ރާއްޖޭގައި ހިނގަމުން އަންނަ މާރަމާރީތަކާއި ގޭންގު ކުށްތައް ހުއްޓުވުމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ގައުމީ ފެންވަރުގައި މަސައްކަތް ފަށައިފި އެވެ.
މާރަމާރީތަކާއި ކުށްތައް ހުއްޓުވުމަށް އެޗްއާރްސީއެމް އިން ފެށި މި މަސައްކަތުގެ ތެރެއިން އެ ކޮމިޝަނުން މިއަދު ވަނީ ކަމާ ބެހޭ ފަރާތްތަކާ އެކު ސިލްސިލާ ބައްދަލުވުންތަކެއް ފަށައިފަ އެވެ. އެގޮތުން ހޯމް މިނިސްޓްރީއާ، ފުލުހުންނާއި ޖުވެނަލް ޖަސްޓިސް ޔުނިޓްއާ އެޗްއާރްސީއެމްއިން ވަނީ ބައްދަލުކޮށްފަ އެވެ. އޭގެ އިތުރުން ޖެންޑާ މިނިސްޓްރީއާ، ފުލުހުންނާއި، އިސްލާމިކް މިނިސްޓްރީ އާއި ޔޫތު މިނިސްޓްރީ އަދި އެޑިއުކޭޝަން މިނިސްޓްރީއަ ވެސް އެ ކޮމިޝަނުން ބައްދަލު ކުރި އެވެ.
އެޗްއާރްސީއެމް އިން ބުނީ އެ ބައްދަލުވުންތަކުގެ ބޭނުމަކީ ގޭންގު ކުށްތަކާއި މާރަމާރީތައް ހުއްޓުވުމަށް މުއައްސަސާތަކަށް ބާރު އެޅުމަށާއި އެކަންކަމަށް އަވަސް ހައްލެއް ހޯދުމަށް މުއައްސަސާތަކާ ގުޅިގެން އެޅޭނެ ފިޔަވަޅުތަކާ ގުޅޭ ގޮތުން މަޝްވަރާ ކުރުން ކަމާށެވެ. އަދި އެކަންކަން ތަންފީޒު ކުރުމަށާއި ދެމެހެއްޓެނިވި ގޮތުގައި މަސައްކަތް ކުރެވޭނެ ނިޒާމެއް ގާއިމް ކުރުމަށް ވެސް އެ ބައްދަލުވުންތަކުގައި މަޝްވަރާ ކުރާނެ ކަމަށް އެ ކޮމިޝަނުން ބުންޏެވެ.
ބޮޑެތި ކުށްތަކާއި މާރަމާރީ މަަދުވެފައި އޮތުމަށް ފަހު މިދިޔަ ޖުލައި މަހުގެ ތެރޭގައި މާލެ ތެރޭގައި އިންތިހާއަށް މާރަމާރީތައް ގިނަވި އެވެ. އަދި އެކަމުގެ ތެރޭގައި ދެ ޒުވާނަކަށް ވަޅިން ހަމަލާދީ މަރާލި އެވެ. މި މައްސަލަތައް ފުލުހުން އަންނަނީ ތަހުގީގު ކުރަމުންނެވެ.