ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ ޗެއާމަން ކަމުގައި ހުންނެވި އަލީ ހާލިދާއި މެނޭޖިން ޑައިރެކްޓަރު އިބްރާހިމް ފުއާދު ވަކިކޮށްފި އެވެ. ކުއްލި ގޮތަކަށް ވެމްކޯގެ ބޯޑުން އެ ދެބޭފުޅުން ވަކި ކުރި ސަބަބެއް ހާމަ ކޮށްފައެއް ނުވެ އެވެ.
ޕްރައިވަޓައިޒޭޝަން އެންޑް ކޯޕަރޭޝަން ބޯޑް (ޕީސީބީ) ގެ ރައީސް މުހައްމަދު ނިޒާރު ޓްވީޓު ކުރައްވާ ވިދާޅުވެފައި ވަނީ ވެމްކޯގެ ޗެއާމަން ކަމުގައި ހުންނެވި އަލީ ހާލިދާއި މެނޭޖިން ޑައިރެކްޓަރު ކަމުގެ މަގާމުގައި ހުންނެވި ފުއާދު އެ ކުންފުނީގެ ބޯޑުން މިއަދުން ފެށިގެން ވަކި ކުރައްވާ ކަމަށެވެ.
ޕީސީބީން މި ފިޔަވަޅު އެޅި އިރު މިދިއަ ހަފުތާގެ ހޯމަ ދުވަހު އަލީ ހާލިދު ވަނީ ރައީސް އޮފީހުގެ ޗީފް ކޮމިއުނިކޭޝަން އޮފިސަރުގެ މަގާމުން ވެސް ކުއްލި ގޮތަކަށް ވަކި ކުރައްވާފަ އެވެ.