އެމެރިކާ އާއި ޔޫރަޕްގެ ބައެއް ގައުމުތަކުން ގުޅިގެން އުފައްދާފައިވާ ނޯތު އެޓްލާންޓިކް ޓްރީޓީ އޯގަނައިޒޭޝަން (ނޭޓޯ)އަކީ ބޭނުމެއް ނުހިފޭ ތަނެއްގެ ގޮތުގައި ޑޮނަލްޑް ޓްރަމްޕް ސިފަކުރައްވައިފިއެވެ.
ހަތަރު ދުވަސް ފަހުން އެމެރިކާގެ ރައީސްކަމުގެ ހުވާކުރައްވަން ތައްޔާރުވެވަޑައިގެންފައިވާ ޓްރަމްޕް ޓައިމްސް އޮފް ލަންޑަން ނޫހަށް ދެއްވި އިންޓަވިއުއެއްގައި ވިދާޅުވެފައި ވަނީ އެމެރިކާ ހިމާޔަތް ކުރަން ނޭޓޯގެ ގައުމުތަކުން ކުރަން ޖެހޭ ހޭދަ ނުކުރާ ކަމަށެވެ.
"ނޭޓޯއަކީ ބޭނުމެއް ނުހިފޭ ޖަމާއަތެކޭ އަހަރެން ބުނެގެން އަހަރެންނަށް ވަރަށް ބޮޑަށް ފާޑުކިއުން އަމާޒުވި. އެޖަމާއަތަކީ ބޭނުމެއް ނުހިފޭ ޖަމާއަތަކަށް ވަނީ ޓެރަރިޒަމާ މެދު އަޅައިނުލާތީ. ދެދުވަސް ވަންދެން އަހަރެންނަށް ވަރަށް ބޮޑަށް ފާޑުކިއުން އަމާޒުވި. ދެން އެމީހުން ބުނަން ފަށައިފި، ޓްރަމްޕް ބުނީ ތެދެކޭ،" އިންޓަވިއުގައި ޓްރަމްޕް ވިދާޅުވެފައި ވެއެވެ.
އޭނާ ވިދާޅުވެފައި ވަނީ އެމެރިކާ ހިމާޔަތް ކުރުމަށް ނޭޓޯގެ ގައުމުތަކުން ކުރަން ޖެހޭ ހޭދަނުކުރާ ކަމަށާއި އެއީ އެމެރިކާއަށް ކުރާ ވަރަށް ބޮޑު ބޭއިންސާފެއް ކަމަށެވެ.
"ވަރަށް ގިނަ ގައުމުތަކުން އެގައުމުތަކުން ކުރަން ޖެހޭ ހޭދައެއް ނުކުރޭ. އެއީ އަހަރެން ދެކޭ ގޮތުގައި އެމެރިކާއަށް ވަރަށް ބޭއިންސާފު ގޮތެއް. މިހެން ބުންޏަސް ނޭޓޯއަކީ އަހަރެންނަށް ވަރަށް މުހިއްމު ޖަމާއަތެއް. ކުރަން ޖެހޭ ހޭދަކުރާ ފަސް ގައުމު އެބައޮތް. ގިނައެއްނޫން. ފަހެއް،" ޓްރަމްޕް ވިދާޅުވެފައި ވެއެވެ.