ރައްޔިތުން މަޖިލީހުގެ މެންބަރުކަން ގެއްލިއްޖެ ކަމަށް އިލެކްޝަން ކޮމިޝަން (އީސީ)އިން ނިންމި ނިންމުން ބާތިލު ކުރުމަށް ވިލިނގިލީ ދާއިރާގެ މެންބަރު ސައުދު ހުސެން އާއި ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހިމް (ވައްޑޭ) ހުށަހެޅި މައްސަލަ ސުޕްރީމް ކޯޓުގައި މާދަމާއަށް އެޖެންޑާކޮށްފި އެވެ.
ވައްޑޭއާއި ސައުދު ސުޕްރީމް ކޯޓަށް ހުށަހެޅީ އެ ދެ މެންބަރުންގެ ގޮނޑި ނުގެއްލޭ ކަމަށް ކަނޑައެޅުމަށެވެ. އެގޮތުން ވައްޑޭގެ މައްސަލަ ތާވަލުކޮށްފައި ވަނީ މާދަމާ ހެނދުނު 10:30 ގައެވެ. އަދި ސައުދުގެ މައްސަލަ އެޖެންޑާކޮށްފައި ވަނީ މާދަމާ މެންދުރު 1:30 އަށެވެ. ވައްޑޭ އާއި ސައުދުގެ އިތުރުން މަޑުއްވަރީ ދާއިރާގެ މެމްބަރު މުހައްމަތު އަމީތު އަދި ދިއްދޫ ދާއިރާގެ މެމްބަރު އަބްދުއްލަތީފް މުހައްމަދުގެ މައްސަލަ ވެސް ވަނީ ސުޕްރީމް ކޯޓަށް ހުށަހަޅާފަ އެވެ.
މައްސަލަ އެޖެންޑާކޮށްފައިވާ އިރު ސައުދު މިވަގުތު ވަނީ ފަނޑިޔާރަކު މަރާލުމުގައި ބައިވެރިވުމުގެ ތުހުމަތުގައި ފުލުހުން ހައްޔަރުކޮށްފަ އެވެ. އަދި މެންބަރު ކަން ގެއްލިފައިވާ ކަމަށް އީސީން ކަނޑައަޅާފައިވަނިކޮށް މަޖިލީހުގެ އިދާރާ ތެރެއަށް ވަތް މައްސަލައާ ގުޅިގެން ވައްޑޭ ވެސް ވަނީ ހައްޔަރުކޮށްފަ އެވެ.