ހަމާސްގެ ވެރިން ގަތަރު ދޫކޮށް ފޭބުމަށް އެ ގައުމުގެ ސަރުކާރުން އެންގުމާ ގުޅިގެން -- ހަމާސްގެ ސިޔާސީ ގޮފިތައް ދެން ބަދަލުކުރާނީ ތުރުކީއަށް ކަމަށް އޭރު ބުނެވުމެވެ.
ނަމަވެސް، ތުރުކީން ބުނާ ގޮތުން އެއީ އެއްވެސް މާނައެެއް ނެތް އަދި އަމަލީ ސިފަޖެހުން ދުރު ވިސްނުމެކެވެ.
ތުރުކީގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވާ ގޮތުން، ހަމާސްއާ ގުޅުން އޮތް އެއްވެސް ބަޔަކު -- ސިޔާސީ ހަރަކާތަކުގައި އިސްކޮށް އުޅޭ ވަރުގެ ބަޔަކު ތުރުކީއަށް ހިޖުރަކޮށްފައެއް ނުވެ އެވެ. ހަމާސްގެ ހެޑްކުއާޓަރު ތުރުކީއަށް ބަދަލުކުރާ ކަމަށް ބުނެ މީޑިއާތަކުން ދައްކާ ވާހަކަތަކަކީ، ތުރުކީއާ އެއްވެސް ގުޅުމެއް އޮތް ވާހަކަތަކެއް ނޫން ކަމަށްވެސް އެ ގައުމުން ބުންޏެވެ.
ރިޕޯޓްތައް ބުނާ ގޮތުން ގަތަރުގައި މީގެ ކުރިން ހިންގި ހަމާސްގެ ސިޔާސީ ގޮފިތައް، އެ ގައުމުން ބޭރުކުރުމަށް ތުރުކީ ސަރުކާރުން ވަނީ ހަމާސްއަށް އަންގާފަ އެވެ. އަދި ގަތަރުގައި ދިރިއުޅޭ ހަމާސްގެ ވެރިން ވެސް ގަަތަރުން ފޭބުމަށް އޮތީ މުހުލަތެއް ދީފަ އެވެ.
ގަތަރުގައި ތިބެވޭ ގޮތް ނުވެއްޖެ ނަމަ، ހަމާސްގެ ވިސްނުމަކީ ހެޑްކުއާޓަރު ތުރުކީއަށް ބަދަލުކުރުން ކަމަށް -- ހަމާސްގެ އޮފިޝަލުންނާ ހަވާލާދީ ނޫސްތަކުގައި ވަނީ ރިޕޯޓްކޮށްފަ އެވެ. އެކަމަކު މިކަމުގައި ހުރި ދޮގުތެދާ މެދު އެއްވެސް ބަޔަކު މީގެކުރިން ވިސްނާފައިވާ ކަމަކަށް ނުބެލެވެ އެވެ.
ތުރުކީން ހަމާސްއަށް، ރަސްމީ ސިފައެއްގައި ހިޔާވަހިކަން ދިނުމަކީ، ޓެރަރިސްޓުންނަށް ހިމާޔަތްދިނުން ކަމަށް ޔޫރަޕިއަން ޔޫނިއަނުން ބަލާނެ އެވެ.
ޔޫރަޕިއަން ޔޫނިއަންގައި ތުރުކީ ބައިވެރިވުމަށް އެދި ހުށަހަޅާފައި އޮތް ފޯމު އަދިވެސް އޮތީ އޮތް ގޮތަށެވެ. ޔޫރަޕްގެ ޕާލަމެންޓުން ބުނާ ގޮތުން ތުރުކީއަށް ޔޫރަޕިއަން ޔޫނިއަންގެ މެމްބަރުކަން ނުދެވިގެން އުޅޭނީ އެއީ ޓެރަރިސްޓުންނަށް ވާގިވެރިވާ ގައުމެއް ކަމަށް ބެލެވިފައި އޮތުމުންނެވެ.
މިކަން މިގޮތަށް އޮއްވައި، ހަމާސްގެ ހެޑްކުއާޓަރު ތުރުކީއަށް ބަދަލުކޮށް އަދި ތުރުކީގެ އާންމު ރައްޔިތުން ކާބޯތަކެތިން ކާންދިނުމަކީ ތުރުކީއަށް ހުރި ބައެއް ފަސޭހަތައް ގެއްލިގެން ހިނގައިދާނެ ކަމެއް ކަމަށް ބެލެވެ އެވެ.
ބައިނަލްއަގްވާމީ މަސްރަހުގައި ތުރުކީއަށް އޮތް ހައިސިއްޔަތަށް ބަލާއިރު، ހަމާސް ކަހަލަ ހަނގުރާމަވެރި ގުރޫޕަކަށް ތުރުކީން ރަސްމީ ސިފައެއްގައި އެހީތެރިވާނެ ކަމަކަށް ނުބެލެވެ އެވެ.