ފަލަސްތީނުގެ ބިމުގައި އިޒްރޭލުން ގަވާއިދާ ހިލާފަށް ޔަހޫދީން އާބާދުކުރަމުން ދާ މައްސަލާގައި އދ. ގެ ސަލާމަތީ މަޖިލީހުން ފާސްކޮށްފައިވާ ގަރާރު ވީޓޯކުރަން ލިބުނު ފުރުސަތުގައި އެމެރިކާ އިން އެގޮތަށް އަމަލުކޮށްފައި ނުވާތީ މި މައްސަލާގައި އިޒްރޭލުގެ ޚާރިޖިއްޔާ އަށް އެމެރިކާގެ އިޒްރޭލު ސަފީރު ހާޒިރުކޮށް ހޫނުފެނަށް ވައްޓާލައިފި އެވެ.
އިޒްރޭލުގައި ހުންނަވާ އެމެރިކާގެ ސަފީރު ޑޭން ޝަޕީރޯ ހާޒިރުކޮށް ސުވާލުކޮށްފައި ވަނީ އިޒްރޭލުގެ ޚާރިޖީ ވަޒީރުގެ އޮފީހުގަ އެވެ. އިޒްރޭލުގެ ޚާރިޖީ ވަޒީރަކީ ވެސް ބޮޑުވަޒީރު ބިންޔާމިން ނަތަންޔާހޫކަމުން މި ބައްދަލުވުމުގައި ނަތަންޔާހޫގެ ރުޅިގަނޑުގެ އަސަރު އެމެރިކާގެ ސަފީރަށް އެންމެ ގާތުން ކޮށްފައިވެ އެވެ.
ގަރާރު ފާސްކުރުމަށް ވުރެން އިޒްރޭލު މި މައްސަލާގައި ރުޅިގަދަވެފައި ވަނީ މި ގަރާރެއް އެކުލަވައިލުމުގެ ފަހަތުގައި ވެސް އެމެރިކާ އިން މަސައްކަތްކޮށްފައިވާ ކަމަށް ކުރެވޭ ތުހުމަތާ އެކުގަ އެވެ.
"އަޅުގަނޑުމެންނަށް ލިބިފައިވާ މައުލޫމާތަށް ބަލަނީ ނަމަ އެއްވެސް ޝައްކެއް ނެތް މިންވަރަށް ޔަގީންވާ ކަމަކީ މިއީ ސީދާ ބަރަކް އޮބާމާގެ ސަރުކާރު ފަހަތުގައި އޮވެގެން ކޮށްފައިވާ ކަމެއްކަން. އޭގެ އިބާރާތްތަކާއި ޖުމްލަތަކާއި ރޭވުންތެރިކަމުގެ ފަހަތުގައި ވެސް އޮތީ އެމެރިކާ އަދި ފާސްވުމަށް މަޖުބޫރުކުރީ ވެސް އެމެރިކާ،" ނަތަންޔާހޫ ވިދާޅުވި ކަމަށް ބީބީސީ އިން ރިޕޯޓްކޮށްފައިވެ އެވެ.
ކޯފާ އިސްކުރައްވައި ނަތަންޔާހޫ ވިދާޅުވެފައި ވަނީ ރައްޓެހިން ރައްޓެހިންނަށް ކެހި ނުދޭނެ ކަމަށެވެ.
"ރައްޓެހިން އެމީހުންގެ ރައްޓެހިންގެ މައްސަލަ (އދ) ގެ ސަލާމަތީ މަޖިލީހަކަށް ނުގެންދާނެ،" ނަތަންޔާހޫ ވިދާޅުވެފައިވެ އެވެ.
މި ގަރާރަކީ ފާއިތުވި 40 އަހަރު ތެރޭގައި، ޔަހޫދީ އާބާދުތަކުގެ މައްސަލާގައި އިޒްރޭލާ ދެކޮޅަށް ސަލާމަތީ މަޖިލީހުގައި ފާސްކުރެވުނު ފުރަތަމަ ގަރާރެވެ. މީގެ ކުރިން ކުރި ހުރިހާ މަސައްކަތެއްގައި އެމެރިކާ އިން ވަނީ ގަރާރުތައް ވީޓޯކޮށް ބޭރުކޮށްފަ އެވެ. ނަމަވެސް މިފަހަރުގެ ގަރާރުގެ ވޯޓުގައި ވީޓޯގެ ބާރު ބޭނުންނުކުރާއިރު ވޯޓުގައި އެމީހުން ބައިވެރިއެއް ވެސް ނުވެ އެވެ.
އެމެރިކާގެ ސަރުކާރު، ވަކިން ހާއްސަކޮށް އޮބާމާގެ ސަރުކާރަކީ ޔަހޫދީ އާބާދުތަކުގެ މައްސަލާގައި އިޒްރޭލަށް ވަރަށް ބޮޑަށް ފާޑުކިޔާ ސަރުކާރެކެވެ. މި މައްސަލާގައި އޮބާމާ އާއި ނަތަންޔާހޫއާ ދެމެދު މައްސަލަ ހޫނުވެ ވައިޓް ހައުސްގެ ބައްދަލުވުމުގައި ނޫސްވެރިންގެ ހާޒިރުގައި ބިންޔާމިން ވަރަށް ހުތުރުކޮށް އޮބާމާ ލަދުގަންނުވާލާފައި ވެސްވެ އެވެ.
ޔަހޫދީއާބާދިތަކަށް ދެކޮޅުހަދާ މައްސަލާގައި، އޮބާމާގެ ދެ ވަނަ ދައުރުގެ ކެމްޕޭނުގައި އެ ބޭފުޅާ އަށް ވެރިކަމަށް ނާދެވޭނެ ގޮތް ހެއްދެވުމަށް ސީދާ ނަތަންޔާހޫގެ ނުފޫޒު ވެސް އެމެރިކާގެ އިންތިހާބަށް އެފަހަރު ފޯރުއްވި އެވެ.
ކޮންމެއަކަސް ގަރާރު އެންމެފަހުން ފާސްކުރިޔަސް ނަތަންޔާހޫ ވިދާޅުވެފައި ވަނީ ގަރާރަށް އަމަލުކުރުމެއް ނެތް ކަމަށާއި އެމެރިކާގެ އިންތިހާބީ އާ ރައީސް، ޑޮނަލްޑް ޓްރަމްޕްގެ ދައުރު ފެށެން ދެން މަޑުކޮށްލައްވާނީ ކަމަށެވެ. ވެރިކަމުގެ ދައުރު ފެށުމަށް ފަހު އިޒްރޭލަށް އދ. އިން އުނދަގޫތަކެއް ކުރިމަތިނުވާނެ ކަމުގެ ޔަގީންކަން މިހާރު ވެސް ޓްރަމްޕް ވަނީ ދެއްވައިފަ އެވެ.