މި އަހަރުގެ ހައްޖުގެ އަޅުކަން އަދާކުރުމަށް ރާއްޖެއިން ދިއުމަށް ހަމަޖެހިފައިވާ 1000 ހައްޖުވެރިންގެ ތެރެއިން މައްކާއަށް ފުރާ ފުރަތަމަ ފްލައިޓް މިއަދު ފުރައިފި އެވެ. މިއަދު ފުރީ، ޒައީ ގްރޫޕްގެ ހައްޖު ވެރިންނެވެ.
މިއަހަރުގެ 1000 ހައްޖުވެރިންގެ ތެރެއިން މިއަދު ހެނދުނު 9:25 ގައި ސްރީލަންކަން އެއާލައިންސްގެ ފްލައިޓުން ހައްޖަށްދާން ފުރާފައިވަނީ ޒައީ ގްރޫޕުގެ 96 ހައްޖުވެރިންނެވެ. މިއަހަރު ހައްޖަށްދާ ހުރިހާ ހައްޖާޖީން އެއަޕޯޓަށް ދާން އެމްޓީސީސީގެ ފެރީ ހާއްސަ ކުރެވިފަ އެވެ. އަދި އެމްއެންޑީއެފް އާއި މޯލްޑިވްސް ޕޮލިސް ސާވިސް ވެސް ވަނީ އެއާޕޯޓްގައި އެބޭފުޅުންނަށް އެހީތެރިކަން ފޯރުކޮށްދިނުމަށް ހަރަކާތްތެރިވެފަ އެވެ.
ރާއްޖެއިން މިއަދު ހައްޖަށް ފުރަންދިޔަ މީހުންނާއި އިސްލާމިކް މިނިސްޓަރު ޑރ.އަހްމަދު ޒިޔާދު ބާގިރު ވަނީ އެއާޕޯޓްގައި ބައްދަލު ކުރައްވާފައެވެ.
މި އަހަރު ރާއްޖެއަށް ހައްޖުގެ 1000 ކޯޓާ ލިބިފައި ވެއެވެ. މީގެ ކުރިން ކޮންމެ އަހަރަކު 2000 ކޯޓާ ސައުދީން ދިންނަމަވެސް މިއަހަރު ދީފައިވަނީ 1000 ކޯޓާ އެވެ. މިއަހަރު އަމީރުލް ހައްޖު ގެ ގޮތުގައި ވަޑައިގަތުމަށް ހަމަޖެހިފައިވަނީ އެކޮނޮމިކް މިނިސްޓަރު މުހައްމަދު ސައީދެވެ.