މިދިޔަ ޖުލައި މަހުގެ 27 ވަނަ ދުވަހުގެ ރޭ ޓާމިނަލް ކެފޭގެ ތެރޭގައި އިންދާ މަރާލި ހއ. ތަކަންދޫ، އިބްރާހިމީ ހިޔާ، ނަދީމް އަބްދުއްރަހްމާންގެ މަރުގެ މައްސަލައާ ގުޅިގެން ގެއެއް ބަލާ ފާސްކޮށް މީހަކު ހައްޔަރުކޮށްފި އެވެ. މި މައްސަލާގައި ހައްޔަރުކޮށްފައިވަނީ ގ. ޝާރާޒް، މުހައްމަދު މަފާޒެވެ.
މިރޭ ފުލުހުން ބަލާ ފާސްކޮށްފައިވަނީ ގ. ޖެލީފިޝް އެވެ. ފުލުހުން ބުނެފައިވަނީ، މިރޭ އެ ގެ ބަލާފާސްކޮށް ނަދީމަށް ހަމަލާދިން ކަމުގެ ތުހުމަތުގައި މީހަކު ހައްޔަރުކޮށްފައިވާ ކަމަށެވެ. އެމީހާގެ ވަނަވަރެއް ފުލުހުން ނުބުނެ އެވެ. ނަމަވެސް ހައްޔަރުކޮށްފައިވަނީ މަފާޒުކަން އަވަސްއަށް ވަނީ ކަށަވަރުވެފަ އެވެ.
މަފާޒަކީ ކުރީގެ ހޯމް މިނިސްޓަރު އުމަރު ނަސީރު، މޮނިކޮމް އަމުރު ނެރުއްވާ ޓެގް އެޅުވި މީހެކެވެ. އަދި މޮނިކޮމް އަމުރާ ހިލާފުވެގެން ހޯމް މިނިސްޓަރަށް ލިބި ވަޑައިގަންނަވާ ބާރު ބޭނުން ކުރައްވާ އޭނާގެ ޝަރީއަތް ނިމެންދެން ޖަލަށްލާން އަމުރުމޮށް ޖަލަށް ބަދަލު ވެސް ކުރި މީހެކެވެ. އޭނާގެ މައްޗަށް އެ މައްސަލާގައި ދައުވާ އުފުލައި ޝަރީއަތް ވެސް ހިނގި އެވެ.
މޮނިކޮމް އަމުރާ ހިލާފުވި މީހެއް މުޖުތަމައުއަށް ދޫވެފައިހުރިއިރު ހޯމް މިނިސްޓަރުކަމުން އުމަރު ނަސީރު އިސްތިއުފާ ދެއްވިފަހުން އެއްވެސް މޮނިކޮމް އަމުރެއް ނެރެފައެއް ނުވެ އެވެ. އަދި އެކަން ރަނގަޅަށް ބަލަހައްޓަމުން ވެސް ނުދެ އެވެ.
ގ. ޖެލީފިޝް ބަލާ ފާސްކޮށް މަފާޒުގެ އިތުރުން ވެސް މީހަކު ހައްޔަރުކުރި ކަމަށް ފުލުހުން ބުންޏެވެ. ނަމަވެސް އެއީ އެހެން މައްސަލައެއްގެ ތުހުމަތުގައި ހައްޔަރުކުރި މީހެއް ކަމަށް ފުލުހުން ބުންޏެވެ. އެއީ ކޮން މައްސަލައެއް ކަމެއް ނުބުނެ އެވެ. ފުލުހުން ވަނީ އެ ގެ ބަލާ ފާސްކޮށް ގިނަ ތަކެތި ވެސް ބެލުމުގެ ދަށަށް ގެންގޮސްފަ އެވެ.