އިޒްރޭލުގެ އަޅުވެތިކަމުގެ ދަށުގައިވާ ފަލަސްތީނުގައި އޮންނަ ފަލަސްތީނު ރައްޔިތުންގެ ސަރުކާރު އެ ގައުމުގެ ވާދަވެރި ދެ ޖަމާއަތް ކަމަށްވާ ފަތަހަ އާއި ހަމާސް އިން ގުޅިގެން ހިންގަން އެ ދެ ޖަމާއަތުން އެއްބަސްވެއްޖެ އެވެ.
އެ ދެ ޖަމާއަތުން އެގޮތަށް އެއްބަސްވީ ރަޝިޔާގެ ވެރިރަށް މޮސްކޯގައި ބޭއްވި ދެ ދުވަހުގެ މަސްވަރާތަކަކަށް ފަހުގައެވެ. އެ ދެ ޖަމާއަތުން އެއްބަސްވެފައި ވަނީ ގައުމުން ބޭރުގައި ތިބި ބައެއް ލީޑަރުން ވެސް ހިމަނައިގެން އާ ނެޝަނަލް ކައުންސިލެއް އެކުލަވައިލުމަށާއި އަލުން މުނިސިޕަލް އިންތިހާބު ވެސް ބޭއްވުމަށެވެ.
ފަތަހައާއި ހަމާސް އިން ބޭއްވި މަޝްވަރާތަކުގައި އިސްލާމިކް ޖިހާދު ނަމަކަށް ކިޔާ ޖަމާއަތަކުން ވެސް ވަނީ ބައިވެރިވެފަ އެވެ.
ފަލަސްތީނު މީހުންގެ ސަރުކާރު އެކުލަވައިލުމަށް އެންމެ ފަހުން އިންތިހާބެއް ބޭއްވީ 2006 ވަނަ އަހަރުއެވެ. އެފަހަރު ޕާލަމެންޓްގެ މެޖޯރިޓީ ހަމާސް އަށް ލިބުމުން ފަތަހަ ޖަމާއަތަށް ނިސްބަތްވާ ރައީސް މަހުމޫދު އައްބާސް ވަނީ ޕާލަމެންޓް އުވާލާފަ އެވެ. އެ ހިސާބުން ދެޖަމާއަތުގެ މެދުގައި ތަޅައިފޮޅުންތައް ހިނގުމަށް ފަހު ހަމާސް އިން ޣައްޒާއަށް ވެރިވެ، އެތަނުގައި ވަކި ސަރުކާރެއް އަންނަނީ ހިންގަމުންނެވެ.
ފަތަހައާއި ހަމާސްގެ ވެރިން ރަޝިޔާއަށް ކުރި ދަތުރުގައި އެގައުމުގެ ފޮރިން މިނިސްޓަރު ސަރްގޭ ލަވްރޯފް އާ ވަނީ ބައްދަލުކޮށްފަ އެވެ. އަދި އިޒްރޭލުގައި ހުންނަ އެމެރިކާގެ އެމްބަސީ ގުދުސަށް ބަދަލު ކުރަން އެމެރިކާގެ ރައީސް ކަމަށް އަލަށް ހަވާލުވާ ޑޮނަލްޑް ޓްރަމްޕް ނިންމާފައިވާ ނިންމުން ބަދަލުވޭތޯ ވާހަކަ ދައްކައި ދިނުމަށް އެދުނެވެ. -- އަލްޖަޒީރާ
ހަމާސް އާއި ފަތަހަ ޖަމާއަތުގެ އޮފިޝަލުން މޮސްކޯގައި މަޝްވަރާކުރަނީ. ފޮޓޯ: އަލްޖަޒީރާ