ކާނާ ނުލިބިގެން ޑަސްބިންތައް ހާވާ މީހުންނަށް ކާބޯތަކެތި ފަސޭހައިން ވަކިވާ ގޮތަށް ކުނިކޮތަޅުގައި ލޭބަލް ޖަހަން ވެނެޒުއޭލާގެ ފާދިރީއަކު ގޮވާލައިފި އެވެ.
ވެނެޒުއޭލާގެ ނުފޫޒު ގަދަ އެ ފާދިރީ އަދި ނޫސްވެރިޔާ ހޯސޭ ޕާލްމާރް މިކަމަށް ގޮވައިލީ އެ ގައުމުގައި އެކަށީގެންވާ ވަރަށް ކާނާ ނުލިބުމުގެ މައްސަލަ ބޮޑުވެގެންނެވެ. ކާނާ އާއި އަސާސީ އެހެން ބައެއް ތަކެތި މަދުވުމުގެ މައްސަލަ އެ ގައުމަށް ކުރިމަތިވެފައިވާތާ މަސްތަކެއް ވެއްޖެއެވެ.
ފެބްރުއަރީ މަހު ކުރި ސާވޭއަކުން ދައްކާ ގޮތުގައި އެކަށީގެންވާ ވަރަށް ކާން ނުލިބުމުގެ ސަބަބުން ވެނެޒުއޭލާގެ އާބާދީގެ ހަތަރު ބައި ކުޅަ ތިން ބައި މީހުންގެ ބަރުދަން ވަނީ ލުއިވެފަ އެވެ. އެގޮތުން އެވްރެޖްކޮށް މީހެއްގެ ގައިން ލުއިވެފައި ވަނީ 8.6 ކިލޯއެވެ.
ކާނާ ހޯދުމަށް ވެނެޒުއޭލާ މީހުން ހަމަ އެކަނި ހާވަނީ ޑަސްބިންތަކެއް ނޫނެވެ. ޒޫލިއާ ޔުނިވާސިޓީގެ ބަޔޮލޮޖިސްޓުންނާއި ދަރިވަރުންނާ ހަވާލާދީ މިއާމީ ހެރަލްޑް ނޫހުން ބުނެފައި ވަނީ އެ ގައުމުގައި ހިމާޔަތްކޮށްފައިވާ ފްލެމިންގޯ ފަދަ ދޫނިތައް ވެސް މީހުން ހިފައި އޭގެ މަސް ދަނީ ކަމުންނެވެ.-- ބީބީސީ