މަސްތުވާތަކެއްޗާ ދެކޮޅަށް ފުލުހުން ހާއްސަ އޮޕަރޭޝަނެއް ފަށައި ތުހުމަތުވާ 300 އަށް ވުރެ ގިނަ މީހުންނާއި ބައެއް ތަނެއް ބަލައި ފާސްކޮށްފި އެވެ.
ފުލުހުން ބުނީ މަސްތުވާތަކެތީގެ ވަބާއިން ސަލާމަތްކޮށް އަމާން ރައްކަތެރި މާހައުލެއް ގާއިމްކުރުމުގެ ގޮތުން މަސްތުވާތަކެއްޗާ ގުޅުންހުރި މައްސަލަތައް މަދުކުރުމަށް ފެށި އޮޕަރޭޝަން މާލެ އާއި ހުޅުމާލެ ހިމެނޭ ގޮތަށް އެކި ސަރަޙައްދުތައް ބަލައި ފާސްކުރުމުގެ އިތުރުން މާޅެ އަތޮޅުގެ އެހެން ރަށްތަކަށް ވެސް އަމާޒު ކުރާނެ ކަމަށާއި އޮޕަރޭޝަންތަކުގައި ކުއްތާ ބޭނުންކުރާއިރު ތުހުމަތުކުރެވޭ މީހުންނާއި ސަރަޙައްދުތައް ވެސް ބަލައި ފާސްކުރާނެ ކަމަށެވެ.
މި އޮޕަރޭޝަނުގައި މިހާތަނަށް ތުހުމަތުކުރެވޭ 369 މީހުންނާއި ހަތަރު ތަނެއް ބަލައިފާސްކޮށްފައިވެއެވެ. ބަލައިފާސްކުރެވުނު ތަންތަނުގެ ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި ބައެއް ތަކެއްޗާއި މަސްތުވާތަކެތިކަމަށް ޝައްކުކުރެވޭ އެއްޗެއްހުރި ޗޮކްލެޓްތަކަކާއި ކަރުދާހާއި ކެނަބިސް އޮށްތަކެއްކަމަށް ބެލެވޭ އޮށްތަކަކާއި ބިޑިތަކެއް ހޯދާފައިވާއިރު މީހަކު ވެސް ހައްޔަރުކޮށްފައި ވެއެވެ.
އޭނާގެ ކޮޓަރި ބަލައިފާސްކުރިއިރު މަސްތުވާތަކެތިކަމަށް ޝައްކުކުރެވޭ އެއްޗެއްހުރި 50 ރަބަރު ޕެކެޓާއި މަސްތުވާތަކެތި ބަންދުކުރުމަށް ބޭނުންކުރާ ބައެއް ތަކެތި ފެނުނެވެ.