ކްރިމިނަލް ކޯޓްގެ އިސްގާޒީ ހައްޔަރުކުރުމަކީ، ބޮޑު ކުށެއް ކަމަށާއި އެކަމަށް އަދަބު ލިބެން ޖެހޭ ކަމަށް ބޭރުގެ ފަރާތްތަކުން ވެސް ގަބޫލު ކުރާ ކަމަށް ސްރީލަންކާގައި ހުންނަވާ ރާއްޖޭގެ ސަފީރު ޒާހިޔާ ޒަރީރު ވިދާޅުވެއްޖެ އެވެ.
"އަވަސް"އަށް ދެއްވި ހާއްސަ އިންޓަވިއުއެއްގައި ޒާހިޔާ ވިދާޅުވި ގޮތުގައި ސްރީލަންކާގައި ތިއްބެވި ހުރިހާ ޑިޕްލޮމެޓުން ވެސް ގަބޫލު ކުރަނީ ކުރީގެ ރައީސް މުހައްމަދު ނަޝީދު އަބްދުﷲ ގާޒީ ހައްޔަރު ކުރުމަކީ، ގާނޫނު އަސާސީގެ ބޭރުން ހިންގި ކުށެއް ކަމަށެވެ. އެގޮތުން ލަންކާގައި ހުންނަވާ އިނގިރޭސި ސަފީރު ވެސް ނަޝީދު އެފަދަ ބޮޑު ކުށެއް ކުރެއްވީތީ ހައިރާންކަމެއް ލިބުނު ކަމަށް ވިދާޅުވެ އެ ވާހަކަތައް ދެއްކެވި ކަމަށް ޒާހިޔާ ވިދާޅުވި އެވެ. އޭނާ ވިދާޅުވީ ހުރިހާ ޑިޕްލޮމެންޓްގެ ހިޔާލަކީ ވެސް އަބްދުﷲ ގާޒީ ގާނޫނުގެ ތެރެއިން ހައްޔަރުކުރެވެން އޮއްވައި އެ ނޫން ގޮތަކަށް އެކަން ކުރެއްވީ ކީއްވެ ކަމާ މެދު ސުވާލުތައް އުފައްދާ ކަމަށެވެ.
"ކަންބޮޑުވުންތަކާއި ސުވާލު އުފައްދާފައި ވެސް ބޭރުގެ ފަރާތްތައްވެސް އެއްބަސްވޭ އެއީ އަންލޯފްލް އެރެސްޓެއް ކަމަށް. ނަޝީދު ކުރައްވާފައި ވަނީ ކުށެއް ނޫން ކަމަކަށް އަދަބު ލިބެން ނުޖެހޭނެ ކަމަކަށް ޝަރީއަތް ނުހިންގޭނެ ކަމަކަށް އެއްވެސް ޑިޕްލޮމޭޓަކު ވިދާޅެއް ނުވޭ. އެކަމަކު ޝަރީއަތުގެ ޕްރޮސެސް ގެންދިޔަ ގޮތުގެ އިންސާފުވެރި ކަމާމެދު ސުވާލު އުފައްދާ،،" ޒާހިޔާ ވިދާޅުވި އެވެ. "އަޅުގަނޑާ އިނގިރޭސި ސަފީރާ ވެސް ބައްދަލުވި. ވިދާޅުވީ މިވަރުގެ ކަމެއް ކުރެއްވީ ގާޒީއާމެދު ކުރާ ތުހުމަތަކަށް ލޯފްލީ އެޅޭނެ ފިޔަވަޅުތައްވެސް ހުއްޓާ ނޫން ހެއްޔޭ. އެގޮތަށް އަމަލު ކުރެއްވުމުން ހައިރާންވެ ވަޑައިގެންނެވިއޭ، މި ނޫނަސް ދެން އެކި ދިމަ ދިމާއިން ތަފާތު ވާހަކަ އާދޭ ޕޮޒިޓިވް ކޮށާއި ނެގެޓިވްކޮށް ވެސް،"
އެކަމަނާ ވިދާޅުވީ ރައީސް ނަޝީދުގެ ޝަރީއަތާ މެދު ބޭރުގެ އޮތް އެންމެ ބޮޑު ކަންބޮޑުވުމަކީ އެ ޝަރީއަތް ހިނގާ ދިޔަ ގޮތް ކަމަށެވެ. އަދި އެގޮތަށް ދިމާވަނީ އެ ޝަރީއަތުގެ ކަންކަން ހިނގާ ދިޔަ ގޮތާއި ރާއްޖޭގެ ނިޒާމު އޮތްގޮތް އެންމެ ރަނގަޅަށް ބޭރުގެ ފަރާތްތަކަށް ސާފުނުވެ އޮތުމުން ކަމަށް ވެދާނެ ކަމަށް ޒާހިޔާ ވިދާޅުވި އެވެ. އޭނާ ވިދާޅުވި ގޮތުގައި ބޭރުގެ ފަރާތްތަކުން ކުރާ އެންމެ މައިގަނޑު ސުވާލަކީ، އެ ޝަރީއަތް ގެންދިޔަލެއް އަވަސްވުމާއި ދައުވާ ބަދަލުކުރުން އަދި ރައީސް ނަޝީދަށް ބައެއް ހައްގުތައް ނުލިބުމެވެ.
ނަމަވެސް އެ ހުރިހާ ސުވާލުތަކަކަށް ސަރުކާރުން ވަރަށް ތަފްސީލްކޮށް ޖަވާބުދީ އަރާފައި ހުރި އޮޅުންތައް ފިލުވައިދީފައިވާ ކަމަށް ވެސް އޭނާ ވިދާޅުވި އެެވެ. ނަމަވެސް ސަރުކާރުން އެ ޝަރީއަތަށް ސިޔާސީ ނުފޫޒު ފޯރުވާފައިވާ ކަމަށް ތުހުމަތު ކުރާ ޑިޕްލޮމެޓުންތަކެއް އެބަތިބި ކަމަށް ޒާހިޔާ ވިދާޅުވި އެވެ. އެކަމަނާ ވިދާޅުވީ އެފަދަ އެއްވެސް ނުފޫޒެއް އެ ޝަރީއަތަށް ނުފޯރުވާ ކަމުގެ ޔަގީންކަން ސަރުކާރުން ވަނީ އެފަރާތްތަކަށް ދީފަ އެވެ. އަދި ނަޝީދުގެ ޝަރީއަތަކީ ވަރަށް ދިގުލައިގެން ދިޔަ ޝަރީއަތެއް ކަމަށާއި ގާނޫނީ ވަކީލުންގެ ހައްގު ވެސް ނަޝީދަށް ލިބިދިން ކަމަށް ދަންނަވާފައި ވާނެ ކަމަށް ވެސް ޒާހިޔާ ވިދާޅުވި އެވެ.
"އެހެން ނަމަވެސް އަޅުގަނޑުމެންމީ ސަރުކާރު، އަޅުގަނޑުމެން މި ބުނަނީ ބާރުތައް ވަކިވެފައިވާ ނިޒާމެއްގައި މި މައްސަލައަށް ސަރުކާރަކުން ޕްރެޝާކޮށް ޕުޝް ކުރުމެއް ނެތޭ. ސަރުކާރުގެ ވާހަކަ ގަބޫލު ކުރަން ޑިޕްލޮމޭޓުންނަށް ދަތިތަކެއް ހުރި ކަމަށް ގިނަ ބޭފުޅުން ވިދާޅުވޭ، ފެންނާން ހުރި ބައެއް ހަގީގަތްވެސް އޭގެތެރެެއިން ބައެއް ބޭފުޅުން ގަބޫލުފުޅެއް ނުކުރައްވާ،" މިދިއަ ބުރާސްފަތި ދުވަހު އަަވަސް އަށް ދެއްވި އިންޓަވިއުއެއްގައި ޒާހިޔާ ވިދާޅުވި އެވެ.
ދެން ޑިޕްލޮމެޓުން ނަންގަވާ އެންމެ ބޮޑު އެއް މައްސައަކީ، ޓެރަރިޒަމްގެ ދައުވާ ނަޝީދުގެ މައްޗަށް ކުރުން ކަމަށް ޒާހިޔާ ވިދާޅުވި އެވެ. އޭނާ ވިދާޅުވި ގޮތުގައި ބޭރުގެ ގައުމުތަކުގައި، "އެބްޑަކްޝަން" ފަދަ ކަންކަން އޮންނަނީ ޓެރަރިޒަމްގެ ގާނޫނުގައި ނޫން ކަމަށް ވާތީ، ރާއްޖޭގައި އެފަދަ ކަންކަން ޓެރަރިޒަމްގެ ގާނޫނުގެ ތެރޭގައި އޮންނާތީ ސުވާލުތައް ކުރިމަތިވި ކަމަށް ޒާހިޔާ ވިދާޅުވި އެވެ. އެ ހުރިހާ ކަންބޮޑުވުންތަކެއް ހުރި ނަމަވެސް ރާއްޖެއާ މެދު ޑިޕްލޮމެޓުންގެ އޮތީ މައްސަލަތަކަކަށް ވުރެ ކަންބޮޑުވުންތަކެއް ކަމަށް ވެސް ޒާހިޔާ ވިދާޅުވި އެވެ. އެހެން ވީމާ، އެއީ ޕްރެޝަރެއް ކަމުގައި ބަލާނެ ޖާގައެއް ނެތް ކަމަށް ވެސް ވިދާޅުވި އެވެ.
"ނަޝީދުގެ ކޯޓް ކޭސް އެހާ އަވަހަށް ގެންގޮސް ނިންމާލި ނިންމާލުން ބޭރުގެ ފަރާތްތަކުން ނަގަނީ. މައިގަނޑު ދެ ނުކުތާއަކީ ދައުވާ ރިވިއު ކުރުން ދެން މި އަންނަނީ ޝަރީއަތް ހިންގި ގޮތުގެ ސުވާލު، މިކަންކަން އަޅުގަނޑުމެން ސަރުކާރަކުން ނުބަލަން ޕްރެޝަރެއްގެ ގޮތަކު އެއް،" އެކަމަނާ ވިދާޅުވި އެވެ. "އަނެއްކޮޅުން އަޅުގަނޑުމެނަށް ބުނެވޭ މިއީ ތިން އަހަރުވީ މައްސަލައެއް ކަމަށް ހުދު ނަޝީދު ވެސް އެބަ ވިދާޅުވޭ އެއީ އަންލޯފުލް އެރެސްޓެކޭ. ކުރެއްވީ ވަރަށް ސީރިއަސް ކުށެކޭ، އެކަމަކު ދައުވާ ކުރަނީ ބައްތި ނުދިއްލީމާ އަދަބުދޭ މާއްދާއިންނޭ. އަނެއްކާ މައްސަލައަށް އެހާ ދުވަސްވެފައިމެ ރައީސް ކަމަށް ވާދަ ކުރެއްވުމުގެ ފުރުސަތު ވެސް ލިބި ވަޑައިގެންނެވި،" ޒާހިޔާ ވިދާޅުވި އެވެ.