އުތުރުކޮރެއާގެ ލީޑަރުގެ ކިމް ޖޮން އުންގެ އެއްބަފާ ބޭބެ ކިމް ޖޮން ނަމް މަރައިލުމަށް އޭނާއަށް ދީފައި ވަނީ ބަޔޮލޮޖިކަލް ހަތިޔާރެއް ކަމަށްވާ ވީއެކްސް ނާވް އޭޖެންޓްގެ ވަރަށް ވަރުގަދަ ޑޯޒެއް ކަމަށާއި އެހަމަލާއަށް ފަހު 15 ނުވަތަ 20 މިނެޓް ތެރޭގައި އޭނާ މަރުވި ކަމަށް މެލޭޝިއާގެ ހެލްތު މިނިސްޓްރީން ބުނެފި އެވެ.
މެލޭޝިއާގެ ހެލްތު މިނިސްޓަރު ސުބުރަމާނިއަމް ސަތަސިވަމް ވިދާޅުވީ އެހަމަލާއަށް ފަހު ކިމްއަށް (ނާވް އޭޖެންޓްގެ ބާރު ކަނޑާލާ) އެންޓިޑޯޓް ދިން ނަމަވެސް އެއިން އެއްވެސް ނަތީޖާއެއް ނުނެރެވުނީސް ކަމަށެވެ.
ކިމް ޖޮން ނަމް މަރުވީ މީގެ ދެހަފުތާ ކުރިން މެލޭޝިއާގެ ވެރިރަށް ކުއާލަލަމްޕޫރުގެ އެއާޕޯޓްގެ ޗެކިން ހޯލެއްގައި ހުއްޓައި ދެ އަންހެނަކު އޭނާގެ މޫނުގައި އެއްޗެއް އުނގުޅުމުންނެވެ. އެމައްސަލައިގައި ހައްޔަރުކޮޮށްފައިވާ ދެ އަންހެނުން ތަހުގީގުގައި ބުނެފައި ވަނީ އެމީހުން ކިމްގެ މޫނުގައި އެއްޗެއް އުނގުޅީ ޓީވީ ޕްރޭންކް އެއް ހަދަން ބަޔަކު ބުނެގެން ކަމަށެވެ. އަދި އެމީހުން ހީކުރީ އެމީހުންނަށް އުނގުޅުނީ ބޭބީ އޮއިލް ކަމަށް ވެސް އެ ދެ އަންހެނުން ވަނީ ބުނެފައެވެ.
ކިމް މަރައިލިކަމުގެ ތުހުމަތަށް ހައްޔަރުކޮށްފައިވާ ދެ އަންހެނުންނަކީ އިންޑޮނޭޝިއާގެ ރައްޔިތެއްކަމަށްވާ އުމުރުން 25 އަހަރުގެ ސިއްތި އާޝިޔާ ވިއެޓްނާމްގެ ޑޯން ތި ހުއޮން އެވެ. އެ ދެމީހުންގެ އިތުުރުން ވެސް އެމައްސަލައިގައި ބަޔަކު ވަނީ ހައްޔަރުކޮށްފަ އެވެ.
މެލޭޝިއާ ފުލުހުން ބުނެފައި ވަނީ ހަމަލާދިން ދެމީހުން ތަމްރީނުކޮށްފައި ވަނީ ހަމަލާ ދިނުމަށް ފަހު ވަގުތުން އަތް ދޮންނަ ގޮތަށް ކަމަށެވެ. ބައެއް މާހިރުން ދެކޭ ގޮތުގައި އެ ދެ އަންހެނުންގެ އަތަށް ހަމަލާ ރޭވި މީހުން ދީފައި ވާނީ ވީއެކްސްގެ ވިހަގަދަ ނޫން ތަފާތު ދެބާވަތެކެވެ. އަދި ކިމްގެ މޫނުގައި އެ ދެބާވަތް އުނގުޅުމުން ވިހަގަ ގަދަ ބާވަތަކަށް ބަދަލުވެ އޭނާ މަރުވީ ކަމަށް އެހެން ބުނާ މާހިރުން ދެކެ އެވެ.
ކިމް މަރައިލި ހާދިސާއާ ބެހޭ ގޮތުން މެލޭޝިއާ ފުލުހުން ދައްކާ ވާހަކަ އުތުރުކޮރެއާއިން ދޮގު ކުރެއެވެ. މެލޭޝިއާގައި ހުންނަ އުތުރު ކޮރެއާ އެމްބަސީން ކުރިން ނެރުނު ބަޔާނެއްގައި ސުވާލުކޮށްފައި ވަނީ ކިމްގެ މޫނުގައި އުނގުޅީ އެފަދަ ވިހައެއް ނަމަ އެ އުނގުޅި ދެ އަންހެނުން މަރުނުވީ ކީއްވެތޯ އެވެ. ކިމް މަރައިލީ އުތުރުކޮރެއާގެ ލީޑަރު ކިމް ޖޮން އުންގެ އަމުރަށް ކަމަށް އަވަށްޓެރި ދެކުނު ކޮރެއާއިން ތުހުމަތު ކުރެ އެވެ. - ބީބީސީ