. އުރުދުން ގައި 15 މީހަކަށް މިއަދު މަރުގެ އަދަބު ދީފިއެވެ.
އުރުދުންގެ އިންފޮމޭޝަން މިނިސްޓްރީއާ ހަވާލާދީ ބީބީސީ ބުނީ މަރުގެ އަދަބު ދިން 15 މީހުންގެ ތެރެއިން 10 މީހުންނަކީ ޓެރަރިޒަމްގެ ކުށް ސާބިތުވެފައިވާ މީހުން ކަމަށާއި އަނެއް ފަސް މީހުންގެ މައްޗަށް ސާވިތުވެފައި ވަނީ މީހުން މެރުމާއި އަންހެނުންގެ އިތްފަތްފޭރުން ފަދަ ކުށްތައް ކަމަށެވެ. އެމީހުންނަށް މަރުގެ އަދަބު ދިނީ ވެރިރަށް އައްމާނުގެ ދެކުނުގައިވާ ޖަލެއްގައި ރޭ ފަތިހުއެވެ.
އުރުދުންގައި އެ 15 މީހުން ދަންޖައްސައި މެރުމަކީ އެގައުމުން މަރުގެ އަދަބު ތަންފީޒުކުރީ މަރުގެ އަދަބު ތަންފީޒުކުރުން އެގައުމުގައި ހުއްޓާލާފައިވާތާ އަހަރު ތަކެއް ފަހުންނެވެ. އެގައުމުގައި މަރުގެ އަދަބު ދިނުން ހުއްޓާލާފައި ވަނީ 2006 ވަނަ އަހަރުއެވެ. މަރުގެ އަދަބު ދިނުން ހުއްޓާލާފައި ބޭއްވުމަށް އެގައުމުން 2014 ވަނަ އަހަރު ވެސް އަލުން ނިންމިއެވެ.
މަރުގެ އަދަބު ދިން މީހުންގެ ތެރެއިން ޓެރަރިޒަމްގެ ކުށް ސާބިތުވެގެން އަދަބުދިން މީހުންނަކީ އިރާގުގެ ވެރިރަށް ބަޣުދާދުގައި ހުންނަ އުރުދުން އެމްބަސީއަށް 2003 ވަނަ އަހަރު ދިން ހަމަލާގެ ކުށް ސާބިތުވި ބަޔަކާއި އައްމާނުގައި ހުންނަ ރޯމަން އެންފިތިއޭޓަރުގައި ތިބި ޓޫރިސްޓުން ތަކަކަށް 2006 ވަނަ އަހަރު ހަމަލާދިން ބަޔަކާއި ބަގާ ރެފިއުޖީ ކޭމްޕްގައި އިންޓެލިޖެންސް އޮފިސަރުންތަކަކަށް މިދިޔަ އަހަރު ހަމަލާ ދިން ބައެކެވެ.
ބަޣުދާދުގައި ހުރި އުރުދުންގެ އެމްބަސީ 2003 ވަނަ އަހަރު ދިން ބޮމުގެ ހަމަލާގައި ހަލާކުވެފައި. މަރުގެ އަދަބު ދިން މީހުންގެ ތެރޭގައި އެކަމުގައި ބައިވެރިވިމީހުން ހިމެނޭ. ފޮޓޯ: ބީބީސީ