ރ. މީދޫ ފެންފިޔާޒްގެ މުހައްމަދު އަނަސް މަރާލި މައްސަލަ ބެލުމަށް ރައްޔިތުން މަޖިލީހުގެ ތިން ކޮމިޓީއަށް ހުށަހަޅައިފި އެވެ.
އިދިކޮޅު އެމްޑީޕީއަށް ނިސްބަތްވާ މެންބަރުން އަނަސްގެ މައްސަލަ ހުށަހަޅާފައިވ ވަނީ ސަރުކާރު މައްސޫލިއްޔަތު އަދާކުރާ މިންވަރު ބަލާ ކޮމިޓީއަށާއި، ސަލާމަތީ ހިދުމަތްތަކާ ބެހޭ ކޮމިޓީ އަދި ގައުމީ ސަލާމަތުގެ ކޮމިޓީ އަށެވެ. އެ މައްސަލަ ހުށަހަޅަމުން މަޖިލީހުގެ އަމީންއާންމު އަހުމަދު މުހައްމަދު އަށް ފޮނުވި ސިޓީގައި ބުނެފައި ވަނީ އަނަސްގެ މަރުގެ މައްސަލާގައި ސުވާލު ކުރުމަށް ވީހާ ވެސް އަވަހަށް ކަމާ ބެހޭ ފަރާތްތައް ކޮމިޓީއަށް ހާޒިރު ކުރަން އެދޭ ކަމަށެވެ.
ދިޔަ މަހުގެ 31 ވަނަ ދުވަހުގެ ރޭ ލިޓަސް ސާވިސް ސެންޓަރު ތެރޭގައި އަނަސް މަރާލި މައްސަލައާ ގުޅިގެން ރޭ 12 މީހަކު ހައްޔަރު ކުރި އެވެ. އެ މީހުންގެ ތެރޭގައި އަނަސް ގަޔަށްއަށް ވަޅިން ހަމަލާދީ އޭނާ މަރާލުމުގައި އަމަލީ ގޮތުން ހަރަކާތްތެރިވި މީހުން ހިމެނޭ ކަމަށް ފުލުހުން ބުނެފައިވެ އެވެ.
ގުރޫޕަކުން ދިން ހަމަލާއެއްގައި އަނަސްގެ އިތުރުން ހއ. ތަކަންދޫ، އިބްރާހިމީ ހިޔާ، ނަދީމު އަބްދުއްރަހީމް ވެސް ވަނީ މީގެ ދުވަސްކޮޅެއް ކުރިން މަރުވެފަ އެވެ. ސީދާ އެ މަރާ ގުޅިގެން މީހަކު ހައްޔަރުކޮށްފައިވާ ކަމެއް ވެސް ފުލުހުން ނުބުނެ އެވެ. ނަމަވެސް މިފަހުން ހިނގި މާރާމާރީތަކާ ގުޅިގެން 23 މީހުން ހައްޔަރުކޮށްފައިވެ އެވެ.