ސައުދީ އަރަބިއްޔާގެ ގައުމީ ތެޔޮކުންފުނި އާރަމްކޯ އިން މެލޭޝިއާގައި ހަތް ބިލިޔަން ޑޮލަރު އިންވެސްޓްކުރަން ނިންމައިފި އެވެ.
މެލޭޝިއާގެ ސްޓާ އޮންލައިން ނޫހުން ބުނީ އެގައުމުގެ ގައުމީ ތެޔޮ ކުންފުނި ޕެޓްރޯލިއަމް ނެޝަނަލް ބަރުހާދު( ޕެޓްރޮނާސް) އާއި އާރަމްކޯ ގުޅިގެން ހަތް ބިލިޔަން ޑޮލަރުގެ އަގު ހުރި މަޝްރޫއެއް ހިންގުމަށް އެ ދެކުންފުނީގެ ވެރިން މިއަދު މަޝްވަރާކޮށް އެއްބަސްވުމަކަށް އައިސްފައިވާ ކަމަށެވެ. އެ އެއްބަސްވުމުގައި ރަސްމީކޮށް ސޮއިކުރާނީ މިހާރު މެލޭޝިއާއަށް ވަޑައިގެން އުޅުއްވާ ސައުދީ ރަސްގެފާނު ސަލްމާން ބިން ޢަބުދުލް ޢަޒީޒު އަލް ސައުދާއި މެލޭޝިއާގެ ބޮޑުވަޒީރު ނަޖީބު ރައްޒާޤުގެ ހާޒިރުގައި މިއަދުގެ ވަގުތެއްގައި ކަމަށް އެނޫހުން ބުންޏެވެ.
އެއްބަސްވުމުގެ ދަށުން އާރަމްކޯއިން ހަރަދުކުރާނީ މެލޭޝިއާގެ ޕެންގެރާން ޖޯހޮރް ނަމަކަށް ކިޔާ ސަރަހައްދުގައި ތެޔޮ ސާފްކުރާ ކާރުހާނާއެއް ބިނާކުރުމަށެވެ. އެކުންފުނީގެ މި އިންވެސްޓްމެންޓް ވެގެން ދާނީ މެލޭޝިއާއަށް މިހައިތަނަށް ލިބޭ އެންމެ ބޮޑު ފޮރިން އިންވެސްޓްމެންޓަށެވެ.
"މިއީ އަހަރެމެންގެ ގައުމަށް ލިބޭ ފާހަގަކޮށްލެވޭ ބިޔަ އިންވެސްޓްމަންޓެއް، " ސައުދީ ރަސްގެފާނާއި ބައްދަލުކުރެއްވުމަށް ފަހު ބޭއްވެވި ނޫސްކޮންފަރެންސެއްގައި މެލޭޝިއާގެ ބޮޑުވަޒީރު ނަޖީބު ރައްޒާގު ވިދާޅުވެފައި ވެއެވެ.
އޭނާ ވިދާޅުވެފައި ވަނީ އެ އެއްބަސްވުމާ ހަމައަށް އާދެވުނީ ދެކުންފުނިން ތިން ހަފުތާ ވަންދެން ކުރި މަޝްވަރާތަކަށް ފަހު ކަމަށެވެ.
މެލޭޝިއާގައި ޗައިނާއިން އިންވެސްޓް ކުރުމުން އެގައުމުގެ އިދިކޮޅު ފަރާތްތަކުން ދެއްކި ވާހަކަ ތަކަށް ނަޖީބު ވަނީ ރައްދު ދެއްވާފައެވެ. އަދި ވިދާޅުވެފައި ވަނީ ސައުދީގެ އިންވެސްޓްމެންޓަކީ ގައުމަށް ފައިދާ ހުރި އިންވެސްޓްމެންޓަކަށް ވާނެ ކަަމަށެވެ.
" ޗައިނާއިން އިންވެސްޓްމެންޓެއް ލިބުމުން ، އެގައުމަށް އަހަރެމެންގެ ސިޔާދަތު ވިއްކައިލި ކަމުގެ ތުހުމަތު އެޅުނު. ކަންތައްތައް އޮޅުވައިލާ މީހުން ސައުދީގެ މި އިންވެސްޓްމެންޓާ މެދު ބުނާނީ ކީކޭ ބާއޭ ހިތަށް އަރާ. މިއީ އަހަރެމެންގެ ސިޔާދަތާ މެދު ސުވާލު އުފެދޭ ކަމެއް ނޫން. މިއީ އިންވެސްޓްމެންޓެއް،" ސައުދީ ޝާހީ ޚާންދާނާ ގާތް ގުޅުމެއް އޮންނަ ނަޖީބު ވިދާޅުވެފައި ވެއެވެ.
އޭޝިއާގެ ގައުމުތަކަށް ކުރައްވާ އެއްމަސްދުވަހުގެ ދަތުރުފުޅެއްގައި ސައުދީ ރަސްގެފާނު ސަލްމާން މެލޭޝިއާައަށް ވަޑައިގެންނެވީ އާދީއްތަ ދުވަހުއެވެ. ރަސްގެފާނުގެ ދަތުރުފުޅުގައި އިންޑޮނޭޝިއާ، ޗައިނާ ޖަޕާނު އަދި ރާއްޖެއަށް ވެސް ވަޑައިގަންނަވާނެއެވެ.