ޖަރުމަނުގެ ކުރީގެ އަނިޔާވެރި ވެރިޔާ އެޑޮލްފް ހިޓްލަރު ގެންގުޅުނު ފޯނެއް އެމެރިކާގައި ނީލަން ކިޔަން ތައްޔާރުވެއްޖެ އެވެ.
ހިޓްލަރުގެ ނަމާއި ނާޒީ ލޯގޯ ކަނޑާ ނަގާފައިވާ އެ ފޯނު ނީލަން ކިޔާނީ މި ހަފުތާ ބަންދުގަ އެވެ. އެފޯނަކީ ޖަރުމަނުގެ ވެރިރަށް ބާލިންގައި ހިޓްލަރު އެންމެ ފަހުން ދިރިއުޅުނު ބިންގަރާހުގެ ތެރެއިން ފެނުނު ފޯނެކެވެ.
ދެވަނަ ބޮޑު ހަނގުރާމައިގައި އިނގިރޭސިންނާއި އެމީހުންގެ ބައިވެރިންގެ އަތުން ޖަރުމަނު ބަލިވެ، އެގައުމުން އަމާންދިންތާ ކުޑަ ދުވަސްކޮޅެއް ފަހުން އިނގިރޭސި ސިފައިންގެ ބްރިގޭޑިއާ ސާ ރާފް ރޭނާއަށް އެފޯނު ހަދިޔާ ކުރީ ސޯވިއެޓް ސިފައިންނެވެ. އެފޯނު އޭނާއަށް ހަދިޔާކުރީ ހަނދާނީ އެއްޗެއްގެ ގޮތުގަ އެވެ.
އެލެގްޒެންޑާ ހިސްޓޯރިކަލް އޯކްޝަން ހައުސް އިން ބުނެފައި ވަނީ މެރީލޭންޑްގެ ޗެޒަޕީކް ސިޓީގައި ބާއްވާ އެ ނީލަން ފެށޭނީ 100،000 ޑޮލަރުން ކަމަށެވެ.
ބްރިގޭޑިއާ ސާ ރާފްގެ ދަރިކަލުން ނީލަމަށް ލާފައިވާ އެފޯނު 300000 ޑޮލަރަށް ވިއްކައިލެވޭނެ ކަމަށް އެލެގްޒެންޑާ ހިސްޓޯރިކަލް އޯކްޝަން ހައުސްއިން އުއްމީދުކުރެ އެވެ. އެ ތަނުގެ އޮފިޝަލެއް ކަމަށްވާ ބިލް ޕެނަގޮޕުލަސް އެސޯސިއޭޓެޑް ޕްރެސް ( އޭޕީ) އާ ވާހަކަ ދައްކަމުން އެފޯނު ސިފަކޮށްފައި ވަނީ ބޮޑެތި ގެއްލުން ދެނިވި ހަތިޔާރެއް" ގެ ގޮތުގަ އެވެ. އެއީ ހަނގުރާމައިގެ ދުވަސް ވަރު ގިނަ ބައެއްގެ ފުރާނަ ގެއްލުނު އަމުރުތައް ހިޓްލަރު ކޮށްފައި ވަނީ އެ ފޯނު މެދުވެރިކޮށް ކަމަށް ވާތީ އެވެ.