މިދިޔަ މަހުގެ ފަހުކޮޅު ދަރުބާރުގެ ކައިރީ ވަޅި ޖަހައި މަރާލި، ޖައިލަމް ޝާކިރުގެ މަރުގެ މައްސަލަ ތަހުގީގުކޮށް ނިންމައި ދައުވާ ކުރަން ޕީޖީ އޮފީހަށް ފޮނުވައިފި އެވެ.
އަވަސް އަށް އެނގިފައިވާ ގޮތުގައި ދައުވާ ކުރަން ފޮނުވާފައި ވަނީ، ތިން މީހެއްގެ މައްޗަށެވެ. އަދި އެ މައްސަލަ ފޮނުވީ އިއްޔެގެ ވަގުތެއްގަ އެވެ.
އެ އަނިޔާވެރި މަރާ ގުޅިގެން ގއ. ވިލިނގިލި، ފިޔަޖަހާގެ، މުހައްމަދު ހުމައިދު 18، ހޯދަން ފުލުހުން މީގެ ކުރިން އިއުލާނެއް ވެސް ކުރި އެވެ.
އޭނާގެ ގަޔަށް ވަޅި ހަރާފައި ވަނީ ހ. ހަންޑްރެޑް ފްލާވާސް ދޮރުމަތީގައި ހުރި ގޮނޑިއެއްގައި އިށީނދެގެން އިންދާ ބާރަށް ދުއްވާފައި އެ މަގަށް ސައިކަލުތަކެއްގައި ވަން ހަތަރު މީހަކު ކަމަށް ވެއެވެ. އޭޑީކޭ އިން ބުނެފައި ވަނީ ޖައިލަމް އެ ހޮސްޕިޓަކަށް ގެނައި އިރު، ވެސް ވަނީ މަރުވެފައި ކަމަށެވެ.
ޖައިލަމްގެ ކަރަށް ވަޅި ހަރައި ކަރުގެ ނާރުތައް ބުރި ކޮށްލާފައިވުމުގެ ސަބަބުން އޭނާ މަރުވީ ބޮލަށް ލޭ ފޮނުވައިދިނުން ހުއްޓުމާ ގުޅިގެން ކަމަށް އޭޑީކޭ އިން ވަނީ ބުނެފަ އެވެ. އެ ހޮސްޕިޓަލުން ބުނެފައިވާ ގޮތުގައި ޖައިލަމްގެ ފުރަގަހަށާއި ބަނޑަށް ވެސް ބޮޑެތި ޒަހަމް ތަކެއް ލިބިފައިވެ އެވެ. އެގޮތުން ފުރަގަހަށް ދިން ހަމަލާގައި ފުއްޕާމޭ އެއްކޮށް އޮތީ ހަލާކުވެފަ އެވެ. ޖައިލަމްގެ އަތުގެ ހަތަރު ތަނަކަށާއި އިތުރު ތަންތަނަށް ވެސް ވަޅިހަރާފައި ހުރި ކަމަށް ހޮސްޕިޓަކުން ބުންޏެވެ.