ރިއޯޑި ޖެނީރޯ، ނިއުޔޯކްޓައިމްސް - ރީނދޫ ހުން ފެތުރެމުންދާތީ ބްރެޒިލްގެ މިނާސް ގެރިއާސް ސްޓޭޓްގައި ކުއްލި ހާލަތު އިއުލާން ކޮށްފި އެވެ.
މިނާސް ގެރިއާސް ސްޓޭޓްގެ ގަވަރުނަރު ސިއްހީ ކުއްލި ހާލަތު އިއުލާން ކުރެއްވީ އެ ސްޓޭޓްގައި ރީނދޫ ހުން ޖެހިފައިވާ 100 އަށް ވުރެ ގިނަވެ، އެ ހުމުގައި 10 މީހުން މަރުވުމުންނެވެ.
ގެރިއާސް ސްޓޭޓްގެ އިދާރާތަކުން އިއްޔެ ބުނެފައި ވަނީ ރީނދޫ ހުން ކަމަށް ބެލެވޭ 133 މައްސަލައެއް ބަލަމުން އަންނަ ކަމަށެވެ. އަދި އޭގެ ތެރެއިން 20 މީހުންނަށް ޖެހިފައި ވަނީ ރީނދޫ ހުން ކަމަށް ވަރަށް ބޮޑަށް ޔަގީންވާ ކަމަށް ވެސް ބުންޏެވެ.
ސްޓޭޓްގެ ހެލްތު ސެކްރެޓޭރިއަޓްގެ ވެބްސައިޓްގައި އާއްމުކޮށްފައިވާ މައުލޫމާތު ތަކުން އެނގޭ ގޮތުގައި ރީނދޫ ހުން ޖެހިގެން ރިޕޯޓްކުރާ މިންވަރު ފަހަކަށް އައިސް ވަނީ ދެގުނަ ވެފައެވެ. އެގޮތުން މިދިޔަ ބުދަދުވަހާ ހަމައަށް 48 މީހަކަށް ހުންޖެހިގެން ރިޕޯޓްކޮށްފައިވެ އެވެ.
ރީނދޫ ހުމަކީ މަދިރިން ފެތުރޭ ވައިރަލް ހުމެކެވެ. އެ ހުން ޖެހުމުން ބޮލުގައި ރިއްސުމާއި ގައިގައި ރިއްސުމާއި ހޮޑުލުން ފަދަ ކަންތައްތައް ކުރިމަތިވެއެވެ. އަދި ބަލިޖެހޭ މީހުންގެ ތެރެއިން މަދު ބައެއްގެ ބަލި ނުރައްކާތެރި މިންވަރަކަށް ބޮޑު ވެއެވެ. އަދި ނުރައްކާތެރި މިންވަރަކަށް ބަލި ބޮޑުވާ މީހުންގެ ތެރެއިން ދެބައިކުޅަ އެއްބައި މީހުން 10 ދުވަހާއި ހަތް ދުވަހާއި ދެމެދުގެ މުއްދަތެއްގެ ތެރޭގައި މަރުވެއެވެ.