އެއްމާބަނޑު ހަތަރު ކުދިން ލިބުނު ދިވެހި ދެ މަފިރިންނާއި އެ ކުދިންގެ ފޮޓޯއެއް، އާއިލާ އެހެން ބައެއް މެންބަރުން ހިމެނޭ ގޮތަށް އޭޑީކޭ ހޮސްޕިޓަލުން ދައްކާލައިފި އެވެ. އެ ހޮސްޕިޓަލުން މިއަދު ޓްވިޓާއަށް ދޫކޮށްލި އެ ފޮޓޯގައި އެ ކުދިންނާއި ކުދިންގެ މަންމައަށް ފަރުވާދިން ޑޮކްޓަރުންނާއި ނަރުހުންނާއި ބައެއް އެހެން އިސް ފަރާތްތައް ވެސް ހިމަނާފައި ވެއެވެ.
އޭޑީކޭއިން ބުނީ ވަނީ އެ ހޮސްޕިޓަލްގެ ހަޔާތުގައި ފުރަތަމަ ފަހަރަށް ވިއްސި އެއްމާބަނޑު ހަތަރު ކުދިން އިއްޔެ ގެއަށް ދޫކޮށްލަފައިވާ ކަމަށާއި ގެއަށް ދޫކޮށްލި ހަތަރު ބެއިންގެ ހާލު ވެސް ރަނގަޅު ކަމަށެވެ. -- ސިޒޭރިއަން ހަދައިގެން އެ ކުދިން ވިއްސީ މިދިއަ މަހުގެ 17 ވަނަ ދުވަހު އެވެ. އެއީ ތިން އަންހެން ކުދިންނާއި ފިރިހެން ކުއްޖެކެވެ.
އޭޑީކޭއިން މި ކުދިންނާއި އާއިލާގެ ފޮޓޯއެއް ހާމަކޮށްފައި ވަނީ އެކުދިން ބަލައިލަން ގިނަ ބަޔަކު ބޭނުންވާކަން ސޯޝަލް މީޑިއާގައި އެކި ގޮތްތަކަށް ބުނެފައި ވަނިކޮށެވެ. އަދި މިއީ ފަދަ ގޮތަކަށް ރާއްޖޭގެ ހޮސްޕިޓަލަކުން ފޮޓޯ އާންމު ކުރި ފުރަތަމަ ފަހަރުވެސް މެއެވެ.
މި ހަތަރު ކުދިން ލިބިފައި ވަނީ ފާތުމަތު ސުމީތާ އަހުމަދު އަޝްފާގު ކިޔާ ދެމެފިރިއަކަށެވެ. އެއްމާ ބަނޑު ހަތަރު ކުދިން ލިބުމަކީ ވަރަށް މަދު ކަމެކެވެ.