ބަހުރައިނުގައި 2014 ވަނަ އަހަރު އެގައުމުގެ ދެ ފުލުހަކާއި ޔުނައިޓެޑް އަރަބް އެމިރޭޓްސް ( ޔޫއޭއީ)ގެ ފުލުހަކު މަރައިލިކަމުގެ ކުށް ސާބިތުވެފައިވާ ޝިޔައީންގެ ތިން މީހަކަށް ބަހުރައިން ސަރުކާރުން މަރުގެ އަދަބުދީފި އެވެ.
އައްބާސް އައްސަމިއާ 27 އަހަރު، ސާމީ މުޝައިމާ 42 އަހަރު އަދި އުމުރުން 21 އަހަރުގެ އަލީ އަލް ސިންގާސްއަށް މަރުގެ އަދަބު ދިނީ ބަޑިޖަހައިގެންނެވެ. އެތިން މީހުންނަށް މަރުގެ އަދަބު ދިނީ އެމީހުން މެރުމަށް ބަހުރައިންގެ ދަށު ކޯޓްތަކުން ކުރި ހުކުމަށް ސުޕްރީމްކޯޓުން ތާއީދުކުރުމުން ކަމަށް ބަހުރައިންގެ އޮފިޝަލުންނާ ހަވާލާދީ އަލްޖަޒީރާ ބުންޏެވެ.
ޝިޔައީންގެ ތިން މީހުންނަށް މަރުގެ އަދަބު ދިނުމުން ބަހުރައިންނާއި އެގައުމަށް ތާއީދުކުރާ ސައުދީ އަރަބިއްޔާއާއި ޝިޔައީ އީރާނާ ދެމެދު ނުތަނަވަސްކަން އިތުރުވާނެއެވެ. އެ ތިންމީހުންނަށް މަރުގެ އަދަބުދިނުމާއި އެކު އީރާނުން ވަނީ އެކަމަށް ފާޑުކިޔާފައެވެ. އީރާނުގެ ފޮރިން މިނިސްޓްރީން ބުނީ އެ ތިން މީހުންނަށް އަދަބު ތަންފީޒު ކުރުމަކީ ބަހުރައިންގައި އުފެދިފައިވާ ސިޔާސީ މައްސަލައަށް ސުލްހަވެރި ހައްލެއް ހޯދަން ބޭނުންނުވާކަން ދައްކުވައިދޭ ކަމެއް ކަމަށެވެ.
ބަހުރައިން ސަރުކާރާ ދެކޮޅަށް އެގައުމުގެ ބައިމަދު ޝިޔައީން ނުކުތުމުން އީރާނުން ވަނީ ފާޅުގައި އެމީހުންނަށް ތާއީދުކުރަން ފަށާފައެވެ. ނަމަވެސް ބަހުރައިންގެ އިދިކޮޅުފަރާތްތަކާ ގުޅުން އޮންނަ ކަމަކަށް އީރާނުން އެއްބަހެއް ނުވެ އެވެ.