މިދިޔަ ޖުލައި މަހުގެ 27 ވަނަ ދުވަހުގެ ރޭ ޓާމިނަލް ކެފޭގެ ތެރޭގައި އިންދާ މަރާލި ހއ. ތަކަންދޫ، އިބްރާހިމީ ހިޔާ، ނަދީމް އަބްދުއްރަހްމާންގެ މަރުގެ މައްސަލާގައި ހައްޔަރު ކުރި މީހާގެ ބަންދަށް 15 ދުވަސް ޖަހައިފި އެވެ.
ބަންދުގެ މުއްދަތު ޖާހާފައި ވަނީ ނަދީމްއަށް ހަމަލާ ދިން ކަމުގެ ތުހުމަތުގައި ރޭ ގެއެއް ބަލައި ފާސްކޮށް ހައްޔަރު ކުރި ގ. ޝާރާޒް، މުހައްމަދު މަފާޒް އެވެ.
މަފާޒް އަކީ ކުރީގެ ހޯމް މިނިސްޓަރު އުމަރު ނަސީރު، މޮނިކޮމް އަމުރު ނެރުއްވާ ޓެގް އެޅުވި މީހެކެވެ. އަދި މޮނިކޮމް އަމުރާ ހިލާފުވެގެން ހޯމް މިނިސްޓަރަށް ލިބި ވަޑައިގަންނަވާ ބާރު ބޭނުން ކުރައްވާ އޭނާގެ ޝަރީއަތް ނިމެންދެން ޖަލަށްލާން އަމުރުމޮށް ޖަލަށް ބަދަލު ވެސް ކުރި މީހެކެވެ. އޭނާގެ މައްޗަށް އެ މައްސަލާގައި ދައުވާ އުފުލައި ޝަރީއަތް ވެސް ހިނގި އެވެ.
ގ. ޖެލީފިޝް ބަލައި ފާސްކޮށް މަފާޒުގެ އިތުރުން ވެސް މީހަކު ހައްޔަރުކުރި ކަމަށް ފުލުހުން ބުންޏެވެ. ނަމަވެސް އެއީ އެހެން މައްސަލައެއްގެ ތުހުމަތުގައި ހައްޔަރުކުރި މީހެއް ކަމަށް ފުލުހުން ބުންޏެވެ. އެއީ ކޮން މައްސަލައެއް ކަމެއް ނުބުނެ އެވެ. ފުލުހުން ވަނީ އެ ގެ ބަލާ ފާސްކޮށް ގިނަ ތަކެތި ވެސް ބެލުމުގެ ދަށަށް ގެންގޮސްފަ އެވެ.