ފުލުހުން ގާނޫނީ އިޖުރާތުތަކާއި ހިލާފަށް އަދި އެހެން ގާނޫނުތަކާއި ހިލާފަށް އަމަލު ކޮށްފައިވާ ކަން އިނގި ހުރެ ޕްރޮސެކިއުޓާ ޖެނެރަލް އައިޝަތު ބިޝާމް އެކަން ފޮރުވުމަށްޓަކައި އެކި އެކި ގާނޫނުތައް ނަގައިގެން ދިފާއު ކުރުމަށް ކުރަމުން ގެންދާ މަސައްކަތަކީ ދެވޭ ވަރަށް ނުރައްކާތެރި މެސެޖެއް ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫންގެ ވަކީލު މައުމޫން ހަމީދު މިއަދު ވިދާޅުވެއްޖެ އެވެ.
ހައިކޯޓުގައި މިއަދު ބޭއްވި ފާރިސްގެ އިސްތިއުނާފު މައްސަލައިގެ އަޑުއެހުމާއި ގުޅިގެން ފާރިސްގެ ވަކީލުން ބޭއްވި ނޫސްވެރިންގެ ބައްދަލުވުމެއްގައި މައުމޫން ހަމީދު ވިދާޅުވީ އިސްތިއުނާފްގެ ދައުވާގައި ވެސް ހުށަހަޅާފައިވާ ގޮތަށް ފުލުހުން ވަނީ ފާރިސް ހައްޔަރު ކުރުމުގެ ކުރިންވެސް އަދި ފަހުންވެސް އިޖުރާއަތާ ހިލާފަށް ކަންކަން ކޮށްފައި ކަމަށެވެ. އަދި މީހަކު ހައްޔަރު ކުރުމަށް ފަހު އެންމެ ކައިރީގައި ހުންނަ ފުލުހުންގެ އިދާރާއަށް ގެންދަން ޖެހޭކަމަށް ގާނޫނުގައި ބަޔާންކޮށްފައިވާ ކަމަށާއި އެކަމަށް ފުލުހުން ވަނީ އިއުތިރާފްވެފައި ކަމަށެވެ.
މައުމޫން ވިދާޅުވީ ޕީޖީ މިއަދުގެ އަޑުއެހުމުގައި ވިދާޅުވީ ފާރިސް ހައްޔަރު ކޮށްފައިވަނީ ޖިނާއީ ބޮޑު ކުށެއްގެ ސަބަަބުން ކަމަށާއި އެހެން ކަމުން އޭނާ ހައްޔަރު ކޮށްފައި ބަހައްޓަން ޖެހޭ ކަމަށެވެ. ނަމަވެސް ފުލުހުން ބަޔާން ކޮށްފައިވާ އެއްވެސް ކުށެއް ޖިނާއީ ބޮޑު ކުށެއްގެ ތެރޭގައި ނުހިމެނޭ ކަމަށް އެކަމަނާ އިއުތިރާފްވި ކަމަށެވެ. ފާރިސް ހައްޔަރުކޮށްފައިވަނީ ޖިނާއީ އިޖުރާއަތުގެ ގާނޫނާ ހިލާފަށް ކަމަށް ވެސް ވިދާޅުވި އެވެ.
"ގާނޫނީ އިޖުރާތުތަކާއި ހިލާފަށް އަދި އެހެން ގާނޫނުތަކާއި ހިލާފަށް ފާރިސް ހައްޔަރު ކުރުމުގެ ކުރިން އަދި ފަހުން ވެސް ފުލުހުން އަމަލު ކޮށްފައިވާ ކަން އިނގި ހުރެ ޕީޖީން އެކަން ފޮރުވުމަށްޓަކައި އެކި އެކި ގާނޫނު ތައް ނަގައިގެން އުޅުއްވާތީ ކަންބޮޑުވޭ، އެކަމަކީ ގާނޫނާ ހިލާފުވާން ފުލުހުންނަށް ލިބޭ ވަރަށް ބޮޑު ބާރެއް، ތިމަންނާމެން ގާނޫނާ ހިލާފަށް ކަމެއް ކުރިއަށް އަޅާނެ ފިޔަވަޅެއް ނޯންނާނޭ، އަދި ދައުވާއެއްވެސް ނުކުރާނޭ، ޕީޖީ ނުންނާނީ ތިމަންނަމެންގެ ހިމާޔަތުގައޭ، މިއީ ހާދަ ނުރައްކާ މެސެޖެކޭ، އެކަން އެ ކުރެއްވީ އެކަމަނާގެ ގާނޫނުގެ ބޭރުން، ޕީޖީގެ މަސްއޫލިއްޔަތަކީ ހަމަ އެކަނި ދައުވާ އުފުލުމެއް ނޫން، އަސާސީ ހައްގުތައް ނެގެހެއްޓުން އަދި އަސާސީ ހައްގުތައް ދިފާއުކޮށްދިނުންވެސް އެއީ އެބޭފުޅުންގެ މަސްއޫލިއްޔަތެއް" މައުމޫން ވިދާޅުވި އެވެ.
މައުމޫން އިތުރަށް ވިދާޅުވީ ފުލުހުން ބުނީ ދައުވާ އުފުލޭ ވަރަށް ހެއްކާ ގަރީނާ ހުރިކަމަށާއި ނަމަވެސް ޕީޖީއިން ދައުވާ އުފުލާފައި ނުވަނީ ކީއްވެގެންތޯ ސުވާލު އުފެދޭ ކަމަށެވެ. އަދި ނިމިފައިނުވާ ތަހުގީގެއްގެ މައްޗަށް ކޮށްފައިނުވާ ދައުވާއެއްގައި ބަންދުކޮށްފައި ބެހެއްޓިގެން ނުވާނެ ކަމަށެވެ.
މައުމޫން ވިދާޅުވީ ފާރިސް މިއަދުގެ ޝަރީއަތުގައި ވިދާޅުވީ މި ހުރިހާ ތުހުމަތު ތަކެއް ކުރެވެން ފެށީ އޭނާ މަޖިލިސް ރައީސްގެ އިތުބާރު ނެތް މައްސަލާގައި ސޮއިކުރި ހިސާބުން ފެށިގެން ކަމަށާއި އެކަމަކީ ރައްޔިތުން މަޖިލީހުގެ މެންބަރުންނަށް ބިރު ދެއްކުމަށް ހިންގާ އަމަލެއް ކަމަށެވެ.
"ފާރިސް ޝަރީއަތުގައި ވިދާޅުވީ މި ހުރިހާ ތުހުމަތު ތަކެއް ކުރެވެން ފެށީ އޭނާ މަޖިލިސް ރައީސްގެ އިތުބާރު ނެއް މައްސަލާގައި ސޮއިކުރި ހިސާބުން ފެށިގެން ކަމަށް، އެހާ ހިސާބުން ފެށިގެން މައްސަލަތައް އުފަންވެގެން ދިޔަ ކަމަށް، އެކަމަކީ މެންބަރުންނަށް ބިރު ދެއްކުމަށް ހިންގާ އަމަލެއް މިއީ ފެންނަށް އޮތް ހަގީގަތެއް ކަމަށް، އެކަމަކީ ބަޔަކު މީހުން ރާވައިގެން ކުރާ ކަމެއް، ދައުލަތުގެ ބާރުތައް ނަހަމަ ގޮތުގައި ބޭނުން ކޮށްގެން ހިންގާ އަމަލެއް ކަމަށް، މިއީ ބޮޑު ޖަރީމާއެއް ކަމަށް،" މައުމޫން ވިދާޅުވި އެވެ
މައުމޫން ވިދާޅުވީ ހައިކޯޓުގެ ފަނޑިޔާރުން މިއަދުގެ އަޑުއެހުން ނިންމާލާފައިވަނީ ދައްކަން ޖެހޭ ހުރިހާ ވާހަކައެއް ދެކެވިއްޖެ ކަމަށް ވިދާޅުވެ ކަމަށާއި ދެން އިތުރު ޝަރީއަތުގެ އަޑުއެހުމެއް އޮންނާނީ ކޯޓުން ކަމެއް ސާފުކުރަން ބޭނުންވާ ނަމަ ނުވަތަ ހުކުން ކުރުމަށް ކަމަށް ކަމަށެވެ.