިދިޔަ ނޮވެމްބަރު މަހު ބޭއްވި އެމެރިކާގެ ރިޔާސީ އިންތިހާބު ވެސް ކާމިޔާބު ކުރެއްވި ޓްރަމްޕަށް ރަސްމީކޮށް މަގާމު ކަށަވަރު ކުރުމަށް އިލެކްޓާސްއިންގެ މެދުގައި އިއްޔެ، ނެގި ވޯޓްގައި ޓްރަމްޕް ވަނީ ރައީސްއަކަށް ވެވަޑައިގަތުމަށް ބޭނުންވާ 270 ވޯޓަށް ވުރެ ގިނައިން 304 ވޯޓް ހޯއްދަވައިފަ އެވެ. އޭނާއާ ދެކޮޅަށް ދެ ރިޕަބްލިކަން އިލެކްޓާސް އިން ވޯޓު ދެއްވި ނަމަވެސް، ޓެކްސަސްގެ ހުރިހާ އިލެކްޓާޒް އިންގެ ވޯޓާ އެކު ޓްރަމްޕް ކާމިޔާބު ހޯއްދެވީ އެވެ. އަދި ޑިމޮކްރަޓިކް އިލެކްޓާޒް އިންގެ ތެރެއިން ދެ ބޭފުޅަކު ވަނީ ހިލަރީ ކްލިންޓަންއާ ދެކޮޅަށް ވެސް ވޯޓު ދެއްވައިފަ އެވެ.
އިލެކްޓޯރަލް ކޮލެޖަކީ 538 އިލެކްކްޓާޒް އިންގެ މައްޗަށް އެކުލެވޭ އެމެރިކާގެ ސްޓޭޓްތައް ތަމްސީލް ކުރުމުގެ ގޮތުން ކޮންމެ ޕާޓީއަކުން ވެސް ވޯޓްލުމަށް ހޮވާލާފައި ތިބޭ ހާއްސަ މަންދޫބުން ތަކެކެވެ.
ޓްރަމްޕް ރައީސްކަމަށް ވަޑައިގަތީ ރަޝިޔާގެ ނުފޫޒުތަކުގެ ބޭނުން ކުރައްވައިގެން ކަމަށް އެމެރިކާގެ ސީއައިއޭ އިން ބުނުމާ ގުޅިގެން އިލެކްޓޯރަލް ކޮލެޖްގެ ވޯޓް، ޓްރަމްޕްއަށް ކާމިޔާބުވެދާނެ ކަމާ މެދު އޮތީ ސުވާލު އުފެދިފަ އެވެ. އަދި ޓްރަމްޕް ރައީސްކަމަށް ގެނައުން ހުއްޓުވުމަށް އިލެކްޓާޒްއިން އޭނާއަށް ވޯޓު ނުދިނުމަށް ގޮވާލާ ބޮޑެތި ކެމްޕޭންތަކާއި މުޒާހަރާތައް ދިޔައީ ކުރަމުންނެވެ. އޮބާމާ ރައީސްކަމަށް ގެނައުން ހުއްޓުވުމަށް އޮތް ހުރިހާ ދޮރެއް މިހާރު މި ވަނީ ބަންދުވެފަ އެވެ. އިލެކްޓޯރަލް ކޮލެޖް ވޯޓްގެ ނަތީޖާ ރަސްމީކޮށް އިއުލާން ކުރާނީ އަންނަ މަހުގެ ހައެއްގައި ބާއްވާ ޖޮއިންޓް ކޮންގްރެސްގެ ހާއްސަ ބައްދަލުވުމެއްގަ އެވެ.
އެ ކާމިޔާބީއާ އެކު ޓްރަމަޕް ޓްވީޓް މެދުވެރި ކުރައްވައި ވިދާޅުވީ، އެމެރިކާގެ ރައްޔިތުން އޭނާއަށް ކުރާ ތާއީދަށް ޓަކައި ނުހަނު ޝުކުރު އަދާކުރައްވާ ކަމަށެވެ. އޭނާ ވިދާޅުވީ މިއީ ތާރީހީ ކާމިޔާބެއް ކަމަށާއި އޭނާގެ އަޒުމަކަށް ވާނީ މުޅި އެމެރިކާ އެއްބައިވަންތަ ކުރުވުން ކަމަށެވެ. އަދި އެކަމަށް ޓަކައި މުޅި އެމެރިކާގެ ހުރިހާ ރައްޔިތުންގެ ރައީސްއަކަށް ވާނެ ކަމަށް ވެސް ވިދާޅުވި އެވެ.
"އެންމެން ގުޅިގެން އެމެރިކާގެ ލާބަޔާ މަންފާއަށް މަސައްކަތް ކުރާނަން،" ކާމިޔާބީގެ އުފަލުގައި ޓްރަމްޕް ވިދާޅުވި އެވެ.
ޓްރަމްޕް ރައީސްކަމުގެ ހުވާ ކުރައްވާނީ ޖެނުއަރީ މަހުގެ 20 ވަނަ ދުވަހު އެވެ.