އުތުރުކޮރެއާގެ ލީޑަރުގެ ބޭބެ މަރައިލި މައްސަލައިގައި ގުޅުން އުފެދިފައިވާ އަރައިރުން ހޫނުވެ، އުތުރުކޮރެއާގައި ތިބި މެލޭޝިއާ މީހުން އެގައުމުން ފުރުން އުތުރުކޮރެއާ ސަރުކާރުން މަނާކޮށްފި އެވެ.
އުތުރުކޮރެއާ ސަރުކާރުގެ ރަސްމީ ނޫސް އެޖެންސީ ކޭސީއެންއޭ އިން ބުނީ މެލޭޝިއާ މީހުން ފުރުން މަނާކޮށްފައި ވަނީ " މެލޭޝިއާގައި ހިނގި ހާދިސާ"ގެ މައްސަލަ ހައްލުވަންދެން ކަމަށެވެ.
އުތުރުކޮރެއާއާއި މެލޭޝިއާއާއި ދެމެދު ގުޅުން ގޯސްވީ އުތުރުކޮރެއާގެ ލީޑަރު ކިމް ޖޮން އުންގެ އެއްބަފާ ބޭބެ ކިމް ޖޮން ނަމް މެލޭޝިއާގެ ވެރިރަށް ކުއާލަލަމްޕޫރުގެ އެއާޕޯޓްގައި ހުއްޓައި މަރައިލި ހާދިސާއާއި ގުޅިގެންނެވެ. ނަމަވެސް އޭނާ މަރައިލީ އުތުރުކޮރެއާ ސަރުކާރުން ރާވައިގެން ކަމަށް މެލޭޝިއާއިން ސީދާކޮށް ބުނެފައެއް ނުވެއެވެ . ނަމަވެސް އެހާދިސާއާއި ގުޅިގެން އުތުރުކޮރެއާގެ ބައެއް ޑިޕްލޮމޭޓުން ހައްޔަރު ކުރުމުގެ އަމުރު މެލޭޝިއާއިން ވަނީ ނެރެފައެވެ. އަދި މެލޭޝިއާގައި ހުރި އުތުރުކޮރެއާގެ ސަފީރު އެގައުމުން ފުރުމަށް ވެސް އެގައުމުން ވަނީ އަންގާފައެވެ.
ކިމްޖޮން ނަމް މަރާލާފައި ވަނީ ވިހަ ގަދަ ނާވް އޭޖެންޓް ބޭނުންކޮށްގެން ކަމަށް މެލޭޝިއާއިން ކުރި ތަހުގީގުން އެނގުމުން އުތުުރުކޮރެއާއިން ވަނީ އެކަން ވެސް ދޮގުކޮށްފައެވެ. ކިމް މަރައިލުމުގެ ތުހުމަތަށް ހައްޔަރުކޮށްފައި ވަނީ އިންޑޮނީޝިއާ އަންހެނަކާއި ވިއެޓްނާމް އަންހެނެކެެވެ. އެމައްސަލައިގައި ހައްޔަރުކުރި އުތުރުކޮރެއާ މީހާ ވަނީ އޭނާއާ ދެކޮޅަށް އެކަށީގެންވާ ހެކި ނެތިގެން ދޫކޮށްލާފައެވެ.
މެލޭޝިއާއަކީ އުތުރުކޮރެއާއާ ޑިޕްލޮމެޓިކް ގުޅުން ބާއްވާ މަދު ގައުމުތަކުގެ ތެރެއިން ގައުމެކެވެ.