ތުރުކީގެ މުދާ އުފުލާ މަތިންދާބޯޓެއް ކިރްގިސްތާނުގެ މަނާސް އެއާޕޯޓްގެ ކަރިއަށް ވެއްޓި 20 މީހުން މަރުވެއްޖެ އެވެ.
އަލްޖަޒީރާ ބުނީ މަތިންދާބޯޓް ވެއްޓުމުގެ ސަބަބުން މަރުވި ގިނަ މީހުންނަކީ އެބޯޓް ވެއްޓުނު ސަރަހައްދުގައިވާ ގެތަކުގެ އަހުލުވެރިން ކަމަށެވެ. ކިރްގިސްތާނުގެ އޮފިޝަލުންނާ ހަވާލާދީ އެ އެޖެންސީން ބުނީ ވެއްޓުނު ބޯޓުގެ ޕައިލެޓާއި ގެތަކުގައި ތިބި 19 މީހެއްގެ ހަށިގަނޑު މިހާރު ފެނިފައިވާ ކަމަށެވެ.
ވެއްޓުނު މަތިންދާބޯޓަކީ ހޮންކޮންގަށާއި ތުރުކީގެ އިސްތަންބޫލަށް ދިއުމަށް ދަތުރުފެށި ބޯޓެކެވެ. އެ ދަތުރުގައި ކިރުގިސްތާނުގެ ވެރިރަށް ބިޝްކެކްގެ ކައިރީގައިވާ މަނާސްގެ އެއާޕޯޓްގައި މަޑުކޮށްލަން އޮތީ ހަމަޖެހިފަ އެވެ. ބޯޓް ވެއްޓުނީ މަނާސް އެއާޕޯޓަށް ޖައްސަން އުޅެނިކޮށް ކަމަށާއި އޭރު އެ ސަރަހައްދުގެ ޖައްވު ވަރަށް ނުސާފު ކަމަށް އެއާޕޯޓްގެ އޮފިޝަލުން ބުންޏެވެ.
ކިރްގިސްތާނުގެ އިމަޖެންސީސް މިނިސްޓްރީގެ ކްރައިސިސް މެނޭޖްމެންޓް ސެންޓަރުގެ ވެރިޔާ މުހައްމަދު ސަވަރޯވް ވިދާޅުވީ ބޯޓް ވެއްޓުމުގެ ސަބަބުން 15 އިމާރާތަކަށް ގެއްލުންވެފައިވާ ކަމަށެވެ. އެ އިމާރާތްތަކުން މަރުވީ 15 މީހުން ކަމަށް ފުރަތަމަ ރިޕޯޓްކޮށްފައި ވިޔަސް 20 މީހުން މަރުވިކަން ފަހުން ވަނީ އެނގިފަ އެވެ. އޭގެ ތެރޭގައި ހަ ކުޑަކުދިންވެސް ހިމެނެ އެވެ.
މަތިންދާބޯޓްތަކާ ބެހޭ މައުލޫމާތު އާއްމުކުރާ ފްލައިޓް ރާޑާ 24 ވެބްސައިޓުން ބުނީ ވެއްޓުނު ބޯޓަކީ ކާގޯ އެއާލައިނެއް ކަމަށްވާ މައިކާގޯ ގެ ބޯއިން 747 މަރުކާގެ ބޯޓެއް ކަމަށެވެ.
ކިރުގިސްތާނަށް ވެއްޓުނު ތުރުކީގެ ކާގޯ މަތިންދާބޯޓް. ފޮޓޯ: ފްލައިޓް ރާޑާ 24