ކާމިޔާބީއަކީ، ދިރިއުޅުމުގެ ވައްޓަފާޅި އެކެވެ. ދިރިއުޅުމުގައި ކާމިޔާބު މީހަކަށް ވުމަކީ، ކޮންމެ މީހަކު ވެސް ދެކޭނެ ހުވަފެނެކެވެ. އެހެނެއް ކަމަކު، ރޭގަނޑު ނިދާލުމަށްފަހު ޖެހިގެން އަންނަ ދުވަހު ހެނދުނު ހޭލާއިރު ކާމިޔާބު މީހަކަށް އެކަކު ވެސް ނުވާނެ އެވެ. ކާމިޔާބު މީހަކަށް ވުމަށްޓަކައި ކޮންމެ މީހަކު ވެސް ބުރަ މަސައްކަތްތަކެއް ކުރަން ޖެހޭނެ އެވެ. ކާމިޔާބީ އެދޭ މީހާ، އިސްކަންދޭންޖެހޭ ބައެއް ކަންކަން ވެސް ހުރެ އެވެ.
ފުރަތަމަ ކަމަކަށް، ކާމިޔާބު ވުމަށް އެދޭ މީހާ، އެމީހާގެ ވިސްނުން ސިދާ ކުރަން ޖެހެއެވެ. ކާމިޔާބީ އެދޭ މީހާ ދިރިއުޅުމާ މެދު ޕޮޒިޓިވްކޮށް ވިސްނުމެއް ގެންގުޅުމަކީ ވަރަށް މުހިންމު ކަމެކެވެ. ދިރިއުޅުމުގައި ތަފާތު ކަންތައްތަކާ ކުރިމަތިވާނެ ކަން ގަބޫލުކޮށް، ފަހަތް ބެލުމެއް ނެތި އަބަދުވެސް ކުރިޔަށް ހިނގުމަކީ މުހިންމު ކަމެކެވެ. މިކަމަށްޓަކައި އެމީހަކަށް ސަޕޯޓިވް މީހުންނާއެކު ގިނަ ވަގުތު ހޭދަކުރުމަށް ހާއްސަ ސަމާލުކަމެއް ދޭނެޖެހެ އެވެ.
ދެވަނަކަމަށް، ދިރިއުޅުމުގައި ހާސިލް ކުރަން ބޭނުންވާ ލަނޑުދަނޑިއެއް ކަނޑައަޅާށެވެ. ދިރިއުޅުމަކީ، ތަފާތު ކަންކަން ތަޖުރިބާ ކުރުމަށް އޮތް ދަތުރެއްކަން ހަނދާންކޮށް، ކަނޑައަޅާ ލަނޑުދަނޑިއަކީ، އެދަތުރުގެ ފޮނިމޭވާ ކަމުގައި ގަބޫލުކުރާށެވެ.
މީގެ އިތުރުން، މީހާގެ ސަމާލުކަން ގެއްލޭ ކަންތައްތަކުން ދުރުވުމަކީ ވެސް، ކާމިޔާބީއަށް ވާސިލްވުމަށް މަސައްކަތް ކުރާ މިހާއަށް ވަރަށް މުހިންމު ކަމެކެވެ. ހާސިލް ކުރަން ބޭނުންވާ ލަނޑުދަނޑިއެއް ކަނޑައަޅާފައިވާ ހިނދު، އެކަން ހާސިލްކުރުމުގައި ކުރިމަތި ވެދާނެ ގޮޖެހުންތަކުން އަރައިގަތުމަށް ފަސް ޖެހުމަކާ ނުލާ މަސައްކަތް ކުރާށެވެ.
ކަންކަން ވީހާ ވެސް ފަސޭހަކޮށް ކުރުމަކީ ކާމިޔާބު ވުމަށް އޮތް އަނެއް މަގެވެ. ކަންތައްތައް މާ ބޮޑު ކަމަކަށް ހަދައި ބުރަ ކަމަކަށް އެކަންތައް ހަދާ ކަމުގައިވާނަމަ، މީހާގެ މަސައްކަތަށް ލަސްކަމެއް އައިސް، އެކަން ނުކުރެވިދާނެ އޭ ހީވުމަކީ ވެސް އެކަށީގެންވާ ކަމެކެވެ. ކަންތައް ނުކުރުމަށް ބަހަނާ ދެއްކުމުގެ ބަދަލުގައި، ކަންތައް ކުރުމުގެ ފަސޭހަގޮތަކި ކޮބާތޯ ބަލައި އެގޮތަށް މަސައްކަތްތައް ބައްޓަން ކުރަން ޖެހެ އެވެ.
އެންމެ ފަހު ކަމެއްގެ ގޮތުގައި، އަމިއްލަ ނަފްސުގެ އަގު ވަޒަން ކުރާށެވެ. އެމީހަކު ދިރިއުޅުމުގައި ހާސިލް ކުރާ ކަންތައްތަކަށް އަމިއްލަ ނަފްސަށް ތައުރީފުކޮށް، ކޮންމެ ވެސް އަގެއް ހުރި އެއްޗެއް އަމިއްލަ ނަފްސަށް ހަދިޔާ ކުރާށެވެ. ކަންކަމުގެ އަގު ވަޒަން ކުރުމަކި، ކާމިޔާބީގެ އެއް ސިއްރެވެ.