އިއްޔެ ހަވީރުން ފެށިގެން ގދ. ނަޑެއްލާއަށް ކުރި ވިއްސާރާގައި އެރަށުގައި ވަރަށް ބޮޑަށް ފެން ބޮޑުވެ ގޭގެއަށް ފެންވަދެއްޖެ އެވެ.
ނަޑެއްލާ ކައުންސިލްގެ ރައީސް ފައިސަލް ނަޖީބް މިއަދު ވިދާޅުވީ އިއްޔެ ހަވީރު 3:00 ޖެހިއިރުން ފެށިގެން މެދު ކެނޑުމެއް ނެތި ވަރަށް ބޯކޮށް އެރަށަށް ވާރޭ ވެހެމުން ދިޔަ ކަމަށާއި ވާރޭ ހުއްޓާލާފައިވަނީ ރޭ ފަތިހު 4:00 ޖެހި އިރު ކަމަށެވެ.
އިއްޔެ އާއި ރޭ އެރަށަށް ވެހުނު ވާރޭގައި ގާތްގަނޑަށް ދެ ފޫޓަށް ވުރެ މައްޗަށް މަގުތަކުގައި ފެންބޮޑު ވެފައިވާއިރު ރަށުގެ 80 ގެއަށް ފެން ވަދެ ދަތިތަކާ ކުރިމަތިވެފައިވާ ކަމަށް ނަޖީބު ވިދާޅުވި އެވެ.
އޭނާ ވިދާޅުވީ ޕަންޕް ބޭނުން ފެން ހިންދުމަށް މަސައްކަތް ފަށާފައިވާ ކަމަށާއި އެމްއެންޑީއެފް އާއި ރަށުގެ އާންމުންގެ އެހީތެރިކަމާއެކު މިހާރު ވެސް ވަރަށް ބޮޑަށް ފެން ހިންދާފައިވާ ކަމަށެވެ. އަދި ރަށުގެ އެކި ސަރަހައްދު ތަކުގައި ކޯރުތައް ކަނޑައި ފެން ހިންދުމުގެ މަސައްކަތް ކުރަމުން އަންނަ ކަމަށެވެ.
"ފެން ބޮޑުވެގެން ފެން ވަން ނަމަވެސް އެއްވެސް ގެއަކަށް ގެއްލުމެއް ލިބިފައިވާ ކަމަށް އަދި އެނގިފައެއް ނުވޭ. އެކަމަކު ރޭ ހަތަރުދަމު އެންމެން ތިބީ ހޭލާ. ގެއްލުން ވެދާނެ ފަދަ ތަކެތި ރައްކާކޮށްގެން" ފައިސަލް ވިދާޅުވި އެވެ.
ރާއްޖެއަށް ކުރަމުންދާ ހުޅަނގު މޫސުމުގެ ވިއްސާރައިގައި ބައެއް ރަށްރަށަށް ފެންބޮޑުވެ ގެއްލުން ވެފައިވާއިރު، އައްޑު އަތޮޅު ހިތަދޫއަށް ރޭ އެރި ނަގޫ ރޯޅީގައި 10 ގެއެއް ވަނީ ދިރި ނޫޅެވޭ ވަރަށް ހަލާކުވެފަ އެވެ.
މޫސުން ގޯސްވެ ގުގުރުމާއެކު ބޯކޮށް ވާރޭވެހޭނެތީވެ، ކަނޑުދަތުރުތަކަށް ސަމާލުވުމަށް މޫސުމާބެހޭ އިދާރާ ސަލާމާތީ ހިދުމަތްތަކާބެހޭ އިދާރާތަކުން ގެންދަނީ އިލްތިމާސް ކުރަމުންނެވެ.