ބައެއް އަރަބިގައުމުތަކާ ގަތަރާ ދެމެދު ހިނގަމުންދާ އަރައިރުމުގެ މައްސަލަ ހައްލު ކުރަން މަޝްވަރާ ކުރަން އެގައު އޮތީ ތައްޔާރަށް ކަމަށް ގަތަރުގެ އަމީރު ޝައިޚު ތަމީމް ބިން ހަމަދު އައް ސާނީ ވިދާޅުވެއްޖެއެވެ.
ޓީވީން ދުރަށް ދެއްކި ޚިތާބެއްގައި ތަމީމު ވިދާޅުވީ މިހާރު އުފެދިފައި އޮތް މައްސަލައަށް ކޮންމެ ހައްލެއް ހޯދިޔަސް، އެކަމުގައި ގަތަރުގެ ސިޔާދަތަށް އިހުތިރާމް ކުރަން ޖެހޭނެ ކަމަށެވެ.
" ގަތަރުގެ ސިޔާދަށް އިހުތިރާމް ކުރާހާ ހިނދަކު، މިހާރު ހުރި މައްސަލަތައް ހައްލުކުރަން ވާހަކަ ދައްކަން އަހަރެމެން މިތިބީ ތައްޔާރަށް،" ސައުދީ އަރަބިއްޔާ، ޔުނައިޓެޑް އަރަބް އެމިރޭޓްސް ( ޔޫއޭއީ)، ބަހުރައިން އަދި މިސްރުން ގަތަރާ ގުޅުން ކަނޑައިލި ފަހުން އާއްމު ކުރެއްވި ފުރަތަމަ ހިތާބުގައި ތަމީމް ވިދާޅުވިއެވެ.
މައްސަލަ ހައްލުކުރަން ކުވައިތާއި އެެމެރިކާއާއި ތުރުކީ އަދި ޖަރުމަނުން ކުރަމުން އަންނަ މަސައްކަތަށް ތަމީމް ޝުކުރު އަދާކުރެއްވިއެވެ.
ގަތަރާއި ގުޅުން ކަނޑާލާފައިވާ ގައުމުތަކުން އެގައުމާ ދެކޮޅަށް މިހާރު އަންނަނީ ވަރުގަދަ ކެމްޕޭނެއް ހިންގަމުން ކަމަށާއި އެއީ ކުރިން ރާވާފައިވާ ކެމްޕޭނެއް ކަަމަށް އޭނާ ވިދާޅުވިއެވެ.
" އަހަރެމެންނާ ދެކޮޅަށް ހިންގަމުންދާ ކެމްޕޭން އެއީ ކުރިން ރާވާފައި އޮތް ކަމެއް ކަން ސާފު. އަހަރެމެން އެކަން ބަލައިގަތީ އިމްތިހާނެއްގެ ގޮތުގައި، އަހަރެމެން ފާސްވި،" ތަމީމް ވިދާޅުވިއެވެ.
ޓެރަރިޒަމަށް ވާގިދޭ ކަމަށް ބުނެ އަރަބި ގައުމުތަކުން ގަތަރާ ގުޅުން ކަނޑައިލީ މިދިޔަ ޖޫން މަހުގެ ހަތަރުވަނަ ދުވަހުއެވެ. އެއަށް ފަހު އެގައުމުތަކުން އެދޭ 13 ކަމެއް ކުރަން ގަތަރަށް ޑިމާންޑް ކުރިއެވެ. . އީރާނާ ސިޔާސީ ގުޅުން ކަނޑައިލުމާއި ގަތަރުގައިވާ ތުރުކީގެ އަސްކަރީ މަރުކަޒުތައް ބަންދުކުރުމާއި އަލް ޖަޒީރާ ބަންދުކުރުން އޭގެ ތެރޭގައި ހިމެެނެ އެވެ. އެއިން އެއްވެސް ކަމެއް ނުކުރާނެ ކަމަށް ގަތަރުން ބުނެފައި ވަނިކޮށް ގުޅުން ކަނޑައިލި ގައުމުތަކުން މިހާރު ވަނީ ޑިމާންޑްތައް ދޫކޮށްލާފައެވެ.
ގަތަރުގެ އަމީރު ޝައިޚު ތަމީމް ބިން ހަމަދު އައް ސާނީ. ފޮޓޯ: އަލް ޖަޒީރާ